ارون اتابەكتىڭ جاقىندارى ونىڭ تۇرمەدەگى قولجازبالارى ساقتالعان سومكەسىن تابا الماي ءجۇر. تۋىستارىنىڭ ايتۋىنشا، الماتىعا ۇشاردا سومكەنى قانداي دا ءبىر سەبەپتەرمەن اتابەككە بەرىلمەگەن.

قازاقستانداعى ادام قۇقىقتارى جونىندەگى ۋاكىل ەلۆيرا ءازىموۆا  ارون اتابەكتىڭ جاعدايىنا قاتىستى پىكىر ءبىلدىردى. باق 15 جىلدان كەيىن بوستاندىققا شىققان اتابەكتىڭ جانساقتاۋ بولىمىندە جاتقانىن جازدى.

ومبۋدسمەن بۇرىنعى تۇتقىننىڭ قازىرگى جاعدايىنان بەيحابار ەكەنىن مويىندادى.

«مەن ونىڭ جانساقتاۋ بولىمىندە جاتقانىن بىلمەيمىن، بىراق بەيرەسمي دەرەككوزدەردەن ونىڭ سول جاقتا ەكەنىن ەستىدىم. الايدا ناقتى ايتا المايمىن، دارىگەرلىك قۇپيا دەگەن بار. وزدەرىڭىزگە ءمالىم، ول تۇرمەدەن دەنساۋلىعىنا بايلانىستى بوساتىلعان ەدى»، – دەدى ءازىموۆا ءماجىلىس كۋلۋارىندا.

بۇعان دەيىن اتابەكتىڭ وتباسى ونى تولىعىمەن اقتاۋ، شەتەلگە شۇعىل ەمگە ۇشىپ شىعۋ ءۇشىن باس بوستاندىعىن شەكتەۋ جازاسىن الىپ تاستاۋ ءۇشىن كۇرەسەتىنىن مالىمدەگەن ەدى.

ايتا كەتەيىك، ارون اتابەك 2006 جىلى بولعان «شاڭىراق ءىسى» بويىنشا 18 جىلعا سوتتالدى.

Abai.kz