اۋعانستانداعى سيكح پەن ءۇندى ازشىلىقتارىنىڭ قاۋىپسىزدىگى مەن بولاشاعى تۋرالى بەلگىسىزدىك جالعاسىپ جاتقان كەزدە، اۋعاندىق سيكح قاۋىمداستىعى 16 تامىزدا كابۋلدا تاليبان وكىلدەرىمەن كەزدەستى. بۇل تۋرالى Indian Express ارنايى حابارلاما تاراتتى. 

كەزدەسۋدەن كەيىن سيكح قاۋىمداستىعىنىڭ وكىلدەرى تالىبتەردىڭ ولارعا "بەيبىتشىلىك پەن قاۋىپسىزدىككە" كەپىلدىك بەرگەنىن ايتتى.

كابۋلداعى "كارتە پارۆان گۋردۆارا" (سيكح حرامى) پرەزيدەنتى گۋرنام سينگح The Indian Express-كە تەلەفونمەن حابارلاسىپ، تاليبان بيلىكتى ءوز قولىنا العاننان بەرى 300-گە جۋىق ادامنىڭ "كارتە پارۆان گۋردۆاراسىنا" پانا ىزدەپ كەلىپ، جاسىرىنعانىن ايتقان.

"گۋردۆاردا تاليبان وكىلدەرىمەن وتكەن كەزدەسۋدە سيكح پەن ءۇندى ازشىلىقتارىنىڭ قاۋىپسىزدىگى مەن تىنىشتىعىنا كەپىلدىك بەرىلدى. تاليبان قاۋىمداستىقتار ەلدەن كەتۋدىڭ قاجەتى جوق، ولار وسىندا بەيبىت ءومىر ءسۇرۋدى جالعاستىرا الادى جانە ءوز ءدىنىن ۇستانا الادى، ءدىني راسىمدەرگە ەشقانداي كەدەرگى بولمايدى دەدى. ولار بىزگە قانداي دا ءبىر ماسەلەلەر تۋىنداعان جاعدايدا حابارلاسا الاتىن ءنومىر بەردى", - دەدى گۋرنام سينگح.

ول دجالالاباد پەن گازنيدە تۇراتىن سيكح پەن ءۇندى وتباسىلارى دا كابۋلعا كەلگەنىن جانە ولاردىڭ بارلىعى قازىر كابۋلداعى ەكى گۋردۆاردى پانالاعانىن ايتتى.

بۇل ەلدە ءبىر كەزدەرى 100000-نان استام سيكح پەن ۇندىلەر مەكەندەگەن. 1992 جىلى مودجاحەدتەر بيلىككە كەلگەننەن كەيىن بۇل ازشىلىقتاردىڭ اۋعانستاننان جاپپاي كەتۋى ورىن الدى. الايدا، سيكحتەر مەن ۇندىلەردىڭ اۋعانستاننان كەتۋىنىڭ سوڭعى سەبەپتەرى 2018 جانە 2020 جىلدارى بولعان قاندى شابۋىلدار ەدى. ەكى شابۋىلدان 44 ءۇندى قازا تاپقان بولاتىن.

الايدا، تاليباننىڭ جاڭا كەپىلدىكتەرىنە قاراماستان، سيكح پەن يندۋيزم قاۋىمداستىعىنىڭ جەرگىلىكتى مۇشەلەرى ەلدەن كەتۋگە دايىن. سەبەبى تالىبتەر ءۇندى ايەلدەرىنىڭ يسلام شارتتارىنا ساي كيىنۋ كەرەكتىگىن ايتىپ وتىر.

ەكى قاۋىمداستىق تا مۇمكىندىگىنشە تەزىرەك كەتۋگە مۇمكىندىك ىزدەيتىنىن ايتادى. ولار ءۇندىستان، كانادا، اقش نەمەسە وزگە ەلگە قونىس اۋدارۋعا دايىن.

"ەندى ءبىز تاليباننىڭ بۇرىنعى بيلىگى كەزىندەگى قايعىلى وقيعالاردى ەسكە العىمىز كەلمەيدى، سەبەبى بۇل بىزگە قيىندىق تۋدىرۋى مۇمكىن. ءبىز بۇل جولى تاليبان ۋادەلەرىن ورىندايدى دەپ ۇمىتتەنەمىز. بىراق سيكح پەن .ءۇندى وتباسىلارىنىڭ كوپشىلىگى كەتۋگە دايىن. ءبىزدىڭ جۇگىمىز جيناۋلى. ءبىز ءۇندىستاننىڭ نەمەسە باسقا ەلدىڭ ءبىزدى ەۆاكۋاتسيالاۋىن كۇتىپ وتىرمىز", - دەدى cيكح وكىلى.

تاليبان 21 تامىزدا ءۇندىستان اسكەري-اۋە كۇشتەرىنىڭ (IAF) ۇشاعىنا وتىرۋعا اتتانعان 72 اۋعاندىق سيكح پەن ءۇندىنىڭ، ونىڭ ىشىندە ەكى اۋعاندىق  دەپۋتات ناريندەر سينگح حالسا مەن اناركالي كاۋر حونورياردىڭ توبىن توقتاتىپ، ولاردىڭ ەلدەن شىعۋىنا تىيىم سالدى.

ءۇندىستان پۋشتۋندار پاكىستاننان بۇيرىق الىپ، اۋعانستانداعى ءۇندى مەن سيكحتاردى قۋعىنداۋى مۇمكىن دەپ سەكەمدەنىپ وتىر.

Abai.kz