بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ بيۋرو وتىرىسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.

ءماجىلىس دەپۋتاتتار ازىرلەگەن قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرىنە قاتىستى زاڭ جوباسىن قارايدى.

قۇجات كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىلدىڭ ۇلتتىق جۇيەسىن جاقسارتۋ، سونداي-اق، اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبىنىڭ حالىقارالىق ستاندارتتارىن ىسكە اسىرۋ ماقساتىندا دايىندالدى.

سونىمەن قاتار، پالاتانىڭ الداعى جالپى وتىرىسىندا بىرقاتار راتيفيكاتسيالىق زاڭ جوبالارى تالقىلانباق. ولار: كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا كاسپي تەڭىزىن جەر ءۇستى كوزدەرىنەن جانە قۇرلىقتا جۇزەگە اسىرىلاتىن قىزمەت ناتيجەسىندە لاستانۋدان قورعاۋ جانە وسى كونۆەنتسياعا بيولوگيالىق ارالۋاندىلىقتى ساقتاۋ تۋرالى حاتتامالارىنا قاتىستى زاڭ جوبالارى.

Abai.kz