بۇگىن مەملەكەت باسشىسىنىڭ قاۋلىسىمەن قۇرىلعان قازاقستان رەسپۋبليكاسىنىڭ پرەزيدەنتى جانىنداعى رەفورمالار جونىندەگى جوعارى كەڭەس كەزەكتى وتىرىسىن وتكىزدى. كەڭەستە قاراستىرىلعان نەگىزگى ماسەلە – ۇلتتىق جوبالاردىڭ ازىرلەنۋى تۋرالى بولدى.

جيىن بارىسىندا مەملەكەت باسشىسىنا ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ ۇكىمەت پەن اگەنتتىك بىرلەسە ازىرلەگەن ون ۇلتتىق جوبانى تانىستىردى. اتالعان جوبالار 2025 جىلعا دەيىنگى ۇلتتىق دامۋ جوسپارى مەن جالپىۇلتتىق باسىمدىقتاردى ىسكە اسىرۋعا نەگىزدەلگەن.

ودان سوڭ، پرەزيدەنت كەلىمبەتوۆتىڭ جوباسى مەن كەڭەس مۇشەلەرىنىڭ پىكىرىن تىڭداعان سوڭ، بىرنەشە ۇسىنىستى ورتاعا سالدى. پرەزيدەنتتىڭ ايتۋىنشا، ۇكىمەت حالىقتىڭ تۇرمىسىن جاقسارتۋعا باعىتتالعان شىنايى ءارى ناقتى مىندەتتەردى شەشۋى ءتيىس.

- ۇلتتىق جوبالاردىڭ ازىرلەنۋى مەن ونىڭ ورىندالۋى ارتىق تەوريالاندىرۋدى ەمەس، پراگماتيكالىق تۇرعىدا بولۋى ءتيىس. سوندىقتان، ۇلتتىق جوبالاردىڭ ازىرلەنۋى تۋرالى جۇمىستاردىڭ ماقسات-مىندەتتەرى دە بىرىڭعاي تۇسىنىكتى بولۋى كەرەك. سەبەبى، ءبىزدىڭ شىن مانىندەگى ماقساتىمىز – بورىكتى اسپانعا اتاتىنداي قۋانىشتى ەمەس. سوندىقتان، بۇل رەفورمالار جونىندەگى جوعارى كەڭەس “قياليلاردىڭ كلۋبىنا” اينالماۋى كەرەك. ويتكەنى، كابينەتتىڭ سىرتىنداعى ءومىر باسقاشا، كۇردەلى باعىتتا دامىپ جاتىر,- دەدى پرەزيدەنت.

سونىمەن قاتار، مەملەكەت باسشىسى وسى جوبانىڭ نەگىزىندە قازىر ەڭ قاجەتتى ماسەلەنى شەشۋگە شەشىم قابىلدانۋى ءتيىس ەكەندىگىن العا تارتتى.

- ءبىز قازىر الدىمەن ەڭ قاجەتتى دەگەن ازىق-تۇلىك باعاسىنىڭ شارىقتاۋى ماسەلەسىن جانە جالپى ينفلياتسيانىڭ وسۋىنە قاتىستى ناقتى شەشىم قابىلداۋعا ءتيىسپىز. ودان بولەك، حالىقتىڭ كۇندەلىكتى تۇرمىس-تىرشىلىگىنە قاتىستى شەشىلمەگەن ماسەلە شاش ەتەكتەن. ماسەلەن، ەلىمىزدە بولىپ جاتقان قۋاڭشىلىق ماسەلەسى مال شارۋشالىعىنا كەرى اسەرىن تيگىزىپ وتىر. سوندىقتان ءبىز بولىپ جاتقان ماسەلەلەرگە شىنايى قارايىق. بۇل جەردەگى ءبىزدىڭ مىندەت – الدىمىزدا تۇرعان وسى ماسەلەردىڭ شەشىمىن تابۋ ءۇشىن ۇيلەسىمدى جۇمىس ىستەۋگە ءتيىسپىز,- دەدى مەملەكەت باسشىسى.

الايدا بۇل جوبالاردىڭ ىسكە اسۋىندا جەمقورلىق ماسەلەسى العا شىعاتىنى دا جاسىرىن ەمەس. بۇل جونىندە پرەزيدەنت تە الدىن-الا ەسكەرتىپ، ستراتەگيالىق جوسپارلاۋ جانە رەفورمالار جونىندەگى اگەنتتىككە مۇقيات بولۋدى تاپسىردى.

- مول قارجى تۋرالى اقپارات شىقسا، مۇنداي جوبالاردى ءجىتى باقىلاپ وتىرعان “اككى اڭشىلاردىڭ” بار ەكەنىن دە ەسكەرۋگە ءتيىسپىز. بۇل اسىرەسە ءىرى جوبالاردى جۇزەگە اسىرۋ مەن ينفراقۇرىلىمدىق قۇرىلىس سالاسىنا قاتىستى. مۇندايدا بولىنگەن قارجىنى تالان-تاراجعا سالاتىندا تابىلادى. بۇل بارىنە بەلگىلى جاعداي. سوندىقتان ۇكىمەت پەن ءتيىستى اگەنتتىك وسى ماسەلەنى مۇقيات قاراۋى ءتيىس. ۇلتتىق جوبالاردىڭ جۇزەگە اسۋى ەڭ ءبىرىنشى حالىقتىڭ ءال-اۋقاتىن ارتتىرۋعا باعىتتالۋى كەرەك،- دەدى پرەزيدەنت.

قورىتىندىلاي كەلە مەملەكەت باسشىسى ۇكىمەت پەن ستراتەگيالىق جوسپارلاۋ جانە رەفورمالار جونىندەگى اگەنتتىككە الداعى تامىز ايىنىڭ 15 ىنە دەيىن ۇلتتىق جوبالاردىڭ ناقتى ءارى قارجىلاي قامتاماسىز ەتىلگەن نۇسقاسىن ەنگىزۋدى تاپسىردى.

Abai.kz