جەتىسۋدىڭ باس شاھارى تالدىقورعان قالاسىنىڭ وبلىس ورتالىعى مارتەبەسىن العانىنا 20 جىل تولۋىنا وراي، قالانىڭ كوركىنە-كورىك قوساتىن تاعى ءبىر جەر ورىن تەپتى.  بۇل مەكەندە اق حالاتتى ابزال جاندارعا دەگەن العىستىڭ نىشانى رەتىندە «اياۋلى الاقان» ءمۇسىنى قويىلعان.  جوبا اۆتورى، الماتى وبلىسىنىڭ اكىمى  اماندىق باتالوۆ.

مۇسىندە ادامزاتتىڭ قوس الاقانى بەينەلەنگەن. ال ەكى ۋىستىڭ اراسىندا جاپىراعى جايقالعان جاس اعاش ءوسىپ تۇر. بۇل جان جىلۋىنىڭ ءار تىرشىلىك  يەسىنە ءومىر سىيلاي الاتىنىن بەينەلەپ تۇرعان ەرەكشە ساۋلەت ونەرى.

ايماق باسشىسى اماندىق باتالوۆ، اتالعان ەسكەرتكىش ادام ءومىرىنىڭ اراشاسى بولعان جاندارعا دەگەن شەكسىز ريزاشىلىقتىڭ بەلگىسى رەتىندە ماڭگىگە ءوزىنىڭ ماڭىزىدىلىعىن جوعالتپايتىنىن العا تارتۋدا.

«پاندەميانىڭ العاشقى كۇندەرىنەن-اق ەلباسى ۇندەۋىمەن ەلىمىز بىرىگىپ، ىندەتتى جەڭۋگە جۇمىلدى.  قيىن جاعدايدا الدىڭعى قاتاردا كۇرەسكەن – مەديتسينا قىزمەتكەرلەرى بولدى.  بۇگىنگى اشىلعان «اياۋلى الاقان» ەسكەرتكىش – اسا قاۋىپتى ىندەتپەن بەتپە-بەت كەلگەن مەديتسينا سالاسى قىزمەتكەرلەرىنىڭ قۇرمەتىنە ارنالادى. بۇل – جاھاندىق دەرتكە قارسى كۇرەسكەن اق حالاتتى جاندارعا دەگەن ەل قۇرمەتىنىڭ بەلگىسى. سونداي-اق، حالىقتىڭ ادال پەرزەنتتەرىنە ىستىق ىقىلاسىنىڭ كورىنىسى. ەسكەرتكىش ەل باسىنا قيىندىق تۋعان ساتتە قاھارماندىق كورسەتكەن جانداردىڭ رۋحىنا تاعزىم ەتۋ ورنىنا اينالادى»،- دەدى اماندىق عابباسۇلى.

اللەيانىڭ اشىلۋ سالتاناتىندا ءسوز العان وبلىس اكىمى جەتىسۋ ولكەسىندە پاندەميا كەزىندە اتقارىلعان جۇمىستاردىڭ بىرقاتارىنا شولۋ جاسادى.

بارشاعا ءمالىم، وبلىسىنىڭ دەنساۋلىق ساقتاۋ جۇيەسى بىرنەشە ايدان بەرى دامىلسىز جۇمىس ىستەپ كەلەدى. پاندەميامەن كۇرەسكە 31 مەديتسينالىق ۇيىم جۇمىلدىرىلدى، ونىڭ ىشىندە 4-ءى تالدىقورعان قالاسىندا ورنالاسقان. امبۋلاتوريالىق جانە ستاتسيونارلىق دەڭگەيدە ءۇش جارىم مىڭعا جۋىق (3455) مەديتسينا قىزمەتكەرى، ونىڭ ىشىندە 851 دارىگەر جانە 2604 كىشى جانە ورتا بۋىن دارىگەرلەرى تارتىلدى. پاندەميامەن كۇرەسكە جەرگىلىكتى بيۋدجەتتەن بارلىعى 13,8 ملرد. تەڭگە ءبولىندى، مەديتسينالىق جابدىقتارمەن جاراقتاندىرۋ 79-دان 90 پايىزعا دەيىن ءوستى. ال، پاندەميا باستالعاننان بەرى كوروناۆيرۋس پەن پنەۆمونيادان 51 مىڭنان استام ادام جازىلىپ شىقتى.

نەگىزى ءمۇسىن "شىعىس" شاعىن اۋدانىندا، مودۋلدىك جۇقپالى اۋرۋلار اۋرۋحاناسىنىڭ جانىندا ورناتىلدى. ءمۇسىننىڭ بيىكتىگى 1,2 م، ۇزىندىعى 3,8 م، ەنى 2,8 م، ول قولادان جاسالعان.

ايتا كەتەيىك، وبلىستىق "Jetisy Media" كمم تالدىقورعان قالاسىنىڭ وبلىس ورتالىعى مارتەبەسىن العانىنا 20 جىل تولۋىنا  وراي ەرلىك ىستەرىمنەن ەرەكشەلەنگەن تالدىقورعاننىڭ باتىرلارى تۋرالى بەينەروليك ءتۇسىردى، ۆيدەودا ءوز ءومىرىن قاتەرگە تىگىپ، وزگەنىڭ ءومىرىن ساقتاپ قالعان ادامدار بەينەلەنگەن.

Abai.kz