ەۋروپا مەن تمد ءباسپاسوزى شۋلاپ جاتقانداي، ازەربايجان استاناسىندا ۋكرايناداعى سوعىستى توقتاتۋ توڭىرەگىندە وتە قۇپيا كەلىسسوزدەر ءوتتى دەگەن سىبىس تارادى. الايدا، كيەۆ پەن موسكۆا بۇل اقپاراتقا بىردەي ساپ-سالقىن رەاكتسيا ءبىلدىرىپ، «ءمانى جوق» دەپ جىلى جاۋىپ قويعىسى كەلەتىندەي.

انىق-قانىعى قالاي ءوزى؟ كەلىڭىزدەر، تالداپ كورەيىك:

باكۋگە كىمدەر كەلگەن؟

ازەربايجان پرەزيدەنتى يلحام اليەۆتىڭ ايتۋىنشا، The Times باسىلىمى جازعانداي، 12 شىلدەدە باكۋگە گەرمانيادان دا، رەسەيدەن بۇرىنعى شەنەۋنىكتەر ءبىرتۇرلى سايكەستىكپەن ۇشىپ كەلگەن:

• گەرمانيا تاراپىنان: مەركەلدىڭ بۇرىنعى كانتسەلياريا باسشىسى رونالد پوفاللا مەن ماتتياس پلاتتسەك.
• رەسەي تاراپىنان: بۇرىنعى پرەمەر-مينيستر ۆيكتور زۋبكوۆ پەن رف پرەزيدەنتى جانىنداعى ادام قۇقىقتارى كەڭەسىنىڭ توراعاسى ۆالەري فادەەۆ.

اليەۆ باكۋدىڭ بۇل كەزدەسۋدەن حابارسىز بولعانىن جانە تەرريتوريانىڭ "بەيرەسمي الاڭ" رەتىندە پايدالانىلعانىن راستاپ وتىر.

ۋكراينا: «ءمانى – نولگە تەڭ!»

ۋكراينا سىرتقى ىستەر مينيسترلىگىنىڭ رەسمي وكىلى گەورگي ءتيحيدىڭ بۇل «قۇپيا» كەزدەسۋگە قاتىستى پىكىرى قىسقا ءارى نۇسقا بولدى:

«بۇل كەزدەسۋ قانشالىقتى قۇپيا بولسا، سونشالىقتى ماڭىزسىز. كەيبىر ادامدار كەزدەسىپ، بىردەڭە جايلى سويلەسكەن شىعار. ۋكراينا تاراپى ولاردىڭ ەشقايسىسىنا وكىلەتتىك بەرگەن جوق. ونداي كەزدەسۋلەردىڭ شىنايى بەيبىتشىلىك پروتسەسى ءۇشىن ماڭىزى – نولگە تەڭ».

كرەملدىڭ جاۋابى: «حابارىم جوق»

رەسەي پرەزيدەنتىنىڭ ءباسپاسوز حاتشىسى دميتري پەسكوۆ تا بۇل جاعدايدان مۇلدە بەيحابار ەكەنىن ايتىپ، «ەشقانداي اقپاراتىم جوق» دەپ قىسقا قايىردى.

سوندا بۇل نە بولدى؟ رەسمي مەملەكەتتەر «ءبىز قاتىسقان جوقپىز» دەپ باس تارتقانىمەن، بۇرىنعى جوعارى لاۋازىمدى شەنەۋنىكتەردىڭ باكۋدە باس قوسۋى جايدان-جاي ەمەس ەكەنى انىق. «ەكىنشى ترەك» ديپلوماتياسى ما، الدە جەكە ازاماتتاردىڭ باستاماسى ما؟

وسى تۋرالى پىكىرىڭىزدى Abai.kz اقپاراتتىق پورتالىنىڭ Telegram-داعى پاراقشاسىنا جازىڭىز...

Abai.kz