تاۋەلسىزدىك جىلدارى حالىق ءبىرىنشى رەت اۋىل اكىمدەرىن سايلاۋعا قول جەتكىزدى
بۇگىن ەلىمىزدە اۋىل اكىمدەرىن سايلاۋ باستالدى. وسىناۋ ساياسي ناۋقانعا بايلانىستى ءماجىلىس دەپۋتاتى ەرلان سايروۆ پىكىرىن ءبىلدىردى.
بۇگىن قازاقستاننىڭ ساياسي تاريحىندا ءمانى زور، ماعىناسى تەرەڭ ءىس-شارا بولىپ جاتىر. ساياسي ارەنادا ءبىرىنشى رەت اۋداندىق دەڭگەيدەگى اۋىل، كەنت، قالا اكىمدەرىنىڭ تىكەلەي سايلاۋى وتۋدە.
- رەسپۋبليكانىڭ 14 وبلىسىنىڭ 176 اۋدانىندا 730 اۋىل اكىمى سايلانۋدا، جىلدىڭ اياعىنا دەيىن 775 اكىم سايلانادى دەپ كۇتىلىپ وتىر، - دەپ جازدى ول.
سايروۆ بۇل قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ساياسي رەفورمالارىنىڭ پراكتيكالىق كورىنىسى ەكەنىن اتاپ ءوتتى.
ەلىمىزدە بىرتە-بىرتە، ەۆوليۋتسيالىق جولمەن قوعامدىق-ساياسي وزگەرىستەر بولىپ جاتىر.
- رەسپۋبليكا بويىنشا سايلاعا قاتىسۋ ءۇشىن 2 582 ادام كانديدات رەتىندە ۇسىنىلىپ، 2 297 تىركەۋدەن ءوتتى. سايلاۋعا ەلىمىزدە تىركەلگەن بارلىق پارتيا قاتىسىپ جاتىر، - دەدى ەرلان سايروۆ.
ايتۋىنشا، 878 (38,2%) ۇمىتكەردى پارتيالار ۇسىنعان. ال قالعان كانديداتتاردىڭ باسىم كوپشىلىگى، ياعني 1 419 (61,8%) ءوزىن-ءوزى ۇسىنۋشىلار. ياعني ازاماتتار بۇل سايلاۋدى ءوزىنىڭ ازاماتتىق پوزيتسياسىن بىلدىرۋگە ناقتى مۇمكىندىك ەكەندىگىن ءتۇسىنىپ وتىرعانىن ايتتى.
قوعامدىق-ساياسي رەفورمالار ايماقتاردا ءوتۋى ءتيىس، ويتكەنى قازاقستان ايماقتاردان تۇرادى.
- مەملەكەت باسشىسى قاسىم-جومارت توقاەۆ اتاپ وتكەندەي، «اۋىل اكىمدەرىنىڭ سايلاۋى بىزدەگى دەموكراتيانى دامىتۋداعى ماڭىزدى قادام». بۇل رەفورمالار مەملەكەت اپپاراتىنىڭ اۋدان، اۋىل دەڭگەيىندەگى جاۋاپكەرشىلىكتى جىكتەۋدى جۇيەلەۋى ءتيىس. بۇل قادام ازاماتتاردىڭ، قوعامنىڭ ساياسي مادەنيەتىن ارتتىرا وتىرىپ، ەلىمىزدە ساياسي پليۋراليزم پرينتسيپتەرىن ارتتىرۋعا سەپتىگىن تيگىزەرى ءسوزسىز، - دەپ اتاپ ءوتتى دەپۋتات.
ەرلان سايروۆتىڭ ايتۋىنشا، باتىس الەمىنىڭ قارىشتى دامۋىنىڭ باستى تريگگەرىنىڭ ءبىرى جەرگىلىكتى ءوزىن-ءوزى باسقارۋ پرينتسيپتەرى ەكەندىگى بەلگىلى.
- بۇل سايلاۋ - قازاقستاندا وسى ءوزىن-ءوزى باسقارۋ پرينتسيپتەرىنىڭ العىشارتى. سونىمەن بىرگە تاۋەلسىزدىك جىلدارى حالىق ءبىرىنشى رەت، جاپپاي، وزدەرىنىڭ اكىمدەرىن تىكەلەي سايلاپ الۋعا قولى جەتىپ وتىر. وتە ۇلكەن پروگرەسسيۆتى قادام. ءبىزدىڭ كوزىمىزشە تاريحي وقيعا ورىن الىپ جاتىر، - دەپ تولىقتىردى ول.
Abai.kz
