ەلىمىزدە ءدىني ەكسترەميزمگە قارسى كۇرەس قارقىندى تۇردە جۇرۋدە. مەملەكەتتىك بيلىك ارنايى انتيتەررورلىق توپتاردى قۇرىپ، قوعامنىڭ بارلىق سالاسى مەن ساتىسىندا راديكالدىق كوزقاراستىڭ دامۋىنا، ناسيحاتتالۋىنا قارسى جۇمىس جاساۋدا. اسىرەسە الەۋمەتتىك جەلىنى باقىلاۋعا الۋ، ونداعى ءدىني لاڭكەستىككە شاقىرۋدى بۇعاتتاۋ، دەر كەزىندە جۇمىس ىستەۋ ماڭىزدى بولىپ تابىلادى. سەبەبى تاياۋ شىعىستاعى تەررورلىق توپتارعا بارىپ قوسىلعانداردىڭ بارلىعى دەرلىك الەۋمەتتىك جەلى ارقىلى ۇگىت-ناسيحاتقا ۇشىراپ، سول ارقىلى ءدىني ەكسترەميزمنىڭ قۇرىعىنا ءتۇسىپ قالعاندار. سوندىقتان جەلىدەگى ءتۇرلى پاراقشالاردى، قاۋىمداستىقتار مەن جازىلعان جازبالاردى قاراپ وتىرۋ ماڭىزدى. زاڭ بۇزۋشىلىق بايقالعان ساتتە، ونىڭ بىردەن قولعا الىپ، زاڭ اياسىندا رەتتەۋ ىسكە اسادى.

مىسالى پەتروپاۆل قالاسىنىڭ 42 جاستاعى تۇرعىنى Facebook-تەگى پاراقشاسىندا ءدىني ارازدىقتى قوزدىرۋعا باعىتتالعان ارانداتۋشىلىق ماتەريالدار جاريالاعانى انىقتالدى. ەر ادامعا 100 اەك كولەمىندە ايىپپۇل سالىنىپ، زاڭ اياسىندا جازاسىن الدى. سولتۇستىك قازاقستان وبلىسىنىڭ پوليتسياسىندا تۇسىندىرىلگەندەي، 42 جاستاعى پەتروپاۆل تۇرعىنىنىڭ Facebook-تەگى پاراقشاسىندا ءدىني مازمۇنداعى بەينەلەر جاريالانعان.

«تەكسەرۋ كەزىندە ەر ادامنىڭ دەسترۋكتيۆتى ءدىني اعىمنىڭ جاقتاۋشىسى ەكەنى انىقتالدى. ول الەۋمەتتىك جەلىدە ءدىني ساراپتامانىڭ قورىتىندىسى بويىنشا قازاقستان اۋماعىندا ساقتاۋعا جانە تاراتۋعا تىيىم سالىنعان بەينەماتەريالداردى ورنالاستىردى، سەبەبى ولار ءدىني ارازدىقتى قوزدىرۋعا باعىتتالعان. شىلدەنىڭ باسىندا پەتروپاۆل قالاسىنىڭ مامانداندىرىلعان اكىمشىلىك سوتى ەر ادامدى قازاقستان رەسپۋبليكاسىنىڭ اقبتك -ءنىڭ 453 -بابىنىڭ 4 -بولىگىمەن كىنالى دەپ تانىدى»، - دەپ حابارلايدى سولتۇستىك قازاقستان پوليتسيا دەپارتامەنتىنىڭ ءباسپاسوز قىزمەتى.

سوتتىڭ شەشىمىمەن جەككورۋشىلىكتى قوزدىرۋعا باعىتتالعان ماتەريالداردى ساقتاعانى ءۇشىن 290 مىڭ تەڭگەدەن اساتىن 100 ايلىق ەسەپتىك كورسەتكىش مولشەرىندە ايىپپۇل قولدانۋ تۋرالى شەشىم قابىلداندى.

«106 بەينە فايل مەن 7 سۋرەت تاركىلەندى، Facebook پاراقشاسى جويىلدى. ەستەرىڭىزگە سالا كەتەيىك: قازاقستان رەسپۋبليكاسىنىڭ زاڭناماسى ادامنىڭ ءدىني سەنىمىنە، دىنگە قاتىناسىنا، ءدىني سەزىمدەردى قورلاۋىنا بايلانىستى قۇقىقتارىنا، بوستاندىقتارى مەن زاڭدى مۇددەلەرىنە قول سۇعۋعا تىيىم سالادى»، - دەپ تۇسىندىرەدى پوليتسيا بريفينگ بارىسىندا.

ەلىمىزدە ەكسترەميزمدى ناسيحاتتاۋ زاڭمەن قۋدالانىپ، قىلمىستىق جاۋاپكەرشىلىككە تارتۋعا اكەلەتىنىن ەسكەرتەمىز. ويتكەنى ءدىني ەكسترەميزم ەل تۇتاستىعى مەن تىنىشتىعىنا تىكەلەي قاۋىپ توندىرەتىن قاتەر بولىپ تابىلادى.

Abai.kz