قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باستىعى جانداربەك بەكشين مەملەكەت باسشىسىنىڭ وقۋشىلاردىڭ وفلاين رەجيمىندە وقۋى كەرەك دەگەن تاپسىرماسىن ورىنداۋ باعىتىندا اتقارىلىپ جاتقان جۇمىستار تۋرالى ايتتى. 

بەكشيننىڭ سوزىنشە، Ashyq جوباسى مەگاپوليستىڭ بارلىق مەكتەپتەرىنە ەنگىزىلىپ جاتىر. بۇل جۇقتىرعان كۆي نەمەسە كۆي-مەن اۋىراتىن ناۋقاستارمەن بايلانىستا بولعانداردىڭ وقۋ ورىندارىنا كىرۋىنە جول بەرمەۋ ءۇشىن جاسالادى. بۇگىنگى كۇنى، “اتامەكەن” پالاتاسىنىڭ مالىمەتى بويىنشا، مەكتەپتەر مەن مەكتەپكە دەيىنگى مەكەمەلەردىڭ 100% QR كود الدى جانە 1 قىركۇيەكتەن باستاپ اشىق قوسىمشاسى جاعدايىندا جۇمىس جاساۋعا دايىن.

ەكىنشى قورعانىس جەلىسى – وقۋشىلار جينالاتىن جەرلەردە – اسحانالاردا، جۋىناتىن بولمەلەردە رەتسيركۋلياتورلاردى ەنگىزۋ. ءبىز بۇل ماسەلەنى مەكتەپ اكىمشىلىگىمەن قاراستىرىپ جاتىرمىز جانە ونى اتا -انالار كوميتەتىمەن تالقىلايتىن بولامىز.

ءۇشىنشى جول – سىنىپتاردا اۋانى تازارتاتىن زارارسىزداندىرۋ قۇرالدارىن ورناتۋعا بولادى. بۇل – جاپوندىق يننوۆاتسيالىق قۇرىلعىلار.

ولار قازاقستانعا الدىرىلدى. زارارسىزداندىرۋ قۇرالى دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق باقىلاۋ كوميتەتىمەن سەرتيفيكاتتالعان، سىنالعان جانە تىركەلگەن. ەگەر بۇل باعدارلاما بەكىتىلسە، ءبىز ونى جۇزەگە اسىرامىز، – دەدى الماتى قالاسىنىڭ باس سانيتارلىق دارىگەرى.

ول ءوز ۆەدومستۆا جۇمىسى قالادا وقۋشىلاردىڭ قاۋىپسىز ءبىلىم الۋىن قامتاماسىز ەتۋگە ەرەكشە باسىمدىق بەرەتىنىن اتاپ ءوتتى.

ءبىز بالالارىمىزدىڭ قاۋىپسىز ورتادا وقۋىن قامتاماسىز ەتۋ ءۇشىن مۇقيات دايىندالىپ جاتىرمىز. ءبىز ولاردى بيىل وفلاين رەجيمدە ءبىلىم الۋىن قامتاماسىز ەتۋىمىز كەرەك. ءبىر جىلدان بەرى بالالار قاشىقتان وقىپ جاتىر، بۇل، ارينە، ءبىلىم ساپاسىنا اسەر ەتەدى، – دەپ قوستى بەكشين.

ستۋدەنتتەردىڭ جايىنا كەلەتىن بولساق، الماتى قالالىق سەبد باسشىسى قالانىڭ جوعارى وقۋ ورىندارى مەن كوللەدجدەرىندە ۇستازدار قاۋىمىن ۆاكتسينالاۋ جوعارى دەڭگەيدە وتەتىنىن باسا ايتتى.

سونىمەن قاتار جوعارى جانە ورتا ارناۋلى وقۋ ورىندارىنا Ashyq جۇيەسىن ەنگىزۋ تۋرالى ماسەلە كوتەرىلەدى. بەكشين ستۋدەنتتەر اراسىندا ۆاكتسيناتسيا بويىنشا ءتۇسىندىرۋ جۇمىستارى جۇرگىزىلىپ جاتقانىن اتاپ ءوتتى.

ستۋدەنتتەر دە ونلاين وقۋدان شارشادى. بىراق ولاردى تولىقتاي قامتاماسىز ەتۋ ءۇشىن بارلىق تالاپتاردى ورىنداپ، مەكتەپتەردە عانا ەمەس، قالانىڭ كوللەدجدەرى مەن جوعارى وقۋ ورىندارىندا دا قاۋىپسىز وقۋعا جاعداي جاساۋ قاجەت، – دەدى الماتى قالاسىنىڭ باس سانيتارلىق دارىگەرى.

Abai.kz