«سپورت دەگەن ءبىر سيقىردىڭ» (س. بەردىقۇلوۆ) كارى مەن جاستى بىردەي باۋ­رايتىن كەرەمەتى بار ەكەنىنە شەك كەلتىرۋگە بولمايدى. ەل نامىسى سىنعا تۇسەتىن وليمپيادا سەكىلدى ءدۇبىرلى حالىقارالىق جارىستاردا ونىڭ ۇلت رۋحىن اسقاقتاتار قۇدىرەتى تىپتەن عاجاپ. ءوزىن سىيلاعان قاي مەملەكەتتىڭ دە نامىسىن قولدان بەرمەس ءۇشىن سپورتشىلارىنىڭ دايىن­دىعىن ەرەكشە نازاردا ۇستايتىنى سوندىقتان. ءبىزدىڭ بيلىك تە ەلباسىدان باستاپ ەلدىك رۋحتى ۇلىقتاتار ساڭلاقتارىمىزدىڭ بابىن ۇنەمى باقىلاپ كەلەدى. كەشە اقوردادا مەملەكەتتىك حاتشى مۇحتار قۇل-مۇحاممەد مىرزانىڭ باسشىلىعىمەن وتكەن ەلىمىزدىڭ سپورت سالاسىنا قاتىستى كەلەلى كەڭەس سونىڭ ايعاعى.

كەڭەس بارىسىندا سپورت جانە دەنە شى­نىقتىرۋ اگەنتتىگىنىڭ توراعاسى تالعات ەر­مەگياەۆ لوندوندا وتەتىن الداعى وليم­پيا­دا­عا سپورتشىلاردىڭ دايىندىعى بو­يىنشا بايانداما جاساپ، مەملەكەتتىك حاتشى جال­پى ەل سپورتىنا قاتىستى وي-پىكىرلەرىن ورتاعا سالدى.

ەل سپورتشىلارىنىڭ الەۋەتى زور

القيسسا، جىلدىڭ ەڭ ايتۋلى سپورتتىق دوداسى بولىپ سانالاتىن جازعى وليمپيا­دا الاۋىن جاعۋعا از كۇن قالعاندا ءدۇيىم جۇرت وعان قاتىسار ءبىزدىڭ سپورت­شىلارى­مىز­دىڭ مۇمكىندىگى قانداي دەپ قوبالجىپ جات­قان بولار. بۇل قوبالجۋدى مەملەكەتتىك حاتشى كەڭەس بارىسىندا بىردەن سەيىلتىپ، سپورتشى­لارىمىزدىڭ الەۋەتى مول ەكەنىن اتاپ كورسەتتى. راسىندا دا، سەنىم ارتقان جىگىت­تەر مەن قىز­دارى­مىز بابى مەن باعىنا قاراي حالىق­ارالىق الەمدىك دودالار مەن ءتورت جىلدا ءبىر كەلەتىن وليمپيادا ويىن­دارىندا قازاق­ستاننىڭ قانجىعاسىن مايلاپ، مەرەيىمىزدى تاسىتىپ ءجۇر. جاس قازاق مەملەكەتىنىڭ ءانۇرا­نىن شىرقاتىپ، كوك تۋىمىزدى جەلبىرەتپەي قالعان ساتتەرى كەمدە-كەم. التىن جۇلدەلەر مەن قورجىن تولتىرعان كۇمىس، قولا جۇلدەلەر بارشىلىق. بەرىسى، ازيادا ويىندارىندا قىتاي، جاپون، وڭتۇستىك كورەيا سەكىلدى مىقتى­لار­دىڭ الدىن وراپ، كوماندالىق ەسەپتە ءبىرىنشى ورىنعا شىعۋىمىزدىڭ ءوزى ءبىزدىڭ سپورتشى­لا­رىمىزدىڭ الەۋەتى قانداي ەكەنىن كور­سەتسە كەرەك. سوعان وراي، سپورت­شىلارى­مىز­دىڭ الەۋەتى مول ەكەنىن اتاعان مۇحتار ابرار­ۇلى «قازىر الەم جۇرتشى­لىعىنىڭ نازارى لوندونعا اۋىپ وتىر، بارلىق مەملە­كەتتەر سپورتشىلارىن دايارلاپ، الەمدىك سپورت باسەكەسىنە ۇلكەن دايىندىقپەن كەلۋدە» ەكەنىن دە الدىمەن ەسكە سالدى. ويتكەنى مەم­لەكەت تە بۇگىنگى تاڭدا سپورت سالا­س­ىنا ايرىق­شا كوڭىل ءبولىپ، الەمدىك ستان­دارتتارعا ساي زاماناۋي سپورت كەشەندەرىن سالىپ، ەل يگىلى­گىنە تاپسىرىپ جاتىر. قارجىلاندىرۋ دا ارتىپ، شەت­ەلدىك بىلىكتى ماماندار باپكەرلىككە تار­تىلۋدا. «ەندەشە ءبىز لوندون وليمپيادا­سىندا ەلباسى­نىڭ وتاندىق سپورتقا دەگەن قامقورلىعىنا ساي لايىقتى ناتيجەگە قول جەتكىزۋىمىز كەرەك دەپ ەسەپتەيمىز»، - دەپ اتاپ كورسەتتى مەم­لەكەتتىك حاتشى.

