قازاقستان پارلامەنتى سەناتىنىڭ سپيكەرى ماۋلەن اشىمباەۆ جۇمىس ساپارىمەن يتاليا رەسپۋبليكاسىنا باردى. ساپار اياسىندا ول يتاليا پارلامەنتى سەناتىنىڭ توراعاسى ماريا ەليزابەتتا البەرتي-كازەلاتتيمەن كەزدەستى.

كەزدەسۋ بارىسىندا تاراپتار قازاقستان مەن يتاليا اراسىنداعى پارلامەنتارالىق بايلانىستى نىعايتۋ ماسەلەسىن تالقىلادى. سونداي-اق ەكى ەلدىڭ ەكونوميكا، ساۋدا، تۋريزم، مادەنيەت جانە تاعى باسقا باعىتتار بويىنشا ىنتىماقتاستىعىن ارتتىرۋعا ىقپال ەتۋدە دەپۋتاتتاردىڭ بەلسەندى جۇمىسى ماڭىزدى ەكەنى ءسوز بولدى.

ماۋلەن اشىمباەۆ سەناتورلاردىڭ ەلىمىزدەگى بيزنەس-احۋالدى جاقسارتۋعا ارنالعان زاڭنامالىق جۇمىسىنا توقتالىپ ءوتتى. وسىعان وراي ول وڭىرارالىق ىنتىماقتاستىق ارقىلى ەكى ەلدىڭ ساۋدا-ەكونوميكالىق بايلانىستارىن كەڭەيتۋدى جانە بۇل جۇمىسقا سەناتورلاردى جۇمىلدىرۋدى ۇسىندى.
«وڭىرارالىق ىنتىماقتاستىق ارقىلى قازاقستاننىڭ ساۋدا-ەكونوميكالىق بايلانىستارىنىڭ الەۋەتىن ارتتىرۋعا مۇمكىندىك بار. قازاقستان مەن يتاليا سەناتتارىنداعى دەپۋتاتتىق قۇرامنىڭ وڭىرلىك وكىلدىك سيپاتىن ەسكەرە وتىرىپ، پارلامەنتشىلەردىڭ ءبىلىمى مەن تاجىريبەسىن ەكى ەلدىڭ وڭىرلەرى اراسىندا بايلانىس ورناتۋعا جۇمىلدىرۋعا بولادى دەپ ەسەپتەيمىز. اتاپ ايتقاندا، پارلامەنتتىك دەلەگاتسيالاردىڭ ساپارلارى كەزىندە وڭىرلەرمەن تانىسۋ جانە باسقا دا ءىس-شارالار قىزىعۋشىلىق تۋدىرۋى مۇمكىن»، – دەدى ماۋلەن اشىمباەۆ.

سۇحبات كەزىندە جاسىل ەكونوميكانى دامىتۋ جانە وسى باعىتتاعى زاڭ شىعارۋ تاجىريبەسىمەن الماسۋ ماسەلەسى دە ءسوز بولدى.

«جاسىل ەكونوميكانى دامىتۋ قازاقستان ءۇشىن مەملەكەت باسشىسى بەلگىلەپ بەرگەن باسىمدىقتاردىڭ ءبىرى. بۇل ماسەلە بويىنشا دا ءبىزدىڭ بىرلەسىپ جۇمىس ىستەۋىمىزگە زور مۇمكىندىك بار. سوندىقتان ەنەرگيالىق تۇرعىدان ءتيىمدى، تابيعي تازا تەحنولوگيالاردى ەنگىزۋ ىسىندە يتاليالىق سەرىكتەستەرمەن ىنتىماقتاستىق ورناتامىز دەپ ۇمىتتەنەمىز. وسى ورايدا قورشاعان ورتانى قورعاۋعا جانە «جاسىل» تەحنولوگيانى ەنگىزۋگە قاتىستى قۇقىقتىق بازانى جەتىلدىرۋ ماسەلەسىندە قازاقستان مەن يتاليا پارلامەنتتەرى سەناتتارىنىڭ تاجىريبە الماسۋىنا مۇمكىندك مول»، – دەدى ماۋلەن اشىمباەۆ.
ءوز كەزەگىندە ماريا ەليزابەتتا البەرتي-كازەلاتتي ەلدەرىمىز اراسىنداعى پارلامەنتارالىق ىنتىماقتاستىقتىڭ جوعارى دەڭگەيى تۋرالى ايتتى. ونىڭ ايتۋىنشا، ەكىجاقتى كۇن تارتىبىندەگى ماسەلەلەردى شەشۋ ءۇشىن پارلامەنتشىلەردى بەلسەندى جۇمىلدىرۋدىڭ ماڭىزى زور.

ودان بولەك، سۇحباتتاسۋشىلار قازاقستان مەن يتاليا سەناتتارى اراسىندا تۇراقتى ديالوگتى جالعاستىرۋ ەكىجاقتى ىنتىماقتاستىقتى نىعايتۋدىڭ ماڭىزدى تەتىگى ەكەنىن ايتتى. سونداي-اق ماۋلەن اشىمباەۆ ەكى ەلدىڭ پالاتالارى اراسىندا تۇراقتى جۇمىس ىستەيتىن كونسۋلتاتسيا تەتىگىن قۇرۋ ماسەلەسىن قاراستىرۋدى ۇسىندى.

سونىمەن قاتار قازاقستان پارلامەنتى سەناتىنىڭ توراعاسى يتاليا پارلامەنتىندەگى «قازاقستان-يتاليا» پارلامەنتتىك دوستىق توبىنىڭ وكىلدەرىمەن كەزدەستى.

Abai.kz