10 شىلدەدە قازاقستاندا رەسمي تىركەلمەگەن «El Tiregi» ساياسي پارتياسىنىڭ ۇيىمداستىرۋ كوميتەتىنىڭ مۇشەسى، تاجىك-اۋعان شەكاراسىنداعى اسكەري ءىس-قيمىلدارعا قاتىسقان جاۋىنگەرلەر وداعىنىڭ توراعاسى مۇرات مۇحامەدجانوۆتى اقتوبە پوليتسياسى تۇتقىندادى دەگەن اقپارات تارادى.

«El Tiregi-ءنىڭ» ليدەرى نۇرجان التاەۆ ءوزىنىڭ Facebook-تەگى پاراقشاسىندا:

«مۇرات مۇحامەدجانوۆ - رەسمي تىركەلمەگەن «El Tiregi» ساياسي پارتياسىنىڭ ۇيىمداستىرۋ كوميتەتىنىڭ ورىنباسارى، تاجىك-اۋعان شەكاراسىنداعى اسكەري ءىس-قيمىلدارعا قاتىسقان ارداگەرلەر وداعىنىڭ توراعاسى. ونى اقتوبە پوليتسياسى بۇگىن ۇستادى. ونى ۇستاۋ ءۇشىن ارنايى جاساق ارنايى وپەراتسيا جۇرگىزگەن. بۇل ساياسي رەپرەسسيا! ەرتەڭ ءبىرىنشى رەيسپەن اقتوبەگە ۇشامىن. ەگەر ەرتەڭ ونى بوساتپايتىن بولسا، حالىقتى جينايمىز. بيلىككە ايتارىم، «El Tiregi» پارتياسىنىڭ وكىلدەرى مەن قوعام بەلسەندىلەرىنە قىسىم جاساماڭدار! ءۇنسىز قالمايمىز»، - دەپ جازعان، 10 شىلدەدە.

ال 11 شىلدەدە: «دوستار، مۇحامەدجانوۆقا اكىمشىلىك ايىپ تاعىلىپ، 5 تاۋلىككە قامادى. ول ءوز كىناسىن مويىنداعان جوق. 5 تاۋلىك وتكەن سوڭ ول بوستاندىقا شىعادى»، - دەپ جازدى.

وبلىستىق پوليتسيا دەپارتامەنتى تاراتقان اقپاراتقا سۇيەنسەك، مۇرات مۇحامەدجانوۆ قالاداعى (اقتوبەدەگى) شەكاراشىلار ساياباعىندا ورنالاسقان مونۋمەنتتىڭ ماڭدايشاسىنداعى كسرو تۋىن جۇلىپ العان جانە ونى ۆيدەوعا ءتۇسىرىپ، الەۋمەتتىك جەلىگە تاراتقان.

جەلىدەگى ۆيدەودا مۇرات مۇحامەدجانوۆ:

«بۇل قازسسر گەربى. بۇل گەرب ءبىزدىڭ يدەولوگياعا قايشى. قالا اكىمى مەن وبلىس اكىمىنە ايتارىم، تەز ارادا مىناۋ باعانانى الىپ تاستاڭىزدار نەمەسە ونى قازاقستاننىڭ شەكاراسىنا ءتان تۇسكە قايتا بوياپ، قازاقستاننىڭ تۋى تۇستەس مونۋمەنت ورناتۋدى تالاپ ەتەمىن. قازاقستاننىڭ بارلىق وڭىرلەرى مۇنداي قىزىل يمپەريا قالدىقتارىنان ارىلۋى كەرەك.

قازاقستان پرەزيدەنتىنە ايتارىم، ەلتاڭبا توبەسىندەگى قىزىل جۇلدىزدى الىپ تاستاڭىز. وزدەرىڭىز، سوۆەت وداعى مەن پاتشا وكىمەتىنىڭ بودانى بولعانىمىزدى ايتاسىزدار، سويتە تۇرا، مىناۋ قىزىل جۇلدىز تاڭبا بوپ تۇر. بىزگە سوۆەتتىڭ جۇلدىزى، سوۆەتتىڭ وتكەن شاعى كەرەك ەمەس!»، - دەپ سويلەگەن.

اتالعان وقيعاعا بايلانىستى اقتوبە وبلىستىق پوليتسيا دەپارتامەنتى تۇسىنىكتەمە بەرىپتى. ولاردىڭ ايتۋىنشا، مۇرات مۇحامەدجانوۆ وسى ارەكەتى ارقىلى اسكەري قىزمەتشىلەردىڭ ار-نامىسىن قورلاعان-مىس.

«27 مامىردا ازامات مۇرات مۇحامەدجانوۆ اقتوبە قالاسى احتانوۆ كوشەسىندەگى شەكاراشىلار ساياباعىندا، وتان شەكاراسىن قورعاۋ جولىندا قازا تاپقان اسكەريلەردىڭ رۋحىنا قۇرمەتسىزدىك كورسەتىپ، مونۋمەتتەگى گەربتى جاريا تۇردە جۇلىپ تاستاعان. بۇنى ۆيدەوعا ءتۇسىرىپ، الەۋمەتتىك جەلىگە تاراتقان.

اتالعان مونۋمەنت وتاندى قورعاعان بارلىق شەكاراشى ساربازداردىڭ ەرلىگىن مىڭگى ۇلىقتايتىن ەسكەرتكىش جانە مەملەكەتتىك شەكارانىڭ قاسيەتتىلىگى مەن قول سۇعىلماۋشىلىعىنىڭ سيمۆولى بولىپ تابىلادى»، - دەپتى وبلىستىق پوليتسيا دەپارتامەنتى.

