تىنىق مۇحيتتىڭ سولتۇستىگىندە ءبىر كيتتىڭ ءوز ۇيىرىمەن تىلدەسە الماي جۇرگەنىنە جيىرما جىلدان اسىپتى. سەبەبى، باسقا جيىلىكتە سويلەيدى. الەمدەگى جالعىزىلىكتى سول كيتتىڭ اتى «52 گەرتس». بۇل كيت مۇحيتتان مۇحيت قويماي، جالعىزدان جالعىز سابىلىپ، ءوز ءۇيىرىن ىزدەۋمەن ءجۇر. باسقا كيتتەرمەن سويلەسپەيىن دەمەيدى، سويلەسكىسى كەلەدى-اق. بىراق بۇل كيت وتە جوعارى جيىلىكتى ءان سالعاندىقتان، باسقالارى مۇنى ەستىمەيدى. ەشبىرى وعان جاۋاپ قاتا المايدى. قالعان كيتتەر – 15-25 گەرتس جيىلىگىندە سويلەسەدى. بۇل ەداۋىر ايىرماشىلىق. الگى كيتتىڭ تاعدىرى جالعىزدىق بولسا كەرەك. ءومىردى جالعىزدىقتا وتكىزۋدىڭ قيامەتىن ويلاپ كورىڭىزشى. ءسىزدى قايدام، جالعىزدىق دەگەننەن ءوزىمنىڭ زارەم كەتەدى. قالىڭ تولقىنمەن جۇزگەن سول جالعىز كيت ۇيىرلەستەرىن ىزدەپ، تىنىم تاپپايدى. شاماسى كەلگەنشە ءان سالۋمەن كۇنىن وتكىزەدى. كۇن وتكەن سايىن ءۇمىتى ۇزىلۋدە. بالكىم، ول كيت، ەشتەڭە سەزبەيدى، تۇسىنبەيدى دەرسىز. تۇسىنەدى! سەزگەندە قانداي! ۇلكەن تۇمسىعىن قاپ-قارا، ءتۇپسىز تۇڭعيىققا تىعىپ، جوق ىزدەۋمەن كەلەدى. ىزدەيدى، شىڭعىرادى، جاۋاپ جوق. كيتتىڭ مۇنداي تاعدىرىنا كىم كىنالى؟ جاراتقان ونىڭ داۋىسىن نەگە 52 گەرتس ەتتى؟ نەگە ونى ماڭگى تاس تۇنەكتە قالدىردى؟

ال ەندى سۇراق: ءوزىڭىزدى جالعىزبىن دەپ ويلايسىز با؟ ءسىز تەكتەس جاراتىلىستىڭ ورتاسىندا ءومىر ءسۇرىپ جاتىرسىز. كۇندە كورەتىن، ەستيتىن، سەزەتىن، سويلەسە الاتىن ورتادا ءجۇرىپ، الدەنە سۇراۋعا، تۇسىندىرۋگە، تالقىلاۋعا مۇمكىندىگىڭىز بار. ال كيتتىڭ ونداي مۇمكىندىگى جوق. ونىڭ بار قالاۋى ءۇيىرىن تابۋ. بىراق بۇنىسى ورىندالمايتىن تىلەك.
سىزدەگى جالعىزدىق – جان جالعىزدىعى. بۇل ءوز تاڭداۋىڭىز. ءبىر جەردە ءسىزدى تۇسىنبەدى. ءبىر جەردە قابىلدامادى. وندا ويلانىڭىز، وزگەرىڭىز، ناتيجە شىعارىڭىز. ول قولىڭىزدان كەلەدى عوي.

كيتتىڭ تىلەگى – ءتان جالعىزدىعى. ماڭگى جالعىزدىق. ول ونى وزگەرتە المايدى.
ادام جالعىزدىقتا ءبىر كۇن، ەكى كۇن قالادى. اپتا وتەر، اي بولار. سودان سوڭ ۇرەي باستالادى. باسقالاردى كورسەم، الدەكىممەن اڭگىمەلەسسەم دەپ ادام ىزدەيدى. ءبىر شىنىاياق شاي نەمەسە كوفە ىشەتىن سەرىك ىزدەيدى. تەك جالعىز قالماسام دەيدى عوي.

كيتتىڭ جالعىزدىقتا جۇرگەنىنە جيىرما جىل. ونى قۇتقاراتىن ەشكىم جوق. جالعىزدىعىنان شىعاتىن جول دا جوق. ال ءسىز ءوزىڭىزدى ء(الى دە) جالعىزبىن دەپ ويلاپ وتىرسىز با؟!

شىنار ءابىلدا

Abai.kz