تەرگەۋ ورگاندارىنىڭ مالىمەتىنە قاراعاندا، جەكەلەگەن "دەسترۋكتيۆتى ساياسي كۇشتەر" جەتەكشىلىك ەتەتىن قىلمىستىق توپتىڭ ارەكەتىنە بايلانىستى "بۇلتارتپاس ايعاقتار" تابىلعان. توپ جەتەكشىلەرىنىڭ اراسىندا جوگوركۋ كەڭەش دەپۋتاتتارى مەن بۇرىنعى جوعارى لاۋازىمدى شەنەۋنىكتەر بار.

"اتالعان توپ الداعى پارلامەنت سايلاۋىنىڭ ناتيجەسى جاريالانعاننان كەيىن جەكەلەگەن ساياسي كۇشتەردىڭ قولداۋىنا سۇيەنە وتىرىپ، بىشكەك اۋماعىندا جاپپاي نارازىلىق اكتسياسىن ۇيىمداستىرۋدى جوسپارلاعان، ءتارتىپ ساقشىلارىن كۇش قولدانۋعا يتەرمەلەپ، جاعدايدى ۋشىقتىرىپ، ءارى قاراي بيلىكتى كۇشپەن باسىپ الۋدى جوسپارلاعان" دەلىنگەن ۇقمك حابارلاماسىندا.

تەرگەۋ ورگاندارىنىڭ تۇجىرىمداۋىنشا، اتالعان توپ جاپپاي نارازىلىق اكتسياسىن ۇيىمداستىرۋعا مىڭ شاقتى جىگىت-قىزدى تارتقان. ولارمەن جۇيەلى تۇردە كەزدەسۋ ۇيىمداستىرىپ، مەملەكەتتىك قۇرىلىمعا قارسى "يدەولوگيالىق ۇگىت-ناسيحات" جۇرگىزگەن. جاپپاي نارازىلىق تۇتاندىرىپ، سوڭى بيلىكتى كۇشپەن باسىپ الۋعا ۇلاساتىن جوسپاردى تالقىلاعان.

رەسمي اقپاراتقا قاراعاندا، 26 قاراشادا ۇقمك مەن ءىىم تەرگەۋشىلەرى توپتىڭ مۇشەسى بولۋى مۇمكىن دەگەن ادامداردىڭ ءۇيى مەن كەڭسەلەرىن تىنتكەن. ناتيجەسىندە قىلمىسقا قاتىسىن دالەلدەيتىن قۇجات ماتەريالدارىنان بولەك، قارۋ-جاراق، وق-ءدارى، ەسىرتكى زاتتار تاركىلەنگەن.

ءىس بويىنشا 15 شاقتى ادام ۇستالعان. ۇقمك ازىرگە كۇدىكتىلەر مەن ۇستالعانداردىڭ اتى-ءجونىن اتامادى.

Abai.kz