قازاقستان رەسپۋبليكاسى پارلامەنتى ءماجىلىسىنىڭ دەپۋتاتى "اك جول" قدپ فراكتسياسىنىڭ دەپۋتاتى ب. دۇيسەنبينوۆتىڭ قازاقستان رەسپۋبليكاسى پرەمەر-ءمينيسترىنىڭ ورىنباسارى ە. ل. توعجانوۆقا دەپۋتاتتىق ساۋال جولدادى. ساۋال تومەندەگىدەي.

قۇرمەتتى ەرالى لۇقپانۇلى!

«اق جول» فراكتسياسىنىڭ دەپۋتاتتارى وڭىرلەردە كاسىپكەرلەرمەن كەزدەسۋ بارىسىندا بىرقاتار ماسەلەلەردى تالقىلاعان بولاتىن. سولاردىڭ ىشىندە رەستوراتورلارمەن كارانتيندىك شەكتەۋلەرگە قاتىستى ماسەلە قىزۋ پىكىرتالاس تۋعىزدى. وسى بيزنەستىڭ وكىلدەرى وتباسىلىق ءىس-شارالاردى وتكىزۋگە تىيىم سالۋدى الىپ تاستاۋدى تالاپ ەتە وتىرىپ، ءوز تاراپىنان ۇسىنىستار پاكەتىن دە دايىنداپ قويعان: مىسالى، قىزمەتكەرلەردى 100 پايىز ۆاكتسيناتسيالاۋ، «Ashyq» جۇيەسىن قولدانۋ، ءۇي-جايلاردى دەزينفەكتسيالاۋ، كەلۋشىلەر تولىمدىلىعىن 30-50 پايىزدان اسىرماۋ، ءبىر كەلۋشىگە 4 شارشى مەتردەن كەم بولماۋى جانە تاعى باسقالارى.

ولاردىڭ ايتۋىنشا، پاندەميانىڭ العاشقى كۇندەرىنەن باستاپ، وزدەرى كارانتيندىك شارالارعا بەلسەندى تۇردە ىقپال ەتكەن، جۇمىستارىن توقتاتىپ، جۇمىسسىز قالعان قىزمەتكەرلەرگە جيناقتارىنان جالاقى تولەپ، اۋرۋحانالارعا قاجەتتى جابدىقتار مەن جەكە قورعانۋ قۇرالدارىن ساتىپ الۋعا كومەكتەسىپ، بۇگىندە دە مۇقتاج ادامدارعا ءدارى-دارمەكپەن، ازىق-تۇلىكپەن كومەكتەسۋدى جالعاستىرۋدا.

كاسىپكەرلەردىڭ جيناعان قورلارى دا، شىدامدارى دا تاۋسىلۋدا. كۇندەلىكتى تۇرمىس-تىرشىلىك شىعىندارىنا قوسا، شەكتەۋلەرگە بايلانىستى جۇمىسسىز بوس تۇرعان عيماراتتاردىڭ كوممۋنالدىق تولەمدەرى، ونى قاراپ، كۇزەتۋگە كەتەتىن تولەمدەر كاسىپكەرلەرگە جىعىلعاننىڭ ۇستىنە جۇدىرىق بولىپ وتىر. سوڭعى ەكى جىل بويى بۇل جاعدايدىڭ وزگەرەتىن ءتۇرى جوق.

وكىنىشكە وراي، ۆيرۋس ءومىرىمىزدىڭ تۇراقتى فاكتورىنا اينالۋدا. ال ءومىر جالعاسۋدا: جاستار وتباسىن قۇرادى، ادامدار تۋىلادى جانە قايتادى. ءبىزدىڭ حالقىمىز قىزىعىن دا، قايعىسىن دا جاقىنىمەن بىرگە بولىسكەن ەدى. ال بۇگىندە ازاماتتارىمىز كەڭ عيماراتتاردا ساقتىق شارالارىن ساقتاي وتىرىپ وتكىزەتىن وتباسىلىق شارالاردى انتيسانيتارلىق تار جەرلەردە تىعىلىپ وتكىزۋگە ءماجبۇر بولۋدا.

وتباسىلىق شارالاردى وتكىزۋگە رۇقسات بەرمەۋ، شىن مانىندە، ىندەتتىڭ تارالۋىن توقتاتۋعا ەش اسەر ەتىپ وتىرعان جوق. شەكتەۋ شارالارى كوزبوياۋشىلىققا، ىندەتپەن كۇرەستىڭ بەيشارا كورىنىسىنە، كوررۋپتسياعا اينالدى. رەسمي تۇردە شەكتەۋ بولعانىمەن، ءىس جۇزىندە جانۇيالىق شارالار مەن توي جيىندار پاتەرلەردە، جەكە ۇيلەر مەن كوزدەن تاسا كافەلەردە ءوتىپ جاتىر.

ونىڭ ۇستىنە، وڭىرلەردە شەنەۋنىكتەرگە جاقىندىعى بار نەمەسە «قاجەت جەردە» قۇنىن تولەگەن مەيرامحانالار تاۋلىك بويى ەشقانداي شەكتەۋسىز، قوناقتار سانىنا قاراماي جۇمىس ىستەيتىندىگى دە ەشقانداي دا قۇپيا ەمەس. سونداي-اق، قوعامدىق كولىكتەردەگى يىنتىرەسكەن ادامدار مەن حالىققا قىزمەت كورسەتۋ ورتالىقتارىنداعى ۇزىنسونار كەزەكتەردى كورگەندە قانداي سانيتارلىق نورمالار تۋرالى ايتۋعا بولادى؟!

جوعارىدا ايتىلعانداردى ەسكەرە وتىرىپ، «اق جول» فراكتسياسىنىڭ دەپۋتاتتارى ۇكىمەتكە وسى ماسەلەنى جەدەل قاراستىرىپ، شۇعىل شەشىم قابىلداۋ ماقساتىندا بىرنەشە بالامالى جوبالار:

1) وتباسىلىق شارالاردى وتكىزۋگە تىيىم سالىناتىن بولسا، وندا بۇگىندە شەكتەۋدىڭ ناتيجەسىندە قاڭىراپ بوس تۇرعان عيماراتتاردى ودان ءارى پايدالانۋ، ولاردى جاڭا ماقساتقا بەيىمدەۋگە مەكتەپتەر، اۋرۋحانالار، سپورت مەكەمەلەرىنە اينالدىرىپ، قايتا جابدىقتاۋعا كومەكتەسۋدى;

2) ەگەر وتباسىلىق شارالار وتكىزۋگە رۇقسات ەتىلگەن جاعدايدا، داعدارىستان شىعارۋعا قاۋقارلى، قاجەتتى، ءارى كاسىپكەرلەرگە تۇسىنىكتى، ءادىل شارالاردى قاراستىرا وتىرىپ، شەكتەۋدەن رەتتەۋگە كوشىپ، بيزنەس وبەكتىلەرىن قايتا جانداندىرۋدى جانە رەستوراتورلاردىڭ كارانتيندىك تالاپتاردى ورىنداۋ ماقساتىندا ازىرلەگەن ۇسىنىستار پاكەتىن قاراستىرۋدى;

3) ىندەتتى فورس-ماجور رەتىندە رەسمي تۇردە مويىنداپ، توقتاپ تۇرعان شاعىن جانە ورتا بيزنەس وبەكتىلەرى بويىنشا كوممۋنالدىق تولەمدەرگە، مۇلىك سالىعىنا جۇمسالاتىن باسقا دا شىعىنداردى وتەۋدى ۇسىنادى.

قورىتا ايتقاندا، ۇكىمەتكە وسى سالا بويىنشا ءدال قازىر ناقتى شەشىم قابىلدايتىن ۋاقىت كەلدى. كەشىگەتىن بولساق، وسى سالانىڭ ەل ەكونوميكاسىندا بولۋ نە بولماۋ ماسەلەسى تۋىنداۋى ءسوزسىز.

Abai.kz