رەسەيدە وميكرون شتاممىن جۇقتىرعاندار سانى 16 ادامعا جەتتى. بۇل تۋرالى ۆيتسە-پرەمەر تاتيانا گوليكوۆا مالىمدەدى. «بۇگىن ەلگە ورالعان 177 ازاماتتىڭ 16-سىندا وميكرون شتاممى انىقتالدى، ولاردىڭ بارلىعى باقىلاۋدا»، - دەدى ول مەملەكەتتىك دۋمادا سويلەگەن سوزىندە.

رەسەيدە ءبىر اپتادا COVID-19 اۋرۋىن جۇقتىرعاندار سانى 7,3%-عا تومەندەگەن. كورسەتكىش حالىقتىڭ ءجۇز مىڭىنا شاققاندا 144,95 قۇرادى. فەدەراتسيانىڭ 24 سۋبەكتىسىندە اۋىر حالدەگى ناۋقاستاردىڭ اۋرۋحاناعا جاتقىزىلۋى دا ارتتى.

رەسەيدە 68,8 ميلليون ادام ەكپەنىڭ ەكى كومپونەنتىمەن، 75,5 ميلليون ادام ءبىر كومپونەنتپەن ەگىلدى. دۇنيەجۇزىلىك دەنساۋلىق ساقتاۋ ۇيىمى قاراشا ايىنىڭ سوڭىنداعى شۇعىل جينالىستىڭ قورىتىندىسى بويىنشا وڭتۇستىك افريكادا تابىلعان B.1.1.529 كوروناۆيرۋسىنىڭ جاڭا نۇسقاسىن الاڭداۋشىلىق تۋعىزاتىن ساناتقا جاتقىزۋعا شەشىم قابىلدادى جانە ونى گرەك ارپىمەن omicron دەپ اتادى.

Abai.kz