الەۋمەتتىك جەلىلەردە جاركەنت ماڭىنداعى پەنجىم اۋىلىندا جاپپاي توبەلەس بولعانى جايلى ۆيدەولار مەن جازبالار قاپتاپ كەتتى. توبەلەس قازاق جانە ۇيعىر ۇلتىنىڭ اراسىندا بولعانى جايلى دا ايتىلۋدا. الايدا ناقتى اقپارات ءالى بەلگىسىز. 

الماتى وبلىسىنىڭ پوليتسيا دەپارتامەنتى وقيعاعا قاتىستى مالىمدەمە جاسادى. دەپارتامەنت 27-قازان كۇنى، ساعات 20:00-دە "102" جەلىسىنە قوڭىراۋ شالىپ، پەنجىم اۋىلىنداعى وقۋشىلار اراسىنداعى توبەلەسكە قاتىسقان ءبىر وقۋشىنىڭ ءۇيىنىڭ الدىنا 30 شاقتى ادامنىڭ جينالعانى تۋرالى حابارلاما كەلىپ تۇسكەن.

ء"بىر توپ ادام بىرقاتار جەكە تۇرعىن ۇيلەردىڭ تەرەزەلەرىن سىندىرىپ، سونداي-اق بىرنەشە كولىكتى قيراتقان. بۇل فاكتى بويىنشا قر قىلمىستىق كودەكسىنىڭ 293-بابىنىڭ 2-بولىگىمەن ("بۇزاقىلىق") قىلمىستىق ءىس قوزعالدى" دەلىنگەن حابارلامادا.

سونداي-اق، پوليتسيا اۋىلداعى ۇيلەردىڭ بىرىندە ءورت شىققانى تۋرالى اقپاراتقا قاتىستى تۇسىنىكتەمە بەردى.

"ساعات 22:45-تە پانفيلوۆ اۋداندىق پوليتسيا ءبولىمىنىڭ كەزەكشى بولىمىنە پەنجىم اۋىلىندا ورنالاسقان ۇيدە ءورت شىققانى تۋرالى حابارلاما كەلىپ ءتۇستى. وقيعا ورنىنا اۋداندىق ىشكى ىستەر ءبولىمى مەن تجب كەزەكشى وتريادتارى جەتتى. ءۇي يەسىنىڭ ايتۋىنشا، ءورتتىڭ شىعۋىنا پەش جۇيەسىنىڭ اقاۋى سەبەپ بولعان. ساعات 23:30 شاماسىندا ءورتتىڭ وشاعى انىقتالدى. زارداپ شەككەندەر جوق. بۇل ءورتتىڭ وقيعاعا ەش قاتىسى جوق", - دەدى پوليتسيا. سونىمەن بىرگە پوليتسيا قازىرگى تاڭدا اۋىلدا قوعامدىق ءتارتىپ قامتاماسىز ەتىلىپ، جاعداي باقىلاۋدا ەكەنىن اتاپ ءوتتى.

پەنجىم اۋىلىنداعى وقيعا مەكتەپ وقۋشىلارى اراسىنداعى توبەلەستەن باستالعان. پوليتسيانىڭ مالىمەتىنشە 27 قازاندا الماتى وبلىسىنداعى پەنجىم اۋىلىنداعى مەكتەپ اۋماعىندا جاپپاي توبەلەس بولىپ، ونىڭ سالدارىنان 16 جاستاعى ءجاسوسپىرىم اۋرۋحاناعا جەتكىزىلگەن.

الماتى وبلىستىق پوليتسيا دەپارتامەنتىنىڭ ءباسپاسوز قىزمەتى جەتكىنشەكتەردىڭ توبەلەسىنە 9-10-سىنىپتىڭ ەكى وقۋشىسى اراسىندا تۋىنداعان اۋىزشا كيكىلجىڭ سەبەپ بولعانىن ايتادى.

"اتالعان فاكتى بويىنشا قىلمىستىق كودەكستىڭ 106-بابىنىڭ 2-بولىگى بويىنشا قىلمىستىق ءىس قوزعالدى. جانجالدىڭ بارلىق تاراپتارى انىقتالدى. قازىرگى ۋاقىتتا جابىرلەنۋشىنىڭ جاعدايى تۇراقتى، وعان قاجەتتى مەديتسينالىق كومەك كورسەتىلدى", - دەدى پوليتسيا اقپاراتىندا.

Abai.kz