پرەمەر-مينيستر اسقار مامين ماڭعىستاۋ وبلىسىنا ارنايى جۇمىس ساپارىمەن بارىپ تۇرىپ، مالى قىرىلىپ، قۋاڭشىلىقتىڭ قيىندىعىن كورىپ وتىرعان شارۋالاردىڭ جاعدايىن كوزبەن كورمەي كەتتى،- دەپ جازدى Arasha.kz.

Primeminister.kz سايتىنداعى رەسمي مالىمەتتە شارۋالارمەن كەزدەسۋ تۋرالى اقپارات جوق.

«اقتوبە، باتىس قازاقستان جانە قوستاناي سەكىلدى كورشىلەس وبلىستاردان ءشوپ جەتكىزۋ جانە وتكىزۋ جولعا قويىلعان. 1200 توننادان استام ارپا اكەلىندى، ولار فەرمەرلەرگە نارىقتىق باعادان تومەن باعامەن ساتىلدى. قر ۇكىمەتى ماڭعىستاۋ وبلىسىندا مالدىڭ انالىق باسىنا ارنالعان ازىققا جۇمسالعان شىعىنداردى ءىشىنارا وتەۋگە 1,9 ملرد تەڭگە ءبولدى. پرەمەر-ءمينيستردىڭ تاپسىرماسى بويىنشا فەرمەرلىك شارۋاشىلىقتارعا قولجەتىمدى باعامەن كولەمى 114,7 مىڭ توننا دايىندالعان ءشوپتى ساتىپ الۋ جانە جەتكىزۋ ءۇشىن تۇراقتاندىرۋ قورىن قالىپتاستىرۋعا، سونداي-اق «ازىق-تۇلىك كەلىسىمشارت كورپوراتسياسى» ۇك» اق ارقىلى 56,3 مىڭ توننا جەم-ءشوپ (كەبەك) ساتىپ الۋعا قوسىمشا قاجەتتى قاراجات بولىنەدى»،- دەيدى رەسمي اقپاراتتا.

ءارى قاراي ەلىمىزدىڭ پرەمەر-ءمينيسترى اسقار مامين قۋاڭشىلىق جايلاعان وڭىردە قازاقستانداعى العاشقى TETYSBLU پاركىنىڭ اشىلۋ راسىمىنە قاتىسقان. وبلىس اكىمى شارۋاسىن جەم-شوپپەن قامتاماسىز ەتە الماسا دا، پرەمەر كەلەدى دەپ وندا ورتالىق ازيادا تەڭدەسى جوق اتتراكتسيوندار – BluPower, Watermania, Snorri, سونداي-اق 30-دان استام بىرەگەي اتتراكتسيوننىڭ اشىلۋىنا دايىندالىپ قويعان. ءارى قاراي مامين گولف كلۋبى مەن برەند قوناق ۇيلەردىڭ قۇرىلىسىمەن تانىسقان.

پرەمەر-مينيستر جوسپارلانعان نىسانداردىڭ، سونداي-اق كولىك جانە ينجەنەرلىك-كوممۋنيكاتسيالىق ينفراقۇرىلىمنىڭ قۇرىلىسىن ۋاقىتىلى اياقتاۋدى قامتاماسىز ەتۋدى تاپسىردى. پرەمەر-مينيسترگە وڭىردەگى بالىق شارۋاشىلىعىن دامىتۋ، ونىڭ ىشىندە بەكىرە تۇقىمداس بالىق تۇرلەرىن ءوسىرۋ زاۋىتى قۇرىلىسىنىڭ پەرسپەكتيۆالىق جوبالارى، كاسپي تەڭىزىندە بالىق اۋلاۋدى ۇيىمداستىرۋ تۋرالى باياندالدى. سونىمەن قاتار ا. مامين بالىق جەمىن ءوندىرۋ جانە وتىرعىزۋ ماتەريالىن وندىرۋگە ارنالعان ينكۋباتسيالىق تسەحتى قۇرۋدى قوسا العاندا، جىلىنا 30 مىڭ تونناعا دەيىن بالىق ءوسىرۋ جانە قايتا وڭدەۋ بويىنشا زاماناۋي تەحنولوگيالاردى ەنگىزە وتىرىپ، «ءىنجۋ مارجان» شىعاناعىندا بالىق ءوسىرۋ كەشەنىن قۇرۋ جوباسىمەن تانىستى.

P.S. قازاقستان پرەزيدەنتى قاسىم-جومارت توقاەۆ ۇكىمەتكە ەلدەگى جاعدايدى قالىپقا كەلتىرۋ ءۇشىن ءبىر اي ۋاقىت بەردى. ال ارنايى ىسساپارمەن قۋاڭشىلىقتا وتىرعان وڭىرگە بارعان اسقار مامان جانىن شۇبەرەككە ءتۇيىپ وتىرعان شارۋالارمەن كەزدەسپەي، گولف پەن قوناق ۇيلەردى ارالاپ كەتتى. ۇكىمەتكە سەنۋدەن قالعان ەل ءبىر ايدان كەيىن جاعدايدىڭ تۇزەلەتىنىنە كۇمانمەن قارايدى.

Abai.kz