شىمكەنتتە تەمىرجولشىلار باس كوتەردى. ولار باسشىلىقتان جالاقىلارىن كوتەرۋدى تالاپ ەتتى. بۇل تۋرالى كتك تەلەارناسى حابارلادى. 

جۇمىسشىلار 120 مىڭ تەڭگەلىك جالاقىنىڭ ەشنارسەگە جەتپەيتىنىن ايتىپ شاعىمداندى. ولار جالاقىلارىن ەكى ەسەگە ارتتىرۋدى تالاپ ەتۋدە.

«ءبىز ەڭبەكاقىمىزدى 250 مىڭ تەڭگەگە دەيىن كوتەرۋدى تالاپ ەتەمىز. باسشىلىق تاراپى بىزگە ىڭعايلى جۇمىس جاعدايىن جاساۋى كەرەك. ءار ماۋسىم سايىن جاڭا قىزمەتتىك كيىم بەرىلۋى ءتيىس، ال ءبىز تەك جىلىنا ءبىر رەت قانا الامىز. ءوزىمىز ساتىپ الۋىمىزعا تۋرا كەلەدى. شىمكەنتتە ەڭ از جالاقى بىزدە عانا»، – دەيدى تەمىرجول قىزمەتكەرى نۇرجان اشىرباەۆ.

نارازىلىق شاراسىنا 100-دەن اسا ادام شىققان. ازىق-تۇلىك قىمباتتاپ، ايماقتاعى اپتاپ ىستىققا قاراماي جۇمىس ىستەيمىز دەگەن ولار جالاقىلارىنىڭ ەشنارسەگە جەتپەيتىنىن ايتادى. جۇمىسشىلاردىڭ جانايعايىن تىڭداعان ۇيىم وكىلى بۇل ماسەلە قاراستىرىلىپ جاتىر دەپ سەندىردى. سونىمەن قاتار ول تەمىرجولشىلارعا دەر كەزىندە حابار بەرمەگەندەر جاۋاپكەرشىلىككە تارتىلاتىنىن جەتكىزدى.

«بۇگىنگى ماسەلەنىڭ شەشىمىن تاپتىق. باسشىلىققا مىندەتتى تۇردە جەتكىزەمىز. قىزمەتكەرلەرمەن جۇمىس جاساماعانداردى جازالۋ تۋرالى قاراستىرامىز. الداعى ۋاقىتتا ناتيجەمەن بولىسەمىز»، – دەدى شىمكەنت قالالىق قتج اق ماگيسترالدى جەلىسىنىڭ ديرەكتورى قايىرباي ورىنباەۆ.

ايتا كەتەيىك، بۇعان دەيىن جاڭاوزەندە  "كەزبي"  كومپانياسىنىڭ  600 شاقتى جۇمىسشىسى ەڭبەك جاعدايىن  جاقسارتۋدى، جالاقىنى ءوسىرۋدى تالاپ ەتىپ، جۇمىستارىن توقتاتقان بولاتىن.

Abai.kz