جامبىل اۋدانى، بايزاق اۋدانىندا بولعان وقيعا سالدارىنان جوندەۋدى قاجەت ەتەتىن 118 جىلجىمايتىن مۇلىك انىقتالدى. ونىڭ 106-سى تۇرعىن ءۇي، 12-ءسى كوممەرتسيالىق نىسان. بۇل تۋرالى جامبىل وبلىستىق اكىمدىگى حابارلادى. 

ساپارباەۆتىڭ ايتۋىنشا، انىقتالعان 106 تۇرعىن ءۇيدىڭ 35-ءسى كۇردەلى جوندەۋدەن وتەتىن بولسا، قالعان 71-ءى جەڭىل زاقىمدالعان، ولار دا قالپىنا كەلتىرىلەدى. بارلىق جۇمىستارعا ۇكىمەت تاراپىنان قارالاتىن جانە قوسىمشا جەرگىلىكتى بيۋدجەت، وڭىردەگى دەمەۋشىلەر قاراجاتتارى جۇمسالادى.

- بۇگىن ءبىر ءۇيدىڭ كۇردەلى جوندەۋ جۇمىستارى باستالسا، قالعان ۇيلەر بويىنشا قۇرىلىسشىلار ەرتەڭنەن باستاپ ىسكە كىرىسەدى. ەكى ايدىڭ ىشىندە بارلىق ۇيلەردى قالپىنا كەلتىرەمىز دەپ وزىمىزگە مىندەتتەمە الىپ وتىرمىز. وعان ءبىزدىڭ مۇمكىندىگىمىز دە، قۇرىلىسشىلار كۇشى دە جەتكىلىكتى,-دەدى وبلىس اكىمى.

ايتا كەتەيىك، مەملەكەت باسشىسى قاسىم-جومارت توقاەۆتىڭ شەشىمىمەن قۇرىلعان ۇكىمەتتىك كوميسسيا توراعاسى، قر پرەمەر-ءمينيسترىنىڭ ورىنباسارى رومان سكليار بۇعان دەيىن وقيعا ورنىنا كەلىپ، ءمان-جايمەن جان-جاقتى تانىسقان بولاتىن. كوميسسيا مۇشەلەرى، ارنايى ماماندار كەلگەن شىعىن كولەمىن انىقتاۋ جانە ناقتىلاۋ بويىنشا ءتيىستى جۇمىستاردى جۇزەگە اسىرۋدا.

- الەۋمەتتىك نىساندارعا قاتىستى توقتالساق، 3 مەكتەپكە زاقىم كەلگەن. اسىرەسە، قاتتى زارداپ شەككەنى – جىبەك جولى اۋىلىنداعى ءبىلىم ورداسى. 118 بالا وقيتىن ءبىلىم مەكەمەسىنىڭ ىرگەسى 1956 جىلى قالانعان. ەسكى مەكتەپتىڭ ورنىنا جاڭا عيمارات سالۋعا شەشىم قابىلداندى. اۋىل حالقى سانىنىڭ ءوسىمى ەسكەرىلىپ، ۇكىمەتكە 150 ورىندىق جاڭا مەكتەپتىڭ قۇرىلىسى بويىنشا ۇسىنىس جولدايمىز. سالىناتىن جەر بەلگىلەندى، قۇجاتتارى بارىنشا قىسقا ۋاقىتتا دايىندالادى. جەڭىل زاقىمدالعان ۇشبۇلاق مەن بازارباي اۋىلدارىنداعى مەكتەپتەر دەمەۋشىلەر ەسەبىنەن قالىپقا كەلتىرىلۋدە. ولار ءبىرىنشى قىركۇيەككە دەيىن دايىن بولادى. ءدال سونداي ءبىر مەديتسينالىق پۋنكت تە ءبىر اپتا ىشىندە تولىعىمەن جوندەلەدى،-دەدى ب. ساپارباەۆ.

قازىرگى تاڭدا تاراز قالالىق ورتالىق اۋرۋحانادا 28 ناۋقاس ەم الۋدا. ونىڭ 4-ءىنىڭ جاعدايى ورتاشا اۋىر. ولارعا قاجەتتى بارلىق مەديتسينالىق كومەكتەر كورسەتىلۋدە. ومىرلەرىنە ەشقانداي قاۋىپ ءتونىپ تۇرعان جوق. ءدارى-دارمەكتەر مەن دارىگەرلەر جەتكىلىكتى.

جالپى، مەديتسينالىق كومەككە جۇگىنگەن ءتۇرلى دەڭگەيدە جاراقات العان 98 ادامنىڭ ىشىندە قاراپايىم تۇرعىندار جوق، بارلىعى اسكەريلەر مەن توتەنشە جاعداي سالاسىنىڭ قىزمەتكەرلەرى.

قازىرگى تاڭدا حابارسىز كەتكەندەر ىزدەستىرىلۋدە. وبلىس اكىمى ولاردىڭ اتا-انالارى مەن تۋعان-تۋىسقاندارىمەن كەزدەسىپ، ءتيىستى تۇسىندىرمە بەردى. ىزدەۋ جۇمىستارىنا اسكەريلەر، تجد ماماندارى، كينولوگتار، ءتيىستى ماماندار، قىزمەتتىك يتتەر، اتتى ادامدار جۇمىلدىرىلعان. ارنايى درون قۇرىلعىسىنىڭ مۇمكىندىگى دە بارىنشا پايدالانىلۋدا. قازىرگى تاڭدا 180 ادام، 40 شاقتى تەحنيكا جۇمىس جاساۋدا.

Abai.kz