قازاقستاندا 178,3 مىڭ گەكتاردا نەمەسە 1,1%-ىندا ەگىستىك جەرلەر جويىلعان. بۇل تۋرالى ۇكىمەت وتىرىسىندا اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەەۆ مالىمدەدى.

«13,2 ملن گەكتاردا نەمەسە ءداندى داقىلداردىڭ جالپى ەگىس كولەمىنىڭ 85,2%-ىندا جاقسى جانە قاناعاتتانارلىق كۇيدە; 2,1 ملن گەكتاردا نەمەسە 13,7%-ىندا ناشار كۇيدە; 178,3 مىڭ گەكتاردا نەمەسە 1,1%-ىندا ەگىستەر جويىلعان»,- دەدى قاراشوكەەۆ.

ونىڭ ايتۋىنشا، ەگىستىكتەردىڭ ناشارلاۋ تەندەنتسياسى بۇكىل الەمنىڭ استىق ەگەتىن كوپتەگەن ەلدەرىنە اسەر ەتكەن.

«ماسەلەن، كانادادا بيدايدىڭ جالپى ءتۇسىمى وتكەن جىلمەن سالىستىرعاندا 31,6%-عا،  امەريكا قۇراما شتاتتارىندا 4,4%-عا،  كورشىلەس رەسەي فەدەراتسياسىندا 15%-عا تومەندەۋى بولجانۋدا»،- دەيدى م.م.ا.

قاراشوكەەۆتىڭ ايتۋىنشا، بيىل استىقتىڭ جالپى جينالىمىنىڭ بولجامدى كولەمى 15,3 ملن توننا دەڭگەيىندە بولادى دەپ كۇتىلۋدە. بۇدان باسقا، رەسپۋبليكادا 3,5 ملن توننا كولەمىندە اۋىسپالى استىق قالدىعى بار.

Abai.kz