ەلىمىزدىڭ ەگەمەندىك العانىنا وتىز جىل، ال پوستسوۆەتتىك كەڭىستىكتەگى ۇلت-ازاتتىق قوزعالىسىنىڭ العاشقى قارلىعاشى الماتىداعى جەلتوقسان كوتەرىلىسىنە شامالى ۋاقىتتان كەيىن وتىز بەس جىل تولادى ەكەن.

وسى ۋاقىتتىڭ ىشىندە ءبىز، قازاق حالقى، سول الاڭعا شىعىپ، بىزگە، مەملەكەتىمىزگە تاۋەلسىزدىك الىپ بەرىپ، وزدەرى قىرشىن كەتكەن بوزداقتار ءۇشىن، ولاردىڭ ارۋاقتارى ريزا بولۋ ءۇشىن، نە ىستەدىك؟.. اۋىز تولتىرىپ ايتار ەشتەڭە ىستەمەپپىز. ءتىپتى، وسى كۇنگە دەيىن، قانشاما جىل وتسە دە، ءالى سول كوتەرىلىس كۇندەرى قانشاما بوزداق قىرشىن كەتكەنىن بىلمەيمىز. ءار ءتۇرلى دەرەككوزدەردەگى مالىمەتتەر ءار ءتۇرلى. رەسمي دەرەكتەگى 4 ادام با، الدە 68 نەمەسە 158 ادام با، ءتىپتى حالىق اراسىنا تاراپ كەتكەن مالىمەت بويىنشا مىڭنان اسا ما؟ رەسمي ەمەس دەرەككوزدەردەن بىلەتىنىمىز سول جىلدارى مەملەكەتتىك قاۋىپسىزدىك كوميتەتىنىڭ، پروكۋراتۋرا ورگاندارىنىڭ قىزمەتكەرلەرىنىڭ قىسىم كورسەتۋ، قورقىتۋ فاكتىلەرىنىڭ ناتيجەسىندە قازا بولعان جاستاردىڭ اتا-انالارى، تۋىستارى ولاردى اۋىرۋدان نەمەسە باسقا دا، جەلتوقسان وقيعاسىنا قاتىسى جوق سەبەپتەرمەن قايتىس بولدى دەپ قولحات جازىپ بەرگەنى بەلگىلى.

ال قانشاما جاستار ءىز-ءتۇزسىز جوق بولىپ كەتتى. ولار دا ارينە قازا بولعانداردىڭ تىزىمىندە جوق. مۇحتار شاحانوۆ اعامىز دا قىرشىنداردىڭ ناقتى سانىنا كەلگەندە كۇمىلجىپ قالادى. مۇمكىن ونىڭ دا اۋزىنا قاقپاق قويىپ وتىرعاندار بار شىعار. نە بولعاندا دا مۇحتار اعامىزدىڭ سول كەزدەگى سوۆەتتىك تەمىر قۇرساۋدى بۇزىپ، حالىق دەپۋتاتتارىنىڭ ءبىرىنشى سەزىنىڭ تريبۋناسىنا گورباچەۆتى الداپ شىعىپ، وسى ماسەلەنى كوتەرۋى، ۇلكەن ەرلىك.

ءيا، ول كەز، وتە قيىن كەزەڭ بولاتىن. سوعان قاراماستان شاحانوۆتىڭ كوميسسياسى وراسان زور جۇمىس اتقارىپ، كوپ قۇپيانىڭ بەتىن اشتى عوي. ال ەلىمىز ەگەمەندىك العاننان كەيىن نەگە وسى جۇمىستار توقتاپ قالدى. وتىز بەس جىل وتسە دە ەشقانداي جاڭا دەرەكتەر جوق. وسى ۋاقىتتىڭ ىشىندە قىرشىن كەتكەن جاستاردىڭ ناقتى اتى-جوندەرىن انىقتاپ، ءتىزىمىن جاساۋعا بولار ەدى عوي. ولاردىڭ دەنەسىن قاي سايعا اپارىپ كومىپ تاستاعانىن انىقتاپ، باسىنا دۇرىستاپ ەسكەرتكىش بەلگى قويىپ، بۇكىل مەملەكەتتىك ازا جاريالاپ، قۇران وقىتۋىمىز كەرەك ەمەس پە؟.. الماتىعا كەلگەن ءاربىر قازاق وسى جەرگە سوعىپ، توپىراق سالىپ، باستارىن ءيىپ، قۇران وقىپ كەتۋدى ادەتكە اينالدىرسا، سوندا ول قىرشىنداردىڭ جاندارى تيىش تاۋىپ، ارۋاقتارى ريزا بولماس پا ەدى؟..

قازاقتا «ءولى ريزا بولماي، ءتىرى بايىمايدى» دەگەن قاناتتى ءسوز بار. ەلىمىزدە بۇگىنگى كۇنى سىبايلاس جەمقورلىقتىڭ شەگىنە جەتۋى، بار بايلىعىمىزدىڭ يگىلىگىن دۇرىستاپ كورە الماي، قارىزعا بەلشەمىزدەن باتىپ وتىرۋىمىز، مۇمكىن وسى قىرشىن جاستاردىڭ ارۋاقتارىنىڭ ريزا بولماي جاتقانىنان شىعار... نە بولعاندا دا وسى ماسەلەنى قايتادان پارلامەنت دەڭگەيىندە كوتەرىپ، جاڭادان  دەپۋتاتتىق كوميسسيا قۇرىپ، بار شىندىقتىڭ بەتىن اشىپ، سول ەلىمىزدىڭ تاۋەلسىزدىگى ءۇشىن جاندارىن بەرگەن جاستاردىڭ الدىنداعى قارىزدارىمىز بەن پارىزدارىمىزدى وتەيتىن ۋاقىت كەلدى.

سامەت ىقىلاسۇلى بايقوڭىروۆ,

زەينەتكەر، اقتاۋ قالاسى

Abai.kz