"كارزاي مىرزا پرەزيدەنت بولىپ تۇرعان تۇستا دا ءبىز [وسى باعىتتا] جۇمىس ىستەي باستاعانبىز، مىڭداعان اۋعان ستۋدەنتى قازاقستان وقۋ ورىندارىندا وقىدى، كاسىپ يەسى اتانىپ، ەلدەرىنە ورالدى. ۇنەمى گۋمانيتارلىق كومەك كورسەتىپ كەلدىك، قازىر دە سوعان دايىنبىز" دەدى نازارباەۆ.

ول بۇۇ-نىڭ الماتىدا اۋعانستانعا گۋمانيتارلىق كومەك جەتكىزۋ بويىنشا حالىقارالىق لوگيستيكالىق حاب قۇرۋ باستاماسىن قولداعانىن دا اتاپ ءوتتى. ەكس-پرەزيدەنت قازان ايىنىڭ ورتاسىندا قازاقستاننىڭ اۋعانستانعا بەس مىڭ توننا ۇندى جەتكىزگەنىن ەسكە سالدى. "حالىقارالىق دونورلاردى قازاقستان ارقىلى اۋعانستانعا گۋمانيتارلىق كومەك كورسەتىپ، قالپىنا كەلتىرۋگە ۇلەس قوسۋعا شاقىرعىم كەلەدى" دەدى نازارباەۆ.

"الماتىدا بۇۇ-نىڭ اۋعانستاندى بەيىمدەۋ جونىندەگى حالىقارالىق ورتالىعىن قۇرۋ يدەيامنىڭ ماڭىزى ارتىپ كەلە جاتىر. قازاقستان بۇۇ مەحانيزمدەرى ارقىلى اۋعان حالقىنا ازىق-تۇلىك كومەگىن ۇلعايتۋعا دايىن. قازاقستاندا قۇرىلعان KazAID حالىقارالىق دامۋ اگەنتتىگى بەلسەنە جۇمىس ىستەۋى ءتيىس" دەدى نۇرسۇلتان نازارباەۆ. ونىڭ سوزىنەن رەسمي باق ءۇزىندى كەلتىردى.

قازان ايىنىڭ ورتاسىندا پرەزيدەنتتىڭ حالىقارالىق ماسەلەلەر جونىندەگى ارنايى ۋاكىلى ەرجان قازىحانوۆ جەتەكشىلىك ەتكەن قازاقستاندىق دەلەگاتسيا كابۋلعا بارىپ، تالىپتەرمەن كەزدەسكەن. ارتىنشا قازاقستاننىڭ اۋعانستانعا گۋمانيتارلىق كومەك رەتىندە 5 مىڭ توننا ۇن جىبەرەتىنى بەلگىلى بولدى.

قازاقستاندىق ديپلوماتتاردىڭ ارەكەتى الەۋمەتتىك جەلىدە سىنعا ۇشىرادى. اتاپ ايتقاندا، كەي سىنشىلار بەس مىڭ توننا ۇندى اۋعانستانعا گۋمانيتارلىق كومەك رەتىندە جىبەرۋدى تەرروريزمدى قارجىلاندىرۋ رەتىندە باعالاعان. ودان بولەك، قازاقستان سىرتقى ىستەر مينيسترلىگىنىڭ وكىلى مەن مەملەكەتتىك تەلەارنا ءتىلشىسىنىڭ قارۋلى سودىرلارمەن بىرگە تۇسكەن سۋرەتى دە رەزونانس تۋدىردى.

قازان ايىنىڭ سوڭىندا قازاقستان بيلىگى اۋعانستانعا 5 مىڭ توننا ۇن جىبەرۋدەن باسقا كومەك بەرۋ ماسەلەسىن قاراستىرىپ وتىرعان جوق دەپ مالىمدەگەن.

قازاقستان جوعارعى سوتى 2005 جىلى 15 ناۋرىزدا "تاليبان" قوزعالىسىن تەرروريستىك ۇيىم دەپ تانىپ، قىزمەتىنە تىيىم سالعان. اۋعانستان بيلىگىن باسىپ العان ۇيىم 7 قىركۇيەكتە جاڭا ۇكىمەت قۇرامىن جاريالاعان. مينيسترلەر كابينەتىندە بىردە ءبىر ايەل جوق، باسىم بولىگى تەررورشىلار تىزىمىنە ەنگەن "تاليبان" سودىرلارىنان قۇرالعان. اقش تالىپتەر ۇكىمەتىن ۋاقىتشا نەمەسە اۋىسپالى كابينەت دەپ اتاعان.

Astana club – حالىقارالىق ماسەلەلەردى تالقىلاۋعا ارنالعان پىكىرتالاس الاڭى. رەسمي اقپاراتقا قاراعاندا، وعان الەمنىڭ 27 ەلىنەن 60 ادام قاتىسقان. ونىڭ ۇيىمداستىرۋشىسى "قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورى" جانە الەمدىك ەكونوميكا جانە ساياسات ينستيتۋتى دەپ ايتىلادى.

Abai.kz