ساياساتكەر الەكسەي ناۆالنىيمەن ءبىر كولونيادا وتىرعان ناريمان وسمانوۆ پەن ەۆگەني بۋراك "دوجد" تەلەارناسىنا وپپوزيتسيونەرگە قاماۋدا قالاي قىسىم كورسەتىلگەنى تۋرالى ايتىپ بەردى.

وسمانوۆتىڭ سوزىنە قاراعاندا، كولونياداعى وترياد ناۆالنىيعا قىسىم كورسەتۋ ماقساتىندا ارنايى جاساقتالعان. وتريادتاعىلاردىڭ بارىنە ناۆالنىيمەن سويلەسپەۋدى، ونىڭ ءاربىر قادامىن جازىپ وتىرۋدى الدىن الا ەسكەرتكەن.

ەۆگەني بۋراكتىڭ "دوجد" تەلەارناسىنا بايانداۋىنشا، كولونيادا كەم دەگەندە ون ادام ناۆالنىيعا ۇنەمى جۇرگەن. ساياساتكەر اجەتحاناعا بارعان ۋاقىتتا دا ونىڭ سوڭىنان قالماعان. ولار ۇنەمى وپپوزيتسيونەردى ارانداتۋمەن بولعان. الايدا ناۆالنىي ولاردىڭ ارانداتۋشىلىق ارەكەتىنە كونبەگەن.

وسمانوۆتىڭ ايتۋىنشا، كولونيادا ناۆالنىيدى جازاسىن وتەۋشىلەر الدىندا جاماناتتى ەتۋ ماقساتىندا فيلم كورسەتىلگەن. "بۇل ءدارىستى مەكەمەدەگىلەردىڭ بارىنە كورسەتكەن. فيلمدەگى باستى وي - ونىڭ [ناۆالنىيدىڭ] ءداستۇرلى ەمەس جىنىستىق كوزقاراستا ەكەنىنە سەندىرۋ", – دەيدى وسمانوۆ. ونىڭ ايتقاندارىن ەۆگەني بۋراك تا راستادى.

وسمانوۆ ساياساتكەردىڭ كولونيادا اشىققانى تۋرالى دا ايتىپ بەردى. اشىعۋ كەزىندە ناۆالنىيدىڭ قاسىنا تۋبەركۋلەزبەن اۋىرادى دەلىنگەن ءبىر ادامدى ورنالاستىرعان، بىراق ونىسى وتىرىك بولىپ شىققان. كۇندەردىڭ بىرىندە كولونياعا جارتى قاپ شۇجىق الىپ كەلىپ، ناۆالنىيدىڭ ساعىن سىندىرۋ ءۇشىن شۇجىقتى قۋىرعان.

وپپوزيتسيالىق ساياساتكەر الەكسەي ناۆالنىي بيىل قاڭتاردا گەرمانيادان رەسەيگە ورالعان ۋاقىتتا ۇستالدى. ونى گەرمانياعا "نوۆيچوكپەن" ۋلانعان ۋاقىتتا الىپ بارعان. ناۆالنىيدىڭ ايتۋىنشا، ونى رەسەي فەدەرالدىق قاۋىپسىزدىك قىزمەتىنىڭ قىزمەتكەرلەرى ۋلاعان. 2 اقپاندا سوت ساياساتكەردى ۆلاديمير وبلىسى پوكروۆ قالاسىنداعى كولونياعا جىبەردى.

31 ناۋرىزدا ناۆالنىي اشتىق جاريالاپ، ءۇش اپتا بويى تاماق ىشپەدى. ول كولونياعا تاۋەلسىز دارىگەرلەردى جىبەرۋدى تالاپ ەتتى.

ادام قۇقىقتارىن قورعاۋشىلار، بىرنەشە ەلدىڭ بيلىگى، نوبەل سىيلىعىنىڭ يەگەرلەرى مەن الەم جۇلدىزدارى ناۆالنىيعا اراشا ءتۇستى. ساياساتكەردى قولداۋشىلاردىڭ نارازىلىق اكتسيالارى رەسەي مەن الەمنىڭ ونداعان قالاسىندا ءوتتى. رەسەيدەگى اكتسيا كەزىندە مىڭعا جۋىق ادام ۇستالدى.

Abai.kz