«قازمۇنايگاز» جانار-جاعارماي ستانتسيالار جەلىسى جەكەشەلەندىرىلگەننەن كەيىن ءبىر جارىم جىلدان سوڭ ونىڭ قۇرىلتايشىلارى قاتارىنا «Joint Technologies» جشس ەندى, - دەپ جازادى centralasian.org.

بۇل جاۋاپكەرشىلىگى شەكتەۋلى سەرىكتەستىك ەكس-پرەزيدەنت نۇرسۇلتان نازارباەۆتىڭ كۇيەۋبالاسى تيمۋر قۇلىباەۆ («كيپروس» جشس ارقىلى) پەن راۋشان ساعديەۆاعا تيەسىلى. بۇل جونىندە 4 قاراشادا كومپانيا قۇجاتتارىنا سۇيەنگەن Forbes سايتى جازدى.

سايت اقپاراتىنشا، قازىر Qazaq Oil دەگەن اتقا كوشىرىلىپ جاتقان «قازمۇنايگاز» ستانتسيالار جەلىسى 2019 جىلى ساۋىردە جەكەشەلەندىرىلگەن. كەلىسىم قۇنى 60,5 ملرد تەڭگە (سول كەزدەگى كۋرس باعامىمەن 163,3 ملن دوللار) بولعان. قازىر ستانتسيالار جەلىسى PetroRetail كومپانياسىنا قارايدى.

كومپانيا سايتىنداعى مالىمەتكە قاراعاندا، رەسپۋبليكا بويىنشا «قازمۇنايگاز» ستانتسيالار جەلىسىنە 342 جانار-جاعارماي ستانتسياسى كىرەدى.

Forbes جازۋىنشا، «PetroRetail» قۇرىلتايشىلارىنىڭ اراسىندا ودان بولەك «Prime case» جشس (قازاقستانداعى ەڭ ىقپالدى كاسىپكەرلەر تىزىمىنە ەنگەن دانيار ابىلعازين مەن «Head company» جشس-عا تىركەلگەن) مەن رۋفات حودجالاكوۆ (اتىراۋ وبلىسىنىڭ اۋىر اتلەتيكا فەدەراتسياسىنىڭ توراعاسى، «قازمۇنايگاز» وڭدەۋ ماركەتينگ جەتەكشىسى بولعان) بار.

«Head company» كومپانياسىنىڭ قۇرىلتايشىسى – بۇرىن قارجى مينيسترلىگىندە لاۋازىمدى قىزمەت اتقارعان، ۇلتتىق كاسىپكەرلەر پالاتاسى پرەزيديۋمىنىڭ مۇشەسى باۋىرجان تويبازاروۆ.

«PetroRetail» – تيمۋر قۇلىباەۆ پورتفەلىندەگى مۇناي ونىمدەرىمەن اينالىساتىن جالعىز اكتيۆ ەمەس. ونىڭ «GasEnergy» دەگەن اتپەن بەلگىلى ديزەل جانە بەنزين ساتۋمەن اينالىساتىن «اۆتوگاز ترەيد» كومپانياسىندا دا ۇلەسى بار. جەلى قازاقستاننىڭ ءىرى التى قالاسىندا جۇمىس ىستەيدى، 41 جانار-جاعارماي كەشەنى مەن ءتۇرلى تاسىمالداۋشىلاردا 115 گاز مونوبلوگى بار.

امەريكانىڭ Forbes جۋرنالى بيىل ساۋىردە تيمۋر قۇلىباەۆ پەن ونىڭ ايەلى دينارانىڭ (نازارباەۆتىڭ ورتانشى قىزى) جيىنتىق بايلىعى 5,6 ميلليارد دوللار (ارقايسىسىندا 2,8 ميلليارد دوللاردان) دەپ باعالاعان. ەرلى-زايىپتى قۇلىباەۆتار ءوز مەنشىگىندەگى «المەكس» كومپانياسى ارقىلى ەلدەگى ەڭ ءىرى كوممەرتسيالىق بانك – حالىق بانككە يەلىك ەتەدى. بيىل تيمۋر قۇلىباەۆ ەلدەگى ەڭ ءىرى اۋەجاي – الماتى اەروپورتىن تۇرىك حولدينگىنە 365 ميلليون دوللارعا ساتتى.

54 جاستاعى تيمۋر قۇلىباەۆ – «KAZENERGY» مۇنايگاز جانە ەنەرگەتيكا كەشەنى ۇيىمدارىنىڭ قازاقستاندىق اسسوتسياتسياسى جەتەكشىسى، رەسەيلىك «گازپروم» كومپانياسى ديرەكتورلار كەڭەسىنىڭ مۇشەسى ءارى قازاقستان ۇلتتىق وليمپيادا كوميتەتىن، قازاقستان بوكس فەدەراتسياسىن باسقارادى.

Abai.kz