سونىمەن قاتار، وبلىستىق پوليتسيا دەپارتامەنتى مۇرات مۇحامەدجانوۆتىڭ تۇتقىندالۋىنىڭ ەشقانداي ساياسي استارى جوقتىعىن جانە ونى تۇتقىنداۋعا ەشقانداي ارنايى جاساق جۇمىلدىرىلماعانىن جازىپتى.

مۇحامەدجانوۆتى 10 شىلدەدە ۋچاسكەلىك پوليتسيا بيىلعى جىلدىڭ 27 مامىرىندا قۇقىق بۇزۋشىلىق جاساعانى ءۇشىن قالالىق پوليتسيا بولىمشەسىنە جەتكىزگەن. وندا قر اقبتك-ءنىڭ 434-بابى (ۇساق بۇزاقىلىق) بويىنشا اكىمشىلىك قۇقىق بۇزۋشىلىق تۋرالى حاتتاما تولتىرىلعان.

«ەشقانداي ارنايى جاساق جۇمىلدىرىلعان جوق. مۇحامەدجانوۆ پوليتسياعا قارسىلىق بىلدىرگەن جوق. اقتوبە قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ قاۋلىسىمەن مۇرات مۇحامەدجانوۆ قر اقبتك-ءنىڭ 434-بابى 1-بولىگى بويىنشا اكىمشىلىك جاۋاپكەرشىلىككە تارتىلىپ، 5 تاۋلىك مەرزىمگە اكىمشىلىك قاماۋعا الىنعان.

مۇحامەدجانوۆتى اكىمشىلىك جاۋاپكەرشىلىككە تارتۋدىڭ ونىڭ قوعامدىق-ساياسي قىزمەتىمەن بايلانىسى جوق»، - دەلىنگەن حابارلامادا.

بىرقاتار باق اتالعان وقيعانى (مۇحامەدجانوۆتىڭ تۇتقىندالۋىن) وىنڭ ساياسي ۇستانىمىمەن وتكەن ايداعى «El Tiregi-ءنىڭ» رۇقسات ەتىلمەگەن ميتينگكە شىعۋىمەن بايلانىستىرا جازىپتى. ءبىزدىڭ نازارىمىزدى بۇرعانى، اقتوبە پوليتسياسىنىڭ Instagram جەلىسىندەگى مىنا ءبىر تۇسىندىرمەسى بولىپ وتىر.

قازاقشا تۇسىندىرمەدە: «27 مامىردا ازامات مۇرات مۇحامەدجانوۆ اقتوبە قالاسىنداعى ت.احتانوۆ كوشەسىندەگى شەكاراشىلار ساياباعىندا قازا تاپقان اسكەري قىزمەتشىلەردىڭ ەسكەرتكىشتەرىن قورلاي وتىرىپ، مونۋمەنتتەن ەلتاڭبا بەلگىسىن جۇلىپ الدى. ول وسى ءىس-ارەكەتتەرىن بەينەجازباعا ءتۇسىرىپ، الەۋمەتتىك جەلىلەرگە جاريالاعان»، - دەپ جازىلعان.

ال ورىسشى اقپاراتتا: «27 مايا گراجدانين مۋرات مۋحامەدجانوۆ ۆ پاركە پوگرانيچنيكوۆ پو ۋليتسە احتانوۆا ۆ گورودە اكتوبە، پروياۆيۆ نەۋۆاجەنيە، وسكوربليايا پاميات ۆوەننوسلۋجاششيح پوگيبشيح زاششيششايا رۋبەجي رودينى، دەمونستراتيۆنو سورۆال س مونۋمەنتا گەرب. ۆسە ەتو ون سنيمال نا ۆيدەو ي ۆىلوجيل ۆ سوتسيالنىە سەتي»، - دەپ جازىلعان.

ياعني، «وتان شەكاراسىن قورعاۋ جولىندا قازا تاپقان اسكەريلەردىڭ رۋحىنا قۇرمەتسىزدىك كورسەتىپ، مونۋمەتتەگى گەربتى جاريا تۇردە جۇلىپ تاستاعان»، - دەپ جازىلعان.

ءتۇيىن. بيىل تاۋەلسىزدىك العانىمىزعا 30 جىل تولادى. بىراق سوندا دا قازاقستاندا كسرو-عا دەگەن «ساعىنىش» ازايماي كەلەدى. ونىڭ جارقىن مىسالى – كسرو-نىڭ ءارتۇرلى مەملەكەتتىك سيمۆوليكالارىنىڭ تاۋەلسىز قازاقستاننىڭ تورىندە ايدىك اسپەتتەلىپ، كەڭەستىڭ قان جۇققان قىزىل جالاۋىنىڭ جىل سايىن قازاق اسپانىندا جەلبىرەۋى. ونىڭ جارقىن مىسالى – كەشەگى اقتوبە پوليتسياسىنىڭ كەڭەستىك تاڭباعا دەگەن ەرەكشە «قۇرمەتى».

بىزدەگى سۇراق – بۇگىندە الەم كارتاسىندا جوق مەملەكەت – كسرو-نىڭ ەلتاڭباسىن جۇلىپ تاستاۋ – تاۋەلسىز قازاقستاننىڭ وتان قورعاۋ جولىندا قازا تاپقان شەكاراشى ساربازدارىنىڭ رۋحىنا قۇرمەتسىزدىك كورسەتۋ مە؟

Abai.kz