قازاقستان تاۋەلسىزدىگىن جاريالاعاننان كەيىن ەكونوميكالىق تىعىرىققا تاپ بولدى. زاۋىت-فابريكالار توقتاپ، حالىق كۇنكورىس قامىمەن دالا كەزىپ كەتتى. مادەنيەت، ونەر، رۋحانيات سالاسىنىڭ ءحالى ءتىپتى مۇشكىل ەدى.

الايدا ەلباسى نۇرسۇلتان نازارباەۆتىڭ ۇتقىر شەشىمدەرىنىڭ ارقاسىندا، ازعانتاي ۋاقىتتىڭ ىشىندە ەكونوميكانىڭ دامۋى جاڭا قارقىنعا ءتۇستى. ەلدە ساياسي رەفورمالار قولعا الىنىپ، حالىقتىڭ تۇرمىسى جاقساردى. مادەنيەتكە جان ءبىتىپ، ەل ازاماتتارىنىڭ دۇنيەتانىمى كەڭەيدى.

– ەڭ باستىسى تاۋەلسىزدىكتىڭ قادىر-قاسيەتىن ەشقاشان دا جوعالتپاۋىمىز قاجەت جانە ونى تەرەڭ تۇسىنە ءبىلۋىمىز كەرەك. العاشقى جىلدارى كوپ قيىنشىلىق كوردىك. رۋحاني سالالارىمىز دەرلىك اقساپ جاتتى. اۋىل-اۋىلدارداعى دۇركىرەگەن مادەنيەت ۇيلەرى تۇتاستاي جابىلىپ، مەيرامحانالارعا، دۇكەندەرگە اينالىپ كەتكەنىن كوردىك. كىتاپحانالار جابىلىپ، كىتاپتار وتىنعا كەتكەن كەزدەر دە بولدى. مۇنىڭ ءبارى جۇرەككە اۋىر ءتيدى، بىراق ءبىز بۇل قيىنشىلىقتان ەڭسەمىزدى تۇسىرمەي ءوتىپ شىقتىق، –  دەيدى قازاقستاننىڭ ەڭبەك سىڭىرگەن قايراتكەرى، رەجيسسەر سايلاۋ كاميەۆ.

ەلوردالىق «بايتەرەك» توبىنىڭ ءانشىسى سايلاۋ كاميەۆ بۇگىندە ەلدىڭ تۇپكىر-تۇپكىرىندە جاعداي جاقسارعانىن ايتتى. وعان گاسترولدەرگە شىققان ساپارلارىندا كورگەن ساتتەرى دالەل بولعان.

– توقسانىنشى جىلداردىڭ باسىندا جوعالىپ كەتكەن دۇنيەلەردىڭ بارلىعى قازىر اياعىنان تۇردى. قالادا بولسىن، اۋىلدا بولسىن، مادەنيەت ۇيلەرىنىڭ تاماشا عيماراتتارى سالىنا باستادى. ولاردىڭ ءىشى – حالىققا، ساحناسى ونەرگە تولدى. ءبىز الەمنىڭ تەڭ مۇشەسىنە اينالدىق. قازاق ونەرىنە ءدۇيىم جۇرت ءسۇيسىنىپ قارايتىن بولدى. ديماش ونىڭ ءبىر عانا دالەلى. كينو سالاسى دا ءبىر توبەگە اينالدى. مۇنىڭ بارلىعى دا تاۋەلسىزدىگىمىزدىڭ ارقاسى دەپ بىلەمىن، – دەيدى رەجيسسەر سايلاۋ كاميەۆ.

Abai.kz