مادەنيەتتىڭ تاجىريبەسى سپورت ءۇشىن دە ماڭىزدى

وسى جيىندا مەملەكەتتىك حاتشى جاس سپورت­شىلار ءۇشىن اسا ماڭىزدى تىڭ ۇسىنىس ايتتى. ول - تالانتتى جاستارعا وليمپيادا­لىق رەزەرۆ دايىندالاتىن ورىنداردا جات­تىعۋعا جول اشۋ. مۇحتار قۇل-مۇحاممەد مىر­زانىڭ ۇسىنىسىن قىسقا قايىرساق، جوعارى وقۋ ورىن­دارىندا وقيتىن جۇزۋگە قابىلەتتى تالانت­تى بالالار وليمپيادالىق رەزەرۆتىڭ باسسەينىندە، سول سەكىلدى اۋىر اتلەتيكامەن اينالىساتىن ستۋدەنتتەر دە وليمپيادالىق رەزەرۆتىڭ كومانداسىمەن بىرگە ارا-تۇرا جاتتىعىپ تۇرۋى كەرەك. بۇرىن مادەنيەتتى باس­قارىپ، قازىر دە تىكەلەي وسى سالانىڭ دا­مۋىن ايرىقشا نازا­رىندا ۇستاپ كەلە جاتقان مۇحتار ابرارۇلى بۇل رەتتە مادەنيەت قايراتكەر­لەرىنىڭ شەبەرلىك دارىستەر وتكىزۋ ءتاجىري­بەسىن العا تارت­قان ەدى. ونىڭ ايتۋىنشا، جاس سپورتشى­لار ءۇشىن پاتريوتتىق تاربيە دە وسىندايدان، «مەن وليمپيادا جۇلدەگە­رىمەن ءبىر زال­دا جاتتىقتىم» دەگەن ماقتا­نىش­تان باس­تال­ماق.

