سەنات دەپۋتاتتارى كورنەكى اقپارات جانە ءدىني قىزمەتكە بايلانىستى زاڭ جوباسىنا تۇزەتۋلەر ەنگىزىپ، ماجىلىسكە جىبەردى.

زاڭداعى وزگەرىستەر اكىمشىلىك-اۋماقتىق بىرلىكتەردى، ەلدى مەكەندەردىڭ قۇرامداس بولىكتەرىن، باسقا دا فيزيكالىق-گەوگرافيالىق نىسانداردى تاريحي قالىپتاسقان قازاقشا اتاۋلارمەن بەلگىلەۋدى قاجەت دەپ سانايدى. سونىمەن قاتار جارناما ماڭدايشالارىنداعى سوزدەر دە قازاق تىلىندە جازىلۋى كەرەك دەگەن ۇستانىمدى كوزدەيدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ

«زاڭ جوباسى دەرەكتەمەلەر مەن كورنەكى اقپاراتتى ورنالاستىرۋ ماسەلەلەرى بويىنشا قازاقستاننىڭ زاڭناماسىن جەتىلدىرۋ ماقساتىندا، ماتىندەردىڭ ورفوگرافياسى مەن تەڭتۇپنۇسقالى اۋدارماسى نورمالارىن جانە قازاقستاننىڭ ءدىن سالاسىنداعى زاڭناماسىن ساقتاۋ بويىنشا تالاپتاردى بەلگىلەۋ ارقىلى ازىرلەندى»، - دەدى سەناتتىڭ جالپى وتىرىسىندا.

زاڭ جوباسىن دايىنداعاندار «بۇل كورنەكى اقپاراتتاردىڭ دۇرىس جازىلۋى ءۇشىن، تۇپنۇسقادان قاتە اۋدارىلىپ، الەۋمەتتىك تۇسىنىسپەۋشىلىكتى تۋدىرماۋ ءۇشىن قاجەت، سونداي-اق كونفەسسيا-ارالىق ءوزارا ءىس-قيمىل، ءدىن ماسەلەلەرىندە جەكە جانە زاڭدى تۇلعالاردىڭ قۇقىقتارىن قورعاۋ ءۇشىن كەرەك» دەپ ەسەپتەيدى.

زاڭ جوباسىن تالقىلاۋ كەزىندە سەناتورلار ءدىني قىزمەت باعىتى بويىنشا وزگەرتۋلار ەنگىزدى. اتاپ ايتقاندا، ماعىنالىق جانە قۇقىقتىق جۇكتەمەنىڭ بولماۋىنا بايلانىستى «ءدىني مازمۇنداعى اقپاراتتىق ماتەريال» ۇعىمىنان «ماتىندىك سىلتەمەلەردى قوسا العاندا» دەگەن سوزدەر الىنىپ تاستالدى. ازاماتتىق قۇقىقتار تەك جەكە تۇلعالارعا قاتىستى قولدانىلاتىندىقتان، دىنگە دەگەن كوزقاراسقا بايلانىستى زاڭدى تۇلعالاردىڭ ازاماتتىق قۇقىقتارىن قورعاۋعا قاتىستى نورما الىنىپ تاستالادى.

ءماجىلىس سەناتتىڭ زاڭ جوباسىنا ەنگىزگەن تۇزەتۋلەرىن قابىلداسا، زاڭ پرەزيدەنكە قول قويۋعا جىبەرىلەدى.

Abai.kz