قىرعىزستاننىڭ ۇلتتىق قاۋىپسىزدىك كوميتەتى باسشىسى قامشىبەك تاشيەۆ ەلدىڭ تۇركيالىق جانە رەسەيلىك درونداردى ساتىپ الاتىنىن مالىمدەدى.

«ءبىز بۇل جابدىقتى مەملەكەتتىك بيۋدجەت ەسەبىنەن ساتىپ الامىز. كوپ ۇزاماي تۇركيادان «بايراكتار» جەتكىزىلەدى، مۇنداي قارۋ الەمنىڭ 5 ەلىندە عانا بار، ءبىز دە سولاردىڭ ءبىرى بولامىز. ءبىزدىڭ ۇشقىشسىز باسقاراتىن ماماندارىمىز دا سول جەردە دايىندالادى. ءبىز رەسەيدەن Orlan-10E دروندارىن ساتىپ الامىز، بۇعان مەملەكەتتىك بيۋدجەتتەن قارجى دا ءبولىندى»,-دەدى تاشيەۆ.

بىراق ول قانشا درون ساتىپ الىنعانىن جانە ولاردى ساتىپ الۋعا مەملەكەتتىك بيۋدجەتتەن قانشا اقشا بولىنگەنىن ناقتىلامادى.

ورتالىق ازيا ەلدەرىنىڭ ىشىندە ازىرگە تۇركيالىق سوققى جاساۋشى دروندار تۇركىمەنستان ەلىندە بار. ونى تۇركىمەنستان تاۋەلسىزدىگىنىڭ 30-جىلدىعىنا وراي وتكەن اسكەري پارادتا اشحاباد كورسەتتى. سالتاناتتى شەرۋدە ءۇش سوققى جاساۋشى درون الاڭدا بايقالدى. ولار تۇركيالىق «بايراقتار تب2» سوققى جاساۋشى دروندارى بولاتىن.

تۇركيالىق درونداردىڭ ساۋداسى قاراباق سوعىسىنان كەيىن قىزا ءتۇستى. سەبەبى ازەربايجان باسقىنشى ارميان كۇشتەرىن ءدال وسى درونداردىڭ كومەگىمەن ءوز تاريحي جەرىنەن ىسىرىپ شىعاردى. ءار اسكەري وپەراتسيانىڭ ۆيدەوسى ارنايى سايتتار مەن ازەربايجان قورعانىس مينيسترلىگىنىڭ پاراقشاسىندا جاريالانىپ وتىردى. ونى كۇللى الەم كوردى. بايراقتاردىڭ مۇمكىندىكتەرىنە تاڭداي قاعىپ جاتتى. سەبەبى بۇعان دەيىنگى سوعىستاردا دا سوققى جاساۋشى دروندار قولدانىلىپ كەلسە دە، ءدال قاراباقتاعىداي ماسشتابتا قولدانۋ ءبىرىنشى مارتە ورىن الدى. تۇركيا ءوز دروندارىن سيريا مەن ليۆيادا دا ءساتتى قولدانا ءبىلدى. سيريادا 2020 جىلدىڭ اقپانى مەن ناۋرىز ايىندا اساد كۇشتەرىن ىعىستىرسا، ليۆيادا رەسەيشىل حافتاردىڭ اسكەرىن تالقانداپ تاستادى. سوندىقتان ءۇش بىردەي الەم ەلىندە سوعىس جۇرگىزگەن بۇل دروندار ۇرىس دالاسىندا ءوز تيىمدىلىگىن ناقتى كورسەتتى. وعان قىزىعۋشىلار مەن ساتىپ الۋشىلار سانى ارتتى.

تۇركيالىق دروندارعا قىزىعۋشىلىق تانىتۋشىلاردىڭ باسىم بولىگى ورتالىق ازيا ەلدەرى. وعان ەكى سەبەپ بار. بىرىنشىدەن، ورتالىق ازيا ەلدەرىنىڭ تورتەۋى تۇركى تىلدەس ەلدەر. ەكىنشىدەن، باسىم بولىگى اتالمىش درونداردىڭ ۇرىستاعى تاجىريبەسىنە كوزدەرى جەتتى جانە انكارامەن ءوزارا ارىپتەستىك ورناتا بىلگەن.

قازاقستان دا سوققى جاساۋشى درونداردى ساتىپ الۋعا ۇمتىلۋدا. قازىر ەلىمىزدىڭ اۋە كەڭىستىگىن كۇزەتۋدە قىتايلىق سوققى جاساۋشى Wing Loong دروندارى بار. سونداي-اق SkyLark دروندارى بارلاۋ جانە باقىلاۋ قىزمەتتەرىن اتقارۋدا. وتاندىق «شاعالا» بارلاۋ درونى جاقىندا سىناقتان ءساتتى ءوتتى. ەندى رەسمي نۇر-سۇلتان تۇركيالىق «بايراقتار» ساتىپ الۋعا وقتالىپ وتىر. كەلىسسوزدەر باستالىپ تا كەتتى دەيدى. اشىق اقپارات كوزدەرىنە سەنسەك، انكارانىڭ ءونىمى داناسىنا 4 ملن دوللاردى قۇرايدى-مىس. قورعانىس سالاسى ءۇشىن كوپ قارجى ەمەس.

اسحات قاسەنعالي

Abai.kz