الماتى وبلىسىندا حالىقتىڭ 90%-ى ەكپەنىڭ ءبىرىنشى بولىگىن الدى. بۇگىنگى تاڭدا الماتى وبلىسىندا ۆاكتسينامەن قامتۋ جوسپار بويىنشا 65% - دى قۇرايدى. بالقاش (107%), اقسۋ (103%) اۋداندارىندا ەگۋ اياقتالدى. الايدا، پانفيلوۆ (54%), تالعار (49%), قاراتال (47%) اۋداندارىندا ەگۋ جۇمىستارى تومەن قارقىنمەن جۇرگىزىلۋدە.

وبلىس اكىمىنىڭ ورىنباسارى باتىرجان بايجۇمانوۆتىڭ ايتۋىنشا، وڭىردە ۆاكتسينانىڭ ءبىرىنشى كومپونەنتىمەن 711 مىڭ (92%) ادام ەگىلسە، ەكىنشى كومپونەنتىمەن 594 مىڭ (83%) تۇرعىن ەگىلدى. ازاماتتاردىڭ كەيبىر ساناتتارى ءۇشىن (نەگىزىنەن مۇعالىمدەر، اسكەري قىزمەتكەرلەر، مەملەكەتتىك قىزمەتكەرلەر) مىندەتتى ۆاكتسيناتسيانى ەنگىزدى. اكىم ورىنباسارىنىڭ ايتۋىنشا، ۆاكتسيناتسيا ەرىكتى بولۋى كەرەك، بۇل ايماقتاردا ەنگىزىلگەن شارالار ۇجىمدىق يممۋنيتەتتى قالىپتاستىرۋعا جانە COVID-19 تارالۋىن توقتاتۋعا كومەكتەسەدى.

«جىل باسىنان بەرى الماتى وبلىسىنا ۆاكتسينانىڭ 1 كومپونەنتىنىڭ 773 685 دوزاسى كەلىپ ءتۇستى. ونىڭ ىشىندە 598 575 دوزا گام كوۆيد ۆاك، 104 100 دوزا Sinopharm, 43 010 دوزا QazVac جانە 28 000 دوزا – كوروناۆاك.

ۆاكتسينانىڭ 2 كومپونەنتىنەن 701 310 دوزا الىندى. ونىڭ ىشىندە 526 200 دوزا گام كوۆيد ۆاك، 104 100 دوزا Sinopharm, 43 010 دوزا QazVac جانە 28 000 دوزا – كوروناۆاك»،-دەپ اتاپ ءوتتى باتىرجان قۇلايمەرگەنۇلى.

وڭىردە مەكتەپ وقۋشىلارىنا ەرەكشە كوڭىل بولىنەدى. ءبىلىم بەرۋ مەكەمەلەرىندە كارانتيندىك شارالار قاتاڭ ساقتالادى. بارلىق مەكتەپتەر قورعانىس قۇرالدارىمەن قامتاماسىز ەتىلدى، وسى ماقساتقا جەرگىلىكتى بيۋدجەتتەن 200 ملن.تەڭگە ءبولىندى. بارلىق ءبىلىم بەرۋ وبەكتىلەرىندە "اشىق" باعدارلاماسى ەنگىزىلدى. بىراق، وسىعان قاراماستان، كوروناۆيرۋستىق ينفەكتسيا جاعدايلارى مەكتەپتەر مەن بالاباقشالاردا دا تىركەلگەن.

«وبلىس پەداگوگتارىنىڭ 99,9% ەگىلدى. 56,9 مىڭ مۇعالىمنىڭ 50,1 مىڭى ەكپە الدى. 6,4 مىڭ ۇستازدا مەديتسينالىق قارسى كورسەتكىشى بار. كۆي جاعدايلارىنىڭ تارالۋىنا جول بەرمەۋ ماقساتىندا قالالار مەن اۋدانداردىڭ سانيتارلىق دارىگەرلەرى وبلىستىڭ 99 مەكتەبىنىڭ 107-سىنىپتارىندا كارانتين ەنگىزۋ تۋرالى 99 قاۋلى شىعاردى جانە 2 153 وقۋشى مەن مۇعالىمدى ءۇي كارانتينىنە كوشىرۋ تۋرالى شەشىم قابىلدادى»، - دەپ ءبولىستى الماتى وبلىسى اكىمىنىڭ ورىنباسارى.

ايتا كەتۋ كەرەك، الماتى وبلىسى دەنساۋلىق ساقتاۋ باسقارماسىنىڭ مالىمەتىنشە، مەديتسينالىق ۇيىمداردا جەكە قورعانۋ قۇرالدارىنىڭ ايلىق قورى جانە ءدارى-دارمەكتەردىڭ ازايمايتىن قورى بار. وبلىستا 15 زەرتحانا جۇمىس ىستەيدى، جالپى قۋاتتىلىعى 9 مىڭ زەرتحانالىق زەرتتەۋلەردى قۇرايدى. 13 قىركۇيەكتەگى جاعداي بويىنشا پتر ادىسىمەن 944 582 ادام زەرتحانالىق تەكسەرۋدەن ءوتتى، ونىڭ ىشىندە 16 486 مەديتسينا قىزمەتكەرى. بۇدان باسقا، حالىقتىڭ الەۋمەتتىك وسال توپتارى ءۇشىن جەرگىلىكتى بيۋدجەت ەسەبىنەن 92,1 ملن.تەڭگەگە ۆيرۋسقا قارسى پرەپاراتتار ساتىپ الىندى.

Abai.kz