تاياۋدا سۋرەتشى الماس سىرعاباەۆتىڭ تۇركيانىڭ بىرنەشە قالالارىندا جەكە كورمەلەرى ءوتتى. ىستامبۇل قالاسىنىڭ مادەنيەت باسقارماسى مەن حالىقارالىق «ديالوگ ەۋرازيا» پلاتفورماسى ۇيىمداستىرعان العاشقى كورمەنىڭ اشىلۋىندا ىستامبۇل جۇرتشىلىعىنىڭ اتىنان ءسوز سويلەگەن ساليح دوعان ەكى ەلدىڭ ورتاق مادەني قۇندىلىقتارىنا توقتالدى. ول قازاق پەن تۇرىك حالىقتارىنىڭ تانىمدارىنداعى ۇقساستىقتارعا، ونەردەگى ورتاق ادىستەرگە كەڭىنەن ءمان بەرىپ، سۋرەتشىنىڭ كارتينالارىنا جوعارى باعا بەردى.

«دا» پلاتفورماسىنىڭ قازاق­ستانداعى وكىلى، قالامگەر، «سەرپەر» جاستار سىيلىعىنىڭ لاۋرەاتى مالىك وتارباەۆ ەكى ەل اراسىنداعى مادەني بايلانىستارعا كەڭىرەك توقتاپ، سۋ­رەتشى الماس سىرعاباەۆتىڭ شىعار­ماشىلىعىنداعى كوشپەلى حالىقتار داستۇرلەرى مەن وزگەشە بوياۋلار جايىن­دا ءوز باعاسىن بەردى. قازاق­ستاننان بارعان ءبىر توپ قوناقتىڭ ىشىنەن جازۋشى، جۋرناليست، «اقيقات» جۋرنالىنىڭ ءبولىم رەداكتورى وراز قاۋعاباي ءسوز الىپ، كورمەنى ۇيىم­داستىرۋشىلارعا العىسىن ءبىلدىردى.
الماستىڭ تۇركياداعى كورمەسى يزميت قالاسىندا جالعاستى.
«Seka - park» اتتى ساياباقتىڭ ادام­دار ەڭ كوپ جۇرەتىن جەرىندە سۋ­رەتشى الماس سىرعاباەۆتىڭ كورمەسى قويىلىپ، وعان ونەرگە سۋساعان حالىق قاتىسىپ، كورىپ، سۋرەتشىگە ءوز اسەر­لەرىن ايتىپ جاتتى. سۋرەتشى وسى كور­مەگە اكەلگەن ەڭ تاڭداۋلى دەگەن 18 كارتيناسىنا شولۋ جاساپ، جۇرت­شىلىققا قىسقاشا تانىستىرىپ شىقتى. بۇل كارتينالاردىڭ تاقىرىپ­تىق ۇقساستىعى - قازاق جەرىنىڭ، ءما­دەنيەتىنىڭ ەرەكشەلىكتەرى. قازاقتىڭ تاريحىنا، مادەنيەتى مەن ونەرىنە، سالت-ءداستۇر، ادەت-عۇرىپتارىنا بايلانىستى جۇمىستارى سۋرەتشىنىڭ شەبەرلىگىن تانىتا ءتۇستى. «حان ءتاڭىرى» سەرياسىمەن سالىنعان سۋرەتتەر، «ب.مومىشۇلى»، «كۇتۋ»، «مايگۇل»، «كوش»، «بايىنقول»، «دالا توسىندەگى جىلقىلار»، م. ماقاتاەۆتىڭ شىعار­ماسى بويىنشا سالىنعان «شەشە، سەن باقىتتىسىڭ» سياقتى كارتينالار كورەرمەندەرگە قاتتى ۇنادى.
سۋرەتشىنىڭ كەلەسى كورمەسى بۇرىن­عى وسمان يمپەرياسىنىڭ العاشقى استاناسى - بۋرسا قالاسىندا ءوتتى. بۇل كورمە دە كەلۋشىلەردىڭ ويلا­رىنان شىقتى.

اقتان قوڭىر