اقىن، قوعام قايراتكەرى ولجاس سۇلەيمەنوۆ الماتى اتاۋىن «الما-اتا» دەپ وزگەرتۋ قاجەت دەگەن ۇستانىمدا. ول 1992 جىلدان باستاپ ەلىمىزدە ۇزدىكسىز ەلدىمەكەن، كوشە، قالا اتاۋلارى وزگەرتىلىپ جاتقانىن ايتادى.

«جاڭا اتاۋلاردى قۇراستىرعاندار عالىمدار ەمەس، ۋاقىت قىسىپ بارا جاتقان اكىمدىك قىزمەتكەرلەرى ەدى. كوممۋنيستىك پارتيا قايراتكەرلەرى مەن كەڭەستىك كەزەڭنىڭ تەرميندەرىنەن قۇتىلۋ كەرەك بولدى. ولاردىڭ اتاۋلارىن ەتنيكالىق تاريحپەن اۋىستىردى، ال اتاۋدى قاراستىرۋ ساتىندە جوڭعار شاپقىنشىلىعى بولعان XVIII عاسىردان ارى بارمادى. بۇل پايىم ءبىزدىڭ قالا اتاۋلارىندا دا كورىنىس تاپتى.

الدىمەن داڭعىلدار مەن كوشەلەر ايگىلى باتىرلاردىڭ اتىمەن اتالدى. ال ەسىمدەر تاۋسىلعان ساتتە XIX-XX عاسىرداعى اقىن، جازۋشى، قوعام قايراتكەرلەرىنىڭ ەسىمدەرى قويىلا باستادى. ءبىزدىڭ زامانداستارىمىزدىڭ دا ەسىمدەرى كوشەلەرگە بەرىلىپ جاتتى. مەنىڭ ويىمشا لۋي پاستەر كوشەسىن اۋىستىرۋدىڭ قاجەتى جوق ەدى، ول ميللياردتاعان ادامدى قۇتقارىپ قالعان جان عوي. كوسموناۆتى كوشەسىنەن دە باس تارتپاۋ قاجەت ەدى. بۇنى بەكىتكەن اكىم العاشقى ادام عارىشقا قازاق جەرىنەن، بايقوڭىردان ۇشقانى، بۇل بولاشاق عارىشكەرلەرگە ۇلگى ەكەنى ەسىنە تۇسپەگەن سىڭايلى. ال ينتەرناتسيونال كوشەسىن نەگە اۋىستىردىق، ءبىز ول تەرميننەن دە، تۇسىنىكتەن دە باس تارتپايمىز عوي. ءبىز تمد اۋماعىنداعى ەڭ ينتەرناتسيونال ەلمىز، ءسوز بويىنشا دا، ءىس بويىنشا دا»,  - دەيدى ولجاس سۇلەيمەنوۆ.

اقىن بۇرىنعى اتاۋلاردىڭ ءبىرازىن قايتارۋ كەرەكتىگىن العا تارتىپ وتىر. ول تەك قانا كوشە اتتارىن ەمەس، سونىمەن قاتار الماتى قالاسىنىڭ اتاۋىن دا وزگەرتۋدى ۇسىنۋدا.

«ورتالىق ازيادا حح عاسىردا ءۇش قانا قالانىڭ اتاۋىن ايتۋ وعاي، ادەمى ءارى ىرعاقتى ەدى، ولار سامارقاند، اشحاباد جانە الما-اتا. قوناقجايلىلىق پەن تۋريزمنىڭ نىشانى وسىلار بولاتىن. ال ەندى سولاردىڭ ىشىندەگى ەڭ ادەمىسى اشىق ەكى داۋىستى دىبىستان ايىرىلىپ، الەمنىڭ كوپتەگەن تىلدەرىندە ايتۋعا قيىن رەڭككە ەندى. بۇدان تەك قانا ءبىز ەمەس، ايماق تۇتاس يگىلىكتەردى جوعالتتى. مەن مۇنى الما-اتالىق رەتىندە ايتىپ وتىرمىن، الماتىلىق رەتىندە ەمەس. ءوزىمىزدىڭ ناعىز اتاۋىمىزدى قايتارايىق!» - دەيدى ول.

بۇل ولجاس سۇلەيمەنوۆتىڭ العاشقى مالىمدەمەسى ەمەس. بۇعان دەيىن تانىمال اقىن «تولىق تاۋەلسىزدىك قاۋىپتى»، دەپ مالىمدەپ، باسى داۋعا قالعان ەدى.

Abai.kz