پرەزيدەنت قاسىم-جومارت توقاەۆ اۋعانداعى ەتنيكالىق قازاقتارعا كومەك كورسەتۋدى تاپسىرىپتى. بۇل تۋرالى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەگەن.

«اۋعانستانداعى ەتنيكالىق قازاقتاردىڭ وتىنىشتەرىنە بايلانىستى پرەزيدەنت توقاەۆ سىرتقى ىستەر مينيسترلىگىنە ولاردىڭ قاۋىپسىزدىگىن قامتاماسىز ەتۋمەن، قاجەت بولعان جاعدايدا تاريحي وتانىنا قايتارۋ ماسەلەسى بويىنشا بارىنشا كومەك كورسەتۋدى تاپسىردى»، - دەدى ايبەك سمادياروۆ.

ءسىم وكىلىنىڭ ايتۋىنشا، قازىر اۋعان جەرىندە 200-گە تارتا ەتنيكالىق قازاق تۇرادى ەكەن. ال سوڭعى كۇندەرى اۋعانستانداعى قازاقستان ەلشىلىگىنە كەلىپ، وزدەرىن قازاقپىز دەپ تانىستىراتىنداردىڭ سانى كوبەيىپ كەتكەنىن ايتىپتى.

«بىزدە بار مالىمەتتەرگە سايكەس، اۋعانستان اۋماعىندا 15-كە جۋىق ەتنيكالىق قازاق وتباسى تۇرادى. ناقتىراق ايتساق، 200-گە جۋىق ەتنيكالىق قازاق. كەيبىر باق اۋعانستاندا بىرنەشە مىڭ ەتنيكالىق قازاقتاردىڭ تۇراتىنى تۋرالى تەكسەرىلمەگەن اقپارات تاراتتى. بۇل شىندىققا سايكەس كەلمەيدى. وسىعان بايلانىستى اقپاراتتى مۇقيات قايتا تەكسەرۋدى جانە قاجەتسىز دۇرلىكتىرمەۋدى سۇرايمىز. ءبىز ءتيىستى جۇمىس جۇرگىزىپ جاتىرمىز جانە اۋعانستانداعى قازاقتارمەن تۇراقتى بايلانىستامىز»، - دەيدى سمادياروۆ.

وسىعان دەيىن، «ازاتتىق» سايتى اۋعانستانداعى ەتنيكالىق قازاقپەن سۇحبات جاساعان. وندا سپيكەر: «اۋعانستاندا تالىپتەردىڭ قولىندا قالدىق. قۇندىزدا ون بەستەي عانا قازاق وتباسى بار. ءبارىمىز ۇرەيلەنىپ وتىرمىز. وزبەكشە سويلەيمىز، قازاق ءتىلىن ۇمىتتىق. تالىپتەر ۇرادى، سوعادى. «قازاق بولساڭ اۋعانستاننان كەت. بۇل جەردە نە شارۋاڭ بار»، - دەيدى. اۋعانستاندا قىمباتشىلىق. كۇنىمىزدى ارەڭ كورىپ وتىرمىز», - دەپ، قازاقستان ۇكىمەتىنەن كومەك سۇراعان.

ونىمەن قوسا، الەۋمەتتىك جەلىدە قازاقستان ۇكىمەتىنەن كومەك سۇراپ، اۋعانستاننان شىعارىپ الۋدى وتىنگەن بىرنەشە ادامنىڭ بەينە جازباسى تارادى. سولاردىڭ ءبىرى مىنە:

ال بۇگىن قر قورعانىس مينيسترلىگى اۋعان جەرىنەن 42 ادامدى ەۆاكۋاتسيالاپ اكەلگەنىن مالىمدەدى. مينيسترلىكتىڭ اسكەري-كولىك ۇشاعى الماتىعا بۇگىن 17:00-دە كەلىپ قونعان. جالپى سانى – 42 ادام. ونىڭ 25-ءى قازاقستان ازاماتتارى. 15 ەرەسەك ادام جانە 10 بالا مەن قر ەلشىلىگىنىڭ قىزمەتكەرلەرى.

بۇعان دەيىن قىرعىزستان اۋعانداعى 15 قىرعىز ازاماتىن ەۆاكۋاتسيالاۋعا كومەك سۇراعان. قىرعىز تاراپىنىڭ ءوتىنىشى بويىنشا 14 ادام، ودان بولەك، تاعى ءبىر رەسەي ازاماتى مەن ءبىر ليتۆا ازاماتى دا قر قورعانىس مينيسترلىگىنىڭ ۇشاعىمەن اير اۋماعىنان شىققان.

ايتا كەتەيىك، 15 تامىزدا «تاليبان» سودىرلارى (قازاقستاندا جوعارعى سوتتىڭ شەشىمى بويىنشا قوزعالىسقا تىيىم سالىنعان) كابۋلعا كىرىپ، ەلدە بيلىكتى ءوز قولىنا العانىن جاريالادى. ۇكىمەتتىڭ ءبىر بولىگى مەن پرەزيدەنت اشراف عاني اۋعانستاننان كەتتى.

Abai.kz