وليمپيادا جۇلدەگەرى سپورتتى ناسيحاتتاسىن

وليمپيادادا توپ جارعان ساڭلاقتارى­مىزدى ەل ارالاتىپ، باسىمىزعا كوتەرەتىن ادەتىمىزدىڭ بارى راس. بۇل ارينە جاقسى ادەت، بىراق كوبىنە ول قۇرمەتىمىز سپورتشى­نىڭ با­بى­نا كەرى اسەرىن تيگىزىپ جاتاتىنى دا شىندىق. وسىعان نازار اۋدارعان مەم­حاتشى: «ارينە، قازىرگى كەزدە ءبىزدىڭ سپورت­شى­لار­دىڭ ءبارىنىڭ نازارى وليمپياداعا اۋىپ كەتكەنى تۇسىنىكتى. بىراق قايتىپ كەلگەن­نەن كەيىن سىزدەر ارنايى جوسپار جاساۋلا­رى­ڭىز كەرەك. وعان ساي سپورت­شىلاردىڭ بارلىعى، اسىرەسە وليمپيا­دانىڭ چەمپيون­دارىن، كۇمىس، قولا جۇلدەگەرلەرىن ءوڭىر-وڭىرگە ءبولىپ جىبەرۋ كەرەك. وندا ولار توي تويلاپ، شاپان كيىپ، ات ءمىنىپ جۇرمەي، ستۋ­دەنت­تەردىڭ ورتاسىنا بارىپ، كەزدەسۋلەر ءوت­كىز­سىن. كوستيۋمدەرىن سپورتتىق كيىمگە ال­ماس­­تىرىپ، سپورت زالىندا سولارمەن بىرگە جاتتىقسىن. بۇل الدەقايدا ءتيىمدى بولادى دەپ ويلايمىن» - دەپ، قر سپورت جانە دەنە شىنىقتىرۋ اگەنت­تىگىنىڭ توراعاسى تالعات ەرمەگياەۆكە وسى ماسە­لەنى بىردەن ەس­كەرتتى.

انۇرانعا قاتىستى ولقىلىق ەندى قايتالانبايدى

كەڭەس بارىسىندا مۇحتار ابرارۇلى لوندون تورىندە ءانۇرانىمىزدىڭ لايىقتى شىرقالۋى تيىستىگىن ەسكە سالۋدى ۇمىتپاعان ەدى. مەملەكەتتىك تۋىمىز دا ستاندارتقا ساي بولۋى ءتيىس. سوعان وراي قر سپورت جانە دەنە شىنىقتىرۋ ىستەرى اگەنتتىگىنىڭ توراعاسى تالعات ەرمەگياەۆ لوندون تورىندە سپورتشى­لارىمىز توپ جارعاندا مەملەكەتتىك ءرامىز­دەردىڭ ءتيىستى دەڭگەيدە كورسەتىلۋىن قامتا­ماس­ىز ەتەتىن وكىل­دەر بەكىتىلگەنىن ءمالىم­دەدى.

دايىندىق ساقاداي ساي

وليمپياداشىلارىمىزدىڭ دايىندى­عىن قر پرەزيدەنتى اكىمشىلىگى باسشىسىنىڭ ورىنباسارى باعلان مايلىباەۆ تا جوعارى باعالاپ وتىر. «مەن الداعى وليمپيادا ويىن­دارىنىڭ باستالۋىنا ءبىزدىڭ قۇراما­نىڭ دايىندىق دەڭگەيى جوعارى ەكەندىگىن اتاپ وتكىم كەلەدى. بۇل رەتتە، اسىرەسە ت.ەرمەگياەۆتىڭ باسشىلىعىمەن اگەنتتىك جۇرگىزىپ وتىرعان يدەولوگيالىق باعىتتاعى جۇمىستاردىڭ جو­عارى دەڭگەيىن اتاپ وتكەن ورىندى. ار-وجدان كودەكسىنىڭ ازىرلەنىپ، ونىڭ بەكىتىلۋى وتە ءساتتى بولعان جوبا دەپ ەسەپ­تەيمىن. «مەنىڭ ويىم­شا، قۇراما ءبۇ­گىن­دە جوعارى ناتيجە كورسەتۋگە دايىن»، - دەدى ب.مايلىباەۆ كەڭەس بارى­سىندا.

لوندوننان بارلىعى 13 مەدال كۇتەمىز

سپورت اگەنتتىگى توراعاسىنىڭ ايتۋىنشا، سونىڭ ۇشەۋى التىن بولادى دەگەن ءۇمىت بار. «وليمپيادا بويىنشا ەشقانداي پروب­لەما جوق. دايىندىعىمىز وتە جوعارى دەڭ­گەيدە ءوتىپ جاتىر. باپكەرلەر مەن سپورت­شىلارعا بارلىق جاعدايلار جاسال­دى. ەندى سپورتشى­لارىمىزعا ساتتىلىك تىلەي­مىز»، - دەيدى ول.

اۆتور: ايبىن باقىتۇلى

"الاش ايناسى" گازەتى