بۇگىن ءماجىلىستىڭ جالپى وتىرىسىندا دەپۋتاتتار «ونەركاسىپتىك ساياسات تۋرالى» زاڭ جوباسىن ءبىرىنشى وقىلىمدا ىلەسپە تۇزەتۋلەرىمەن  ماقۇلدادى.

ءماجىلىس توراعاسى نۇرلان نىعماتۋلين اتالعان قۇجات وڭدەۋ ونەركاسىبىن دامىتۋ جانە ونەركاسىپ سالاسىنىڭ ينۆەستيتسيالىق تارتىمدىلىعى مەن ەكسپورتتىق الەۋەتىن ارتتىرۋعا باعىتتالعانىن اتاپ ءوتتى.

وسى قۇجاتتاعى جاڭالىقتارىنىڭ ءبىرى - مەملەكەتتىك قولداۋ شارالارىن الۋشى كاسىپورىندار ءۇشىن قارسى مىندەتتەمەلەردى بەلگىلەۋ. ياعني، مەملەكەت ينۆەستيتسيالانعان اقشادان ناقتى ناتيجە كۇتۋگە قۇقىلى.

بۇل رەتتە، ءماجىلىس توراعاسى نۇرلان نىعماتۋلين مەملەكەتتىك قولداۋ شارالارىن الۋ كەزىندە بيزنەسكە مۇمكىن ەمەس مىندەتتەمەلەردى جۇكتەمەۋ كەرەكتىگىنە نازار اۋداردى.

- ماسەلەن، مەملەكەتتەن قولداۋ كۇتكەن كاسىپكەر، ءوز بيزنەسىن قالاي جوسپارلايدى؟ ويتكەنى، ول وزىنەن نە تالاپ ەتىلەتىنىن بىلمەيدى عوي. وسى زاڭ جوباسىنىڭ ۇكىمەتتىك نۇسقاسىندا دا انىق كورسەتىلىپ تۇر. كاسىپكەر قاتاڭ تالاپتان قۇتىلۋ ءۇشىن شەنەۋنىكتىڭ الدىنا بارىپ، ءوتىنىش جاساۋىنا تۋرا كەلەدى. ءارى قاراي تۇسىنىكتى. شەنەۋنىككە ەشقانداي باقىلاۋسىز شەشىم قابىلداۋعا مۇمكىندىك بەر، بىردەن سىبايلاستىق قۇقىقبۇزۋشىلىققا جول اشادى. سوندىقتان، بۇل نورمانى ۇكىمەتتىك نۇسقا بويىنشا قالدىرۋعا بولمايدى، - دەدى ءماجىلىس توراعاسى.

سونىمەن قاتار، نۇرلان نىعماتۋلين مەملەكەتتىك قولداۋعا جۇگىنگەن كاسىپكەرلەرگە تالاپتى قاتاڭداتۋعا بولمايتىنىنا نازار اۋداردى. وسىعان سايكەس، جۇمىس توبىنا جاۋاپتى مينيسترلىكپەن بىرگە ەكىنشى وقىلىمعا دەيىن ءتيىستى مىندەتتەمەلەر جونىندەگى نورمانى ناقتى، انىق جانە تۇسىنىكتى ەتىپ تولىقتىرۋ قاجەتتىگىن ايتتى.

Abai.kz