رەسەي ۋكرايناعا انە-مىنە باسىپ كىرۋى مۇمكىن. باتىستىق باسىلىمدار سولاي دەيدى. ءتىپتى, قاڭتار ايىنىڭ سوڭىندا 175 مىڭ اسكەرمەن سوعىس اشۋى مۇمكىن دەگەندى دە اسكەري بارلاۋشىلارعا سۇيەنە وتىرىپ ايتۋدا. ال وسى ساتتە رەسەي ۋكراينا شەكاراسىنىڭ ماڭىنا شامامەن 1200 تانك شوعىرلاندىردى. بۇل ۋكراينادا رەسمي دەرەك بويىنشا بار تانكتەردەن 300-گە كوپ دەگەن ءسوز.

سوعىس باستالسا، ءسوزسىز رەسەي شابۋىل جاساۋشى، ال ۋكراينا قورعانۋشى پوزيتسيادا بولماق. الايدا ساراپشىلار تانكتىڭ كوپتىگى، كۇشتىڭ باسىمدىعىن نەمەسە ۇرىستىڭ جەڭىسپەن اياقتالاتىنىن بىلدىرمەيدى دەيدى. اسكەري ساراپشىلار سوعىس باستالسا ۇرىس قيمىلدارى قالاي ءوربۋى مۇمكىن ەكەندىگىن جازىپ شىقتى.

رەسەي دە، ۋكراينا اسكەرى دە كەڭەستىك دوكترينانى ۇستانادى. ەكەۋى دە قورعانىستا بەلسەندى. ياعني، وزدەرىن قورعاعان كەزدە جاۋدىڭ تەپە-تەڭدىگىن بۇزۋ ءۇشىن شابۋىلدار مەن قارسى شابۋىلداردى جوسپارلايدى. «قورعانىسقا قويىلاتىن نەگىزگى تالاپتار تۇراقتىلىق پەن بەلسەندىلىك بولىپ تابىلادى»، - دەپ اتاپ ءوتتى اسكەري ساراپشىلار لەستەر گراۋ مەن چارلز بارتلز.

ەكى اسكەردىڭ دە تاكتيكاسى شابۋىل وپەراتسيالار ۇيىمداستىرۋدا ورتالىققا ارتيللەريانى ورنالاستىرۋ ارقىلى قيمىلدايدى. ال جاياۋ اسكەر مەن تانكتەردىڭ ىندەتتەرى ارتيللەريا پوزيتسيانى اتقىلاپ، شەگىنگەن اسكەردى جويۋ بولىپ تابىلدى.

«ۋكراينا اسكەرى ءوز قالالارىن قورعاپ قالۋ ءۇشىن الدىڭعى شەپتەگى باتالوندار جاقسى جاسىرىنا ءبىلۋ كەرەك»، - دەيدى گراۋ مەن بارتلز. قىرىمدى رەسەي وتارلاپ العان ساتتەن باستاپ، ۋكراينا اسكەرى جەتى جىل بويى سول تاكتيكانى ۇستانۋدا. ناقتىلاپ ايتقاندا ولار جۇزدەگەن شاقىرىمعا سوزىلاتىن ترانشەيلەردى قازىپ، جاياۋ اسكەر مەن تەحنيكاعا ارنالعان بۋنكەرلەردى ازىرلەگەن.

بىراق بەلسەندى قورعانىس تانكتەردىڭ وكوپتاردان شىعىپ، باسقىنشىلارعا قارسى تەز ارادا سوققى بەرە الۋ مۇمكىندىگى بولۋى ءتيىس. «قارسى شابۋىلدار قاۋىپسىزدىك ايماعىنىڭ قورعانىسىن كۇشەيتەدى»، - دەپ جازادى گراۋ مەن بارتلەس.

سونىمەن بىرگە، ۋكراينا ارمياسى رەسەي ارمياسىنىڭ ۋكراينا كۇشتەرىن ودان ءارى جويۋ ءۇشىن وقشاۋلاۋ ارەكەتىنىڭ جولىن كەسۋى كەرەك. «مانەۆرلىك كۇشتەر قاۋىپتى ايماقتا شابۋىلداردى بولدىرماۋعا، قارسىلاستىڭ نەگىزگى شابۋىلدىڭ ءوسى بويىمەن بۇزىپ وتۋىنە جول بەرمەۋگە، قاپتالدان ءوتۋ قاۋپىن جويۋعا جانە كەرىسىنشە، قارسىلاستىڭ شەپتەرىن ىدىراتۋعا كۇش سالۋى ءتيىس»، - دەيدى ساراپشىلار.

«رەسەي باسىپ كىرۋ ءۇشىن 1200 تانك، ال ۋكراينا قورعانۋ ءۇشىن 900 تانكتى قولدانۋى مۇمكىن. الايدا رەسەيدىڭ 1200 تانكى ۇرىس دالاسىندا شىرپىشا ورتەنۋى مۇمكىن. سەبەبى ۋكراينا اسكەرى دجەۆەليندەردى قولدانۋعا نيەتتى، ال ول دەگەنىمىز ءبىر وقپەن ءبىر تانكتى جويۋ دەگەن ءسوز. سوندىقتان دا رەسەي ۇرىستا تانك نەمەسە باسقا بروندى تەحنيكا قولدانۋدان قورقاتىنى انىق»، - دەيدى ساراپشىلار.

ۋكراينا اسكەرىنىڭ تاعى ءبىر ارتىقشىلىعى ولاردىڭ ورنالاسۋىندا بولىپ تۇر. رەسەي تانكتەرى شابۋىلعا شىعۋ ءۇشىن اشىق الاڭدارمەن ياكي جولدارمەن قوزعالۋعا ءماجبۇر، ال بۇل ارالىقتا ۋكراينا ساربازدارى تانككە قارسى زىمىران كەشەندەرى جانە باسقا دا قارۋلاردى قولدانىپ، جاۋ اسكەرىنىڭ تەحنيكاسىن جويۋ مۇمكىندىگىنە يە دەيدى ولار.

ۆاشينگتونداعى اتلانتيكالىق كەڭەستىڭ ساراپشىسى دايان فرەنسيستىڭ پىكىرىنشە، ۋكراينا سوعىستا رەسەيدىڭ 1200 تانكىسىن تولىق جويماسا، وندا جاعداي دونباسس اۋەجايىنداعىداي جەڭىلىسپەن اياقتالۋى مۇمكىن. سەبەبى دونباسس اۋەجايىن ۇزاق ۋاقىت تاباندىلىقپەن قورعاي بىلگەن ۋكراينا ساربازدارى، اقىرى رەسەي تانكتەرى كىرگەندە شەگىنۋگە ءماجبۇر بولعان ەدى.

دەگەنمەن ساراپشىلار سوعىستىڭ بولۋى ەكىتالاي دەگەن ويدا. سەبەبى پۋتين مەن بايدەن كەزدەسۋىندە كرەمل وزىنە ەكونوميكالىق اۋىر سوققى بولاتىنىن ناقتى سەزدى دەيدى باتىستىق ماماندار.

اسحات قاسەنعالي

Abai.kz