ادەتتەگىدەي، جىلدىڭ سوڭىندا جۋرناليستەر حابارلاسىپ بيىلعى جىلدىڭ ەڭ ماڭىزدى ساياسي وقيعا-ناتيجە قانداي بولدى دەگەن سۇراقتارىن قويا باستادى.
ءيا، قازىرگى تاڭدا جۇرتتىڭ ءبارى جىل قورىتىندىلارىن جازىپ وتىر عوي، ءتىپتى بايقاۋ ۇيىمداستىرىپ جاتىر: "جىل ادامى", "ەڭ سۇيىكتى بىردەمە...", "ەڭ ۇزدىك اناۋ...", "ەڭ جاقسى مىناۋ"...

ال مەن ەڭ ماڭىزدى ساياسي ناتيجە رەتىندە جەر ماسەلەسىن ايتار ەدىم. ەستەرىڭىزدە بولسا جىلدىڭ باسىندا پرەزيدەنت توقاەۆ مىرزا "جەر شەتەلدىكتەرگە ساتىلمايدى، جالعا دا بەرىلمەيدى" دەگەن مالىمدەمە جاسادى. كەيىن بۇل شەشىم زاڭمەن بەكىتىلدى. قازىر ءبىز بۇل تۋرالى ۇمىتىپ بارا جاتقان سەكىلدىمىز. بىراق ءوتىپ بارا جاتقان جىلدىڭ حالقىمىز ەڭ كۇتكەن شەشىمى وسى بولدى دەپ ويلايمىن.

بۇل ماقسات ءۇشىن ماكس بوقاەۆ پەن تالعات ايان تۇرمەدە بىرنەشە جىل وتىرىپ شىقتى. 2016 جىلى بىرنەشە قالالاردا حالىق كوشەگە شىعىپ ناقتى وسىنى تالاپ ەتتى. ءتۇبى حالىق قالايتىنداي پرەزيدەنت توقاەۆ 5 جىلدان كەيىن بۇنداي شەشىم شىعاردى. تاريحي تۇرعىدا قاراعاندا ناقتى بۇل شەشىم ەڭ ماڭىزدى دەپ سانايمىن.

جەر ەشكىمگە، ءتىپتى قازاقستان ازاماتتارىنا دا جەكەگە ساتىلماسىن دەگەن حالىقتىڭ تالابى دا ءتۇبى ورىندالادى دەپ سەنەم. سوعان كەلەسى جىلى ءبارىمىزدى جاراتقانىمىز جەتكىزسىن، ال ءبىز سوعان ات سالىسامىز، اماندىق بولسا!

مۇحتار تايجان

Abai.kz