1991 جىلى 15 قىركۇيەكتە ورالدا قازاق جەرىنىڭ تۇتاستىق ماسەلەسى شەشىلدى. ويتكەنى ءدال وسى كۇنى قازاق ۇلتشىلدارى مەن پاتريوتتارى ەلىمىزدىڭ بىرقاتار ايماعىن ءبولىپ الۋدى ويلاعان سەپاراتيستىك پيعىلعا وڭدىرماي سوققى بەردى. 

ورال وقيعاسى كەڭەس وداعى ىدىراعان كەزەڭمەن تۇسپا تۇس كەلدى. پوستكەڭەستىك كەڭىستىكتە ءتۇرلى ەتنيكالىق، ءدىني قاقتىعىستار بولىپ جاتتى. داعدارىستان السىرەگەن ايماقتاردا سەپاراتيزم باس كوتەرە باستادى. 1989 جىلى رەسەيشىل كۇشتەر پريدنەستروۆەنى ءىس جۇزىندە مولدوۆادان ءبولىپ الدى. قازاقستاندا دا 90-جىلدارى "قازاقتىڭ جەرى جوق، ونىڭ باسىم بولىگى ورىس پەن كازاككا تيەسىلى" دەگەن سارىنداعى ماقالالار مەن اقپاراتتاردى تاراتۋشىلار سانى كوپ بولدى.

1991 جىلى ورالدا كازاكتار رەسەي يمپەرياسىنا قىزمەت ەتۋىنىڭ 400 جىلدىق مەرەيتويىن جاساماق بولدى. وعان تەك قانا قازاقستانداعى كازاكتار عانا ەمەس، جالپى تمد ايماعىنىڭ كازاكتارى شاقىرىلدى. رەسەيدەن بەلدى كازاك اتاماندارى قۇرمەتتى قوناق بولۋىعا ءتيىس ەدى. ولاردىڭ ارام پيعىلدارىن ۇلتشىل قازاق جاستارى بىردەن سەزدى. "ازات" قوزعالىسىنىڭ جىگىتتەر قازاقستاننىڭ تۇكپىر-تۇكپىرىنەن قازاق جەرىنىڭ تۇتاستىعىن ساقتاپ قالۋ كەرەكتىگى جايلى ۇگىتتەر جۇرگىزە باستادى. قازاق ۇلتشىلدارىنىڭ كۇدىگى راس ەدى. . كونتسەرت قويامىز دەپ جينالعان زالدا كازاكتار "ورالدى رەسەيگە قوسۋ ماسەلەسىن" تالقىلاپ جاتقان بولاتىن. 15-قىركۇيەك كۇنى بۇل جىمىسقى جوسپاردىڭ قازاق جاستارى تاس-تالقانىن شىعاردى. ورالدىڭ الاڭىندا ساپپەن ءجۇرىپ وتپەك بولعان كازاك جىگىتتەرى ارنايى اۆتوبۋستارعا وتىرىپ، قالادان قاشىپ شىقتى. باسىم بولىگى رەسەيگە ءوتىپ كەتتى.

الايدا اراعا 30 جىل سالعان ۋاقىت وتسە دە، "ورال وقيعاسى" ءالى تولىق زەرتتەۋدى قاجەت ەتەدى. قازاق جەرىنىڭ تۇتاستىعىن ساقتاپ قالعان ايبىندى جىگىتتەر مەن قىزدار جايلى بيىك مىنبەرلەردەن ايتىلمايدى.

Abai.kz