اقوردا سايتىندا حابارلانعانداي، جاعدايدىڭ شيەلەنىسۋىنە بايلانىستى قوعامدىق قاۋىپسىزدىكتى قامتاماسىز ەتۋ، زاڭدىلىق پەن قۇقىقتىق ءتارتىپتى قالپىنا كەلتىرۋ، ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا مەملەكەت باسشىسى قاسىم-جومارت توقاەۆ ماڭعىستاۋ وبلىسىندا جانە الماتى قالاسىندا 2022 جىلعى 19 قاڭتارعا دەيىن توتەنشە جاعداي جاريالادى.

2 قاڭتاردا جاڭاوزەن تۇرعىندارى سۇيىتىلعان گاز باعاسىن ءتۇسىرۋدى تالاپ ەتىپ كوشەگە شىققان بولاتىن. نارازىلىقتار ەلىمىزدىڭ كوپتەگەن ايماقتارىندا جالعاستى. قازاقستان پرەزيدەنتى قاسىم-جومارت توقاەۆ جاعدايعا ءۇن قوسىپ، ۇكىمەتكە جاڭاوزەندەگى جاعدايدى ەكونوميكالىق نەگىزدىلىگىن قۇقىقتىق سالادا ەسكەرە وتىرىپ، جەدەل تۇردە قاراۋدى تاپسىرعان ەدى.

4