داريعا نازارباەۆا ەلدەگى ينۆەستيتسيالاردىڭ ازايۋىنا الاڭداۋشىلىق ءبىلدىردى. مەملەكەت قارجىسىنىڭ يگەرىلۋىنە كوڭىلى تولماعان ءماجىلىس دەپۋتاتى ۇكىمەت باسشىسىن «سۇراقتىڭ استىنا» الدى. بۇل تۋرالى Arasha.kz-كە سىلتەمە جاساپ Abai.kz حابارلايدى.

ءماجىلىس دەپۋتاتى پاندەميا سالدارىنان تۋىنداعان جاھاندىق ەكونوميكالىق قۇلدىراۋ جاعدايىنا الاڭدادى.

ول 2017 جىلى ينۆەستيتسيالىق احۋالدى جاقسارتۋ ماقساتىندا 2018-2022 جىلدارعا ارنالعان ۇلتتىق ستراتەگيا ازىرلەنگەنىن ەسكە سالدى. مەملەكەت تۇتاستاي العاندا ينۆەستيتسيالىق احۋالدى جاقسارتۋ ءۇشىن بىرقاتار كەشەندى شارالار قابىلدادى.

«سىرتقى ىستەر مينيسترلىگىنىڭ اقپاراتىنا سايكەس، 2020 جىلى ءبىزدىڭ ەلدىڭ ەكونوميكاسىنا تىكەلەي شەتەلدىك ينۆەستيتسيالار اعىمى 30%-عا تومەندەدى. ينۆەستيتسيالىق احۋالدى جاقسارتۋ ماسەلەلەرى وزەكتى بولىپ قالا بەرەدى»، – دەدى نازارباەۆا.

وسىعان بايلانىستى ول پرەمەر -مينيستر اسقار مامينگە ساۋال جولداپ، بىرنەشە سۇراقتارعا جاۋاپ بەرۋىن ءوتىندى.

ولاردىڭ ىشىندە، 2018-2020 جىلداردىڭ ناتيجەلەرى بويىنشا ماقساتتى ينديكاتورعا قول جەتكىزىلدى مە؟ ينجەنەرلىك كوممۋنيكاتسيا، تۋريزم جانە قارجى تارتۋ بويىنشا قانداي نەگىزگى ينۆەستيتسيالىق جوبالار باستالدى؟ ول سونداي -اق وسى ينۆەستورلاردى ساقتاپ قالۋ جانە ينۆەستيتسيالاۋدى ىنتالاندىرۋ ءۇشىن قانداي ناقتى شارالار قابىلدانعانىن سۇرادى.

ينۆەستيتسيالىق جۇمىستا قانداي جاڭا تاسىلدەر قولدانىلادى، ولاردى تاجىريبەگە ەنگىزۋدىڭ ناتيجەسى قانداي؟ سونىمەن قاتار، ينۆەستيتسيالىق جوبالاردىڭ مونيتورينگ جۇيەسى ەنگىزىلدى مە، ەلدەگى ينۆەستيتسيالىق احۋالدىڭ جاعدايىنا جۇيەلى تۇردە تالداۋ جاسالا ما؟ 2020 جىلدىڭ نەگىزگى قورىتىندىلارى قانداي بولدى، دەدى ول.

ۇكىمەت باسشىسىنا قويىلعان ماجىلىسمەن ساۋالدارىنان كەيىن كوپشىلىك نازارباەۆا مامين جۇمىسىنا كوڭىلى تولماي ما دەگەن پىكىر بىلدىرە باستادى.

Abai.kz