"يسلاميزم - باتىس ەلدەرى ءۇشىن باستى قاۋىپ" دەدى ۇلىبريتانيانىڭ بۇرىنعى پرەمەر -ءمينيسترى توني بلەر. 

6-قىركۇيەكتە توني بلەر كورولدىك بىرلەسكەن قاۋىپسىزدىك جانە قورعانىس عىلىمي-زەرتتەۋ ينستيتۋتىندا ءسوز سويلەدى. ونىڭ بايانداماسى ينستيتۋتتىڭ سايتىندا جاريالانعان.

بلەردىڭ ايتۋىنشا، راديكالدى يدەولوگيا مەن ول تۋدىراتىن زورلىق-زومبىلىق ءبىرىنشى كەزەكتەگى قاۋىپ بولىپ قالا بەرمەك. ول ەگەر الەم قاۋىپ -قاتەردىڭ تارالۋىن تەجەيتىن كۇش تاپپاسا، 2001 جىلدىڭ 11 قىركۇيەگىندەگى شابۋىلدار قايتالانۋى مۇمكىن ەكەنىن اتاپ كورسەتەدى.

"اۋعانستانداعى زاڭدى رەجيم قۇلاعاننان كەيىن، الەمنىڭ جەتەكشى ەلدەرى يسلاميزمگە قارسى كەلىسىلگەن ستراتەگيانى ازىرلەۋ ءۇشىن بىرىگۋى قاجەت. العاشقى تالقىلاۋلاردى نەگىزىنەن باتىس ەلدەرى جۇرگىزەتىن بولسا دا، رەسەي مەن قىتاي دا بۇل يدەولوگيامەن كۇرەسۋگە مۇددەلى، جانە ءبىز مۇسىلمان ەلدەرىندە، ونىڭ ىشىندە تاياۋ شىعىس ەلدەرىنىڭ ءدىني ەكسترەميزمنەن بوستاندىققا شىققىسى كەلەتىن ءبىزدىڭ ەڭ ادال وداقتاستارىمىزدى تابا الامىز", - دەيدى ول.

ونىڭ ايتۋىنشا، ەۋروپا مەن ناتو ءۇشىن تاعى ءبىر قيىندىق - بۇل اقش-تىڭ اسكەري وپەراتسيالارىن قىسقارتۋعا دەگەن ۇمتىلىسى بولىپ وتىر. ول ۆاشينگتوننىڭ قولداۋىنسىز وپەراتسيالاردى جۇرگىزۋ قابىلەتىن دامىتۋ قاجەت دەپ سانايدى.

"مەنىڭ ويىمشا، سوڭعى ۋاقىتتاردىڭ ەڭ ۇرەيلى تەندەنتسيالارىنىڭ ءبىرى-باتىستىڭ ستراتەگيا قۇرۋ قابىلەتىنەن ايىرىلعانىن جانە قىسقا مەرزىمدى ساياسي ماقساتتار ۇزاق مەرزىمدى جوسپارلاۋدى تولىعىمەن الماستىردى دەگەن سەزىم بولىپ وتىر. مەنىڭشە، بۇل سەزىم بارىنەن دە ءبىزدىڭ وداقتاستارىمىزدى الاڭداتادى جانە قارسىلاستارىمىزعا ءبىزدىڭ ۋاقىتىمىز ءوتتى دەپ سەندىرەدى" دەيدى بۇرىنعى ۇلىبريتانيا باسشىسى.

ۇلىبريتانيا تالىبتەرمەن كەلىسسوز جۇرگىزۋدىڭ قاجەتى جوق دەپ سانايتىن ەلدىڭ ءبىرى. لوندون اۋعانستاننان 15 مىڭنان استام اۋعان ازاماتتارى مەن ءوز جاساقتارىن ەۆاكۋاتسيالاعان بولاتىن. ەندىگى تاڭدا ۇلىبريتانيا اۋعانستان جەرىنەن جاسالۋى مۇمكىن تەررورلىق قاۋىپتەرگە الاڭدايدى.

Abai.kz