تۇركىمەنستاننىڭ ايماقتارداعى پوليتسيا دەپارتامەنتتەرى اشحابادقا جولاۋشىلاردى زاڭسىز تاسىمالداۋمەن اينالىسقان ادامداردىڭ كولىكتەرىن ۋاقىتشا تاركىلەۋدە. 

تاركىلەنگەن كولىكتەردى نە قازان ايىندا، نە كارانتين اياقتالعاندا بەرۋى مۇمكىن. الايدا تۇركىمەنستاندا رەسمي كارانتين جاريالانباعاندىقتان، كولىكتەردى كەرى قايتارۋى دا ەكىتالاي.

ەل تۇرعىندارىندا ۆاكتسيناتسيا تۋرالى كۋالىك، COVID-19 ءۇشىن تەرىس تەست جانە رەنتگەن بولسا اشحابادقا كىرە الادى. ونىڭ وزىندە قالاعا سەبەپسىز كىرۋگە تىيىم سالىنعان. ءۇش جاعدايدا اشحابادقا كىرۋگە بولادى، ولار: تۋىسى قايتىس بولسا، جۇمىس ساپارى جانە ەمدەلۋ ماقساتىندا.

تۇركىمەنستان حرونيكاسى بۇعان دەيىن بىرنەشە رەت حابارلاعانداي، تەمىرجول قاتىناسىنىڭ توقتاتىلۋىنا بايلانىستى ەل تۇرعىندارى ايماقتار اراسىندا زاڭسىز تاكسيدە جۇرە باستاعان. ءشول ارقىلى ءبىر ايماقتىڭ جۇرگىزۋشىلەرى پوليتسيا بەكەتتەرىن اينالىپ ءوتىپ، جولاۋشىلاردى باسقا وبلىستىڭ شەكاراسىنا جەتكىزەدى. وسىلايشا ىسكە اسقان شارالار، ەندى كولىك تاركىلەۋ ارقىلى توقتاتىلماق.

Abai.kz