لەباپ ۋالاياتىنداعى ءۇش بالاباقشادا بىرنەشە تاربيەشى بالالارعا ورىس تىلىندە مۋلتفيلم كورسەتكەنى ءۇشىن جۇمىستان شىعارىلعان.

ءبىلىم سالاسىنىڭ ءبىر قىزمەتكەرىنىڭ ايتۋىنشا، جاقىندا اشعاباتتان كەلگەن ينسپەكتورلار ايماقتارداعى ءبىلىم مەكەمەلەرىن تەكسەرگەن.

"ينسپەكتورلار تاربيەشىلەردى بالالارعا ورىس تىلىندە مۋلتفيلم كورسەتتى دەپ ايىپتاپ، ولاردى جۇمىستان شىعاردى. باقشا باسشىلارى قاتاڭ سوگىس ەستىدى", - دەيدى ول.

اشعاباتتان كەلگەن ينسپەكتورلار بالاباقشالاردا تۇركىمەن تىلىندە عانا مۋلتفيلم كورسەتۋ كەرەك دەپ ايتقان.

ينسپەكتورلار باستاۋىش مەكتەپتەردەگى وقۋشىلاردىڭ داپتەرلەرىن تەكسەرىپ، شەتەل فيلمدەرى كەيىپكەرلەرىنىڭ سۋرەتى بار داپتەرلەردى اۋىستىرۋىن تالاپ ەتكەن.

"مۇقابادا داپتەر ءسوزى ورىسشا جازىلىپ تۇرسا، ونى دا پايدالانۋعا بولمايدى", دەيدى ءبىلىم بەرۋ مەكەمەسىنىڭ قىزمەتكەرى.

ازاتلىك ءتىلشىسىنىڭ حابارلاۋىنشا، تۇركىمەنستاندا ۆوكزالداردا، اۋەجايلاردا، سونىمەن بىرگە كولىكتەردە ورىس تىلىندەگى حابارلاندىرۋلار مەن نۇسقاۋلاردى الىپ تاستاپ جاتىر. "ەكى تىلدە جازىلعان حابارلاندىرۋلار دا جويىلادى. ەندى ءبارى تۇركىمەن تىلىندە جازىلادى", دەپ حابارلادى ءتىلشى.

Abai.kz