قازاقسان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ ەل تاۋەلسىزدىگىنىڭ 30-جىلدىق قارساڭىندا ارنايى ماقالا جازىپ، ول ەل اۋماعىنا كەڭىنەن تارايتىن «ەگەمەن قازاقستان» گازەتىندە جاريالانعان ەدى.

تاۋەلسىزدىكتىڭ ماڭىزى مەن ۇعىمنىڭ تەرەڭدىگى، ونى قاستەرلەۋ مەن ازاتتىقتى دامىتۋعا قاجەت ادام بويىنداعى قاسيەتتەر جايلى دا ماقالادا كوپ ايتىلدى. قوعامنىڭ ۇنەمى دامۋ مەن ۇدەرىستە بولۋى ءۇشىن الدىمەن ۇنەمى ىزدەنىس قاجەت ەكەنى دە باسا ايتىلدى. سونىڭ ءبىرى سايلاۋ پروتسەسىن دامىتۋ، جىل سايىن ونىڭ جەتىلۋىنە جاعدايلار جاساۋ بولىپ تابىلادى. 25 شىلدە كۇنى اۋىل اكىمدەرىنىڭ تىكەلەي سايلاۋى وتەدى. بۇل باستامانى پرەزيدەنت قاسىم-جومارت توقاەۆ 2020 جىلعى 1 قىركۇيەكتەگى جولداۋىندا ۇسىنعان بولاتىن. ارتىنشا ونى ءوزىنىڭ ماقالاسىندا دا اتاپ ءوتتى. «قوعام دامۋ مەن وزگەرىس ءۇشىن ءوز شەشىمىن باتىل ءبىلدىرىپ، زاڭدى نەگىزدە تاڭداۋ جاساي الۋى ءتيىس» دەگەن ەدى.

سايلاۋ قارساڭىندا مەملەكەت باسشىسى ارنايى جازبا قالدىرىپ، حالىقتى سايلاۋدا بەلسەندى قاتىسۋعا شاقىردى. "25 شىلدە كۇنى قازاقستاندا العاش رەت اۋىل اكىمدەرىنىڭ تىكەلەي سايلاۋى وتەدى. بۇل وقيعا ساياسي جاڭعىرۋدىڭ جاڭا كەزەڭىن بىلدىرەدى. سايلاۋشىلاردى بەلسەندى داۋىس بەرۋگە شاقىرامىن. حالىقتىڭ مۇددەسى ءۇشىن بارلىق قاجەتتى وزگەرىستەردى جۇزەگە اسىرۋ كەرەك" دەپ جازدى مەملەكەت باسشىسى ءوز تۆيتتەر پاراقشاسىندا.

بيىل ەلىمىزدەگى اكىمدەر سايلاۋىندا 800 جۋىق اۋىل اكىمىن اۋىستىرۋ جوسپارلانىپ وتىر. سايلاۋ بارىنشا تارتىستى ءوتۋ ءۇشىن زاڭعا ارنايى وزگەرىستەر ەنگىزىلىپ، تاۋەلسىز باقىلاۋشىلار دا قاتىساتىن بولادى. سايلاۋ وتەتىن اۋىل حالقى ءوز تاڭداۋىن جاساپ، ەلدىڭ دامۋىنا، تاۋەلسىزدىكتىڭ نىعايۋىنا ءوز ۇلەسىن قوسپاق. 2025 جىلعا دەيىن ەلىمىزدەگى اۋىل اكىمدەرىن سايلاۋ جولى ارقىلى اۋىستىرۋ جوسپارلانىپ وتىر. ەلىمىزدە 2000-نان استام اۋىلدا سايلاۋ وتپەك. بيىلعى سايلاۋعا ەل بيۋدجەتىنەن 4.7 ملرد تەڭگە قارجى بولىنگەن ەدى. سايلاۋدىڭ ءساتتى ءوتۋى، ەل ساياساتىنىڭ دامۋىنا دا ۇلكەن ۇلەس بولماق.

Abai.kz