اقپاراتقا قاراعاندا، اقاەۆتىڭ سوڭعى جارتى جىلدا بىشكەككە ەكىنشى رەت كەلۋى "قۇمتور ىسىمەن" بايلانىستى. ازاتتىقتىڭ قىرعىز قىزمەتىنىڭ دەرەككوزىنىڭ ايتۋىنشا، بۇرىنعى پرەزيدەنت ەلدە بىرنەشە كۇن بولىپ، ۇلتتىق قاۋىپسىزدىك جونىندەگى مەملەكەتتىك كوميتەتتىڭ (ۇقمك) سۇراقتارىنا جاۋاپ بەرەدى.
اقاەۆ العاش رەت قىرعىزستانعا بيىل تامىزدا كەلگەن. وعان دەيىن ۇقمك "قۇمتور" كەنىشىندەگى جەمقورلىق ءىسى بويىنشا ىزدەۋ جاريالانعانىن حابارلاعان.
ءبىر اپتا بويى ۇقمك سۇراقتارىنا جاۋاپ بەرگەن ەكس-پرەزيدەنت ماسكەۋگە قايتا كەتكەن. 16 جىلدان بەرى ول سول جاقتا تۇرىپ كەلەدى.
2005 جىلى 24 ناۋرىزدا قىرعىزستاندا حالىق تولقۋى بولىپ، سونىڭ ناتيجەسىندە ەلدى 15 جىل باسقارعان اسقار اقاەۆ ەلدەن كەتۋگە ءماجبۇر بولعان. وتباسىمەن بىرگە رەسەيگە قاشقان اقاەۆ سول جاقتان ساياسي باسپانا الدى.
قىرعىزستاندا "قۇمتور ءىسى" اياسىندا بىرنەشە جوعارى لاۋازىمدى شەنەۋنىك جەمقورلىق كۇدىگىنە ىلىنگەن. قۇمتور – قىرعىزستانداعى ەڭ ءىرى التىن كەنىشى. ودان تۇسكەن كىرىس ەل ەكونوميكاسىنىڭ شامامەن 9 پايىزىن قۇرايدى. قىرعىزستاننىڭ قازىرگى باسشىلىعى بۇرىنعى بيلىك تۇسىندا كەنىش اينالاسىندا جەمقورلىقپەن كەلىسىم-شارت جاسالعان دەپ سانايدى. بۇرىنعى شەنەۋنىكتەر مەن كەنىشتى يگەرۋمەن اينالىسقان كانادالىق Centerra Gold كومپانياسى مۇنى جوققا شىعارادى.
Abai.kz
