"جالپى العاندا Covid-19 احۋالى وپتيميستىك ستسەناري بويىنشا كەلە جاتىر" دەدى الەكسەي تسوي 14 جەلتوقسان كۇنگى ۇكىمەت وتىرىسى كەزىندە.

ونىڭ ايتۋىنشا، كەيىنگى ەكى اپتادا اۋرۋ كورسەتكىشى 31 پايىزعا ازايعان. ستاتسيونار مەن امبۋلاتورلىق جاعدايدا ەم العاندار 1,7 پايىزعا سيرەگەن. قازىر ينفەكتسيالىق ورىنداردىڭ – 23 پايىزى، رەانيماتسيالىق ورىنداردىڭ 20 پايىزى بوس ەمەس.

دەگەنمەن سەيسەنبىلىك ۇكىمەت وتىرىسىندا ماسكا تاعۋ، الەۋمەتتىك قاشىقتىق ساقتاۋ ەرەجەسى ءالى ماڭىزدى ەكەنى ايتىلدى. ۆاكتسينا جانە رەۆاكتسيناتسيانى جەدەلدەتۋ قاجەتتىگى ءسوز بولدى.

سوڭعى اقپاراتقا قاراعاندا، قازاقستاندا كوروناۆيرۋسقا قارسى ۆاكتسينانىڭ تولىق دوزاسىن العاندار 8,3 ملن ادامعا جەتكەن. 150,6 مىڭ جاسوسپىرىمگە جانە اياعى اۋىر نەمەسە بالا ەمىزىپ جۇرگەن 38 مىڭ ايەلگە Pfizer ۆاكتسيناسى سالىنعان.

2020 جىلدىڭ ناۋرىزىنان بەرى ەلدە 980 372 مىڭ ادامنىڭ پتر تەستى وڭ شىققان. باسىم بولىگى جازىلعان. 12,8 مىڭى قايتىس بولعان. 83 مىڭ ادام "كوۆيدتەكتەس پنەۆمونيامەن" اۋىرعان. 5,1 مىڭى قايتىس بولعان.

Abai.kz