ءماجىلىس توراعاسى نۇرلان نىعماتۋلين پارلامەنتتەر سپيكەرلەرىنىڭ بەسىنشى دۇنيەجۇزىلىك كونفەرەنتسياسىندا سويلەگەن سوزىندە قازاقستان باسشىلىعىنىڭ اۋقىمدى رەفورمالارى، سونداي-اق زاڭنامالىق قولداۋ ەلىمىزدى حالىقارالىق ۇستانىمدارعا سايكەس دامۋىنا مۇمكىندىك بەرەتىنىن اتاپ ءوتتى.

ءماجىلىس توراعاسى نۇرلان نىعماتۋلين باستاعان پارلامەنتتىك دەلەگاتسيا وسى كۇندەرى اۆستريا استاناسى ۆەنا قالاسىندا ءوتىپ جاتقان پارلامەنتتەر سپيكەرلەرىنىڭ بەسىنشى دۇنيەجۇزىلىك كونفەرەنتسياسىنا قاتىسۋدا.

ءماجىلىس سپيكەرى كوپجاقتى ىنتىماقتاستىقتى نىعايتۋ، بەيبىتشىلىك پەن تۇراقتى دامۋدى قامتاماسىز ەتۋ ءۇشىن پارلامەنتتىك قىزمەت تاقىرىبىنا ارنالعان ينتەراكتيۆتى جالپى پىكىرتالاستاردا ءسوز سويلەدى.

وسى رەتتە، نۇرلان نىعماتۋلين ءبىزدىڭ  ەلىمىزدىڭ حالىقارالىق ۇستانىمدارعا سايكەس تۇراقتى دامۋعا جول اشاتىن قازاقستاندا قولعا الىنىپ جاتقان ماڭىزدى باستامالار تۋرالى ايتتى.

پالاتا سپيكەرى اتاپ وتكەندەي، قازاقستاننىڭ تۇڭعىش پرەزيدەنتى نۇرسۇلتان نازارباەۆ ىقپالدى مەملەكەت پەن ءادىل قوعام قۇرۋدىڭ تۇجىرىمدامالىق نەگىزىن قالادى. وسى ساياسي باعىتتى بۇگىندە پرەزيدەنت قاسىم-جومارت توقاەۆ ساياسي جالعاستىرىپ كەلەدى.

نۇرلان نىعماتۋلين قازاقستاندىق قوعامنىڭ بارلىق سالالارىن قامتيتىن اۋقىمدى جۇيەلى رەفورمالاردى ءسوز ەتە كەلىپ، قوعامدىق باقىلاۋ مەن  ازاماتتىق بەلسەندىلىكتى، سونىمەن بىرگە ەل باسشىلىعىنىڭ باستامالارىن زاڭنامالىق قولداۋعا باسا نازار اۋداردى.

- پارلامەنت رەفورمالاردى دەر كەزىندە زاڭ دەڭگەيىندە قامتاماسىز ەتە وتىرىپ، بەلسەندى قىزمەت اتقارۋدا. ماسەلەن، سايلاۋ زاڭناماسى مەن سوت جۇيەسىن جەتىلدىرۋگە بىرقاتار ماڭىزدى زاڭدار قابىلداندى. سونىمەن بىرگە، ساياسي پارتيالار، بەيبىت جينالىستار، جەرگىلىكتى ءوزىن-ءوزى باسقارۋ تۋرالى زاڭنامالىق اكتىلەرگە دە كوپتەگەن وزگەرىستەر ەنگىزىلدى، - دەدى ءماجىلىس سپيكەرى.

ءوز سوزىندە نۇرلان نىعماتۋلين قازاقستاننىڭ جاھاندىق جانە وڭىرلىك دەڭگەيلەردە بەيبىتشىلىك پەن قاۋىپسىزدىكتى قامتاماسىز ەتۋگە قوسقان ۇلەسىنە  كوڭىل ءبولدى.

- قازاقستان پرەزيدەنتى قاسىم-جومارت توقاەۆ زاماناۋي سىن-قاتەرلەرگە بايلانىستى تىكەلەي بۇۇ قاۋىپسىزدىك كەڭەسىنە ەسەپ بەرەتىن بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋدى ۇسىندى. بۇل مامانداندىرىلعان قۇرىلىم بيولوگيالىق قاۋىپتەردى بولدىرماۋعا ىقپال ەتەدى. ءبىز وسى ماڭىزدى قازاقستاندىق باستامانى ارىپتەستەرىمىز بەلسەندى تۇردە قولدايدى دەپ سەنەمىز، - دەدى ءماجىلىس سپيكەرى.

سونىمەن قاتار، نۇرلان نىعماتۋلين حالىقارالىق كۇن تارتىبىندەگى اۋعانستانداعى بەيبىتشىلىك پەن قاۋىپسىزدىكتى قالپىنا كەلتىرۋ سياقتى وزەكتى ماسەلە تۋرالى ايتا كەلىپ، بۇگىنگى تاڭدا ەڭ ماڭىزدىسى – اۋعانستانداعى گۋمانيتارلىق جانە ازىق-تۇلىك داعدارىسىنا جول بەرمەۋ ەكەندىگىنە نازار اۋداردى. ءماجىلىس سپيكەرى قازىرگى ۋاقىتتا قازاقستان پرەزيدەنتىنىڭ شەشىمى بويىنشا اۋعانستانعا جاردەمدەسۋ جونىندەگى بۇۇ ميسسياسى ءبىزدىڭ ەلىمىزدە ۋاقىتشا ورنالاستىرىلعانىن اتاپ ءوتتى.

بەسىنشى دۇنيەجۇزىلىك پارلامەنتتەر سپيكەرلەرىنىڭ كونفەرەنتسياسى كوروناۆيرۋستىق پاندەميا باستالعاننان بەرى تىكەلەي ۇيىمداستىرىلىپ وتىرعان العاشقى اۋقىمدى پارلامەنتشىلەر فورۋمى.

ۆەناداعى كونفەرەنتسيانى پارلامەنتارالىق وداق، اۆستريا پارلامەنتى بۇۇ-مەن بىرلەسىپ ۇيىمداستىردى.

الەمنىڭ 90-نان استام ەلىنىڭ پارلامەنتتەر سپيكەرلەرى جينالعان جيىندا-پاندەميامەن كۇرەسۋ جانە covid-19-دان كەيىن قالپىنا كەلتىرۋ جونىندەگى جاھاندىق شارالاردى قوسا العاندا، شۇعىل حالىقارالىق پارلامەنتتىك ءىس-قيمىلدى تالاپ ەتەتىن باسىمدىقتار، كليماتتىڭ وزگەرۋى جانە ەكولوگيالىق تۇراقتىلىقتى قامتاماسىز ەتۋ ماسەلەلەرىن شەشۋ، جالعا اقپارات تاراتۋعا قارسى ءىس-قيمىل، جاستاردىڭ ساياساتقا قاتىسۋى، گەندەرلىك تەڭدىك ماسەلەلەرى قارالدى.

قازاقستاندىق پارلامەنت وكىلدەرى دەلەگاتسياسىنىڭ قۇرامىندا سەنات پەن ءماجىلىس دەپۋتاتتارى بار.

Abai.kz