قر پرەزيدەنتى ق.توقاەۆتىڭ بيىلعى جولداۋى پاندەميادان كەيىنگى احۋالدى ەسكەرە وتىرىپ، ەكونوميكانى قالپىنا كەلتىرۋمەن قاتار، الەۋمەتتىك جانە مادەني ءومىردى جاقسارتۋعا باعىتتالدى دەپ ويلايمىن.

جۇمىس ورىندارىن اشۋ مەن ساقتاپ قالۋ ماقساتىندا «قاراپايىم زاتتار ەكونوميكاسى» مەن «بيزنەستىڭ جول كارتاسى» باعدارلامالارىنىڭ مەرزىمى 2022 جىلعا ۇزارتىلدى. بيۋدجەتتىڭ تابىس كوزدەرىن ۇلعايتۋ، مەملەكەت شىعىندارىن باقىلاۋ، ونىڭ تيىمدىلىگىن قاداعالاۋدى تاپسىردى. جىل سايىن ازىق-تۇلىك، كيىم-كەشەكتىڭ باعالارى وسۋدە، بىلتىر كوممۋنالدىق قىزمەتتەردىڭ تاريفتەرى دە كوتەرىلدى. پرەزيدەنت ازىق-تۇلىكتەردىڭ باعالارىن باقىلاۋدا ۇستاپ، ءتيىستى شارالاردى قولعا الۋعا تاپسىرمالار بەردى.

كاسىپوداقتاردىڭ كوپتەن كوتەرىپ جۇرگەن ماسەلەسى – جۇمىسشىلاردىڭ ەڭ تومەنگى جالاقى مولشەرىن كوتەرۋ بولدى. اسىرەسە، بيۋدجەتتىك مەكەمەلەر مەن كاسىپورىنداردا ەڭبەك ەتەتىن تەحنيكالىق قىزمەتكەرلەر، جۇرگىزۋشىلەردىڭ ەڭبەكاقىسىنىڭ كولەمى وتە از. مىسالى، اۋرۋحانانىڭ كولىك جۇرگىزۋشىسى ۇستەمە جانە تۇنگى ساعاتتارىن قوسا العاندا ايىنا 60-70 مىڭ تەڭگە الىپ جۇرسە، كەلەر جىلدان باستاپ 85-90 مىڭعا دەيىن كوتەرىلەتىن بولادى. جالاقىنى كوتەرگەنى – ماڭداي تەردىڭ وتەلگەنى.

سونىمەن قاتار، جولداۋدا ەڭبەكاقى ماسەلەسىنە كوڭىل ءبولىنىپ وتىر. اتاپ وتكەندەي، ەڭ تومەنگى جالاقىنىڭ مولشەرى، جۇمىسشىلاردىڭ جالاقىسىن كوبەيتۋگە ىنتالاندىراتىن ۇتىمدى شارالاردى ازىرلەۋ، مادەنيەت، مۇراعات، كىتاپحانا قىزمەتشىلەرىنە، قورىقشىلار، كولىك جۇرگىزۋشىلەرگە 2022-2025 جىلدارى ەڭبەكاقىنى جىل سايىن 20 پايىزعا ارتتىرۋ، جۇمىس بەرۋشىلەر ءۇشىن ەڭبەكاقى تولەۋ قورىنان ەسەپتەلەتىن سالىقتاردى 34 پايىزدان 25 پايىزعا تومەندەتۋ سياقتى ماسەلەلەر شەشىلۋدە.

ءاربىر جۇمىسشى ءوزىنىڭ ەڭبەكاقىسى، سالىق ۇستالۋىن، زەينەتاقى جارناسىنىڭ اۋدارىلۋىنا كوپ كوڭىل ءبولۋ كەرەك، ەڭبەكاقىنى كونۆەرتپەن الاتىن تالاي جۇمىسشىلار زەينەتاقى جيناعى بولماعاندىقتان باسپانالى بولۋعا مۇمكىندىكتەرى بولماي قالدى. سوندىقتان مەملەكەت باسشىسى زەينەتاقى جيناعىنىڭ جەتكىلىكتى مولشەرىنىڭ شەگىنەن اساتىن بولىگىن تۇرعىن-ءۇي ساتىپ الۋ ماقساتىندا «وتباسى بانكىندەگى» ەسەپشوتقا اۋدارۋعا رۇقسات بەرۋدى قاجەت دەپ ساناپ وتىر.

كەلەشەكتە بىرنەشە كاسىپتەر اۆتوماتتاندىرۋ مەن تسيفرلاندىرۋ پروتسەسى ناتيجەسىندە قاجەت بولماي قالادى، زاماننىڭ تالابىنا ساي ماماندىقتاردى وزگەرتۋگە تۋرا كەلەدى، جاڭا كاسىپتەردى يگەرۋ قاجەت ەتىلەدى. وسىعان وراي «كاسىبي بىلىكتىلىكتەر تۋرالى» زاڭ شىعارىپ بىلىكتىلىكتى تانۋ ماسەلەسىن رەتتەپ، جۇمىسشىلاردى ءوزىنىڭ قارىم-قابىلەتىن جەتىلدىرۋگە ىنتالاندىراتىن بولادى. مەنىڭ ويىمشا، پرەزيدەنت قاسىم-جومارت توقاەۆ ەڭبەك ادامىن الەۋمەتتىك-ەكونوميكالىق تۇرعىدان ىنتالاندىرۋدىڭ ماڭىزدى شارالارىنا باستاماشى بولدى ەسەپتەيمىن.

جاكۋپوۆ ايدار داۋرەنوۆيچ، كاسىپكەر

Abai.kz