ويىڭداعى ءبىر ءسوزدى ءتۇسىندىرۋ ءۇشىن تىم ارىدەن باستاۋعا تۋرا كەلەدى، ەكى اۋىز سوزبەن قالايشا جەتكىزەرسىڭ. 1986 - 1993 جىلدار ارالىعىندا سايوتەس پوسەلكەلىك كەڭەسىنىڭ توراعاسى بولىپ جاسادىم. بۇل سسسر-دىڭ ىدىراۋ الدىنداعى قيىن كەزەڭدەر ەدى. اقشا كوز الدىمىزدا قۇنسىزدانىپ، ارتى گيپەرينفلياتسياعا ۇشىرادى. دۇكەندەردە كيىم-كەشەك بىلاي تۇرسىن، ازىق-تۇلىكتىڭ ءوزى تاپشى ەدى.

پوسەلكەنىڭ ەرەكشەلىگى - حالقى نەگىزىنەن لپدس (ساماراعا ايدالاتىن مۇنايدى قىزدىرۋ پەشى), تەمىر جولعا قاراستى مەكەمەلەردەن تۇردى. بۇلاردىڭ ارقايسىسىنىڭ ءوز دۇكەندەرى بار، تىزىممەن سولار كەلگەن ازىق-تۇلىكتى ءبولىپ بەرىپ وتىرادى. ودان بولەك ءۇشىنشى توپ بار - ولار كوبىنە جان-جاقتاعى سوۆحوزداردان پەنسياعا شىعىپ، ەندى وتىن-سۋى بار پوسەلكەگە كەلىپ ورنىققان شوپاندار، مەحانيزاتور، مۇعالىم، دارىگەر، كلۋب مەڭگەرۋشىسى، كىتاپحاناشى، ت.س.س.، ءبىر سوزبەن ايتقاندا توراعاعا قاراستى بىرقاۋىم حالىق. بۇلاردا دۇكەن جوق، ەشقايدان تاۋار كەلمەيدى، سوندىقتان جوعارىداعى دۇكەنى بارلاردان كەيدە كۇشپەن، كەيدە الداپ-سۋلاپ، جوعارىداعى باستىقتارىمەن ىمىراعا كەلىپ دەگەندەي... قامتىلىپ وتىراتىن. ءبىر سوزبەن ايتقاندا، ءبىز وسى جۇمىستارمەن تاڭەرتەڭنەن كەشكە شەيىن اينالىسۋمەن بولدىق. جاعدايى قيىن، كۇنەلتىسى تومەن تالايلاردىڭ ساۋابىن دا الدىق.

جارايدى، ەندى نەگىزگى ايتپاق ويىمىزعا كەلەيىك. قازىر وڭتۇستىكتەن قۇرمەت دەگەن بالامىز ماڭعىستاۋ ءۇشىن دەپ ءشوپ شاۋىپ، ەندى ونى ۆاگونمەن جەتكىزۋدى ۇيىمداستىرىپ جاتىر ەكەن. اقتوبە وبلىسىنان دا ماڭعىستاۋ ءۇشىن تەگىن ءشوپ كەلگەلى جاتىر دەيدى. ايتالىق، ماڭعىستاۋ اۋدانىنىڭ ورتالىعى شەتپەگە 5 ۆاگون ءشوپ كەلدى دەلىك. مۇنى بۇرىنعى 7 سوۆحوز، 2 پوسەلكە (بىرەۋى شەتپەنىڭ ءوزى), بارلىعى 9 اۋىلعا تەڭدەي ەتىپ كىم ءبولىپ بەرەدى؟ ءجارايدى، ءبولىپ بەردى دەلىك. سايوتەس پوسەلكەسى وزىنە بولىنگەن 5 ماشينا ءشوبىن تاسىپ الدى دەلىك (كىم تاسيدى - كولىكتىڭ ءبارى جەكەگە ءوتىپ كەتكەن، بۇرىنعىداي اتپ دەگەندەر جوق؟). ەندى اۋىلعا كەلگەن ءشوپتى ءبولۋ كەرەك. بىرەۋدىڭ ءۇيىر-ءۇيىر جىلقىسى، وتار-وتار قويى، سيىر-تۇيەسى بار، ەكىنشىسىندە ونشاقتى جاندىق قانا بار.

تاعى دا كۇشتىلەر مەن پىسىقتار العا ءتۇسىپ، السىزدەر شەتتەپ قالماي ما؟ قۇرمەت بالامىز سونشا ەڭبەكتەنگەندە سول ەڭبەگىن اقىرىندا ونسىز دا اقشاسى جەتكىلىكتى بىرەۋ پايدالانىپ كەتسە، بار ءشوپتى وپتوم ساتىپ السا ادىلدىك قايدا قالادى؟ سوندا ول نە ءۇشىن جۇمىستاندى؟ ءجاي تەك، وسىنداي جۇمىستاردان حابارىم بولعاندىقتان ايتىپ جاتقانىم، ايتپەسە مەنىڭ اقىلىم كىمگە كەرەك، پەنسيادا جاتقان ءبىر شال...

قۋانىش ەدىلحانتەگىنىڭ جازباسى

Abai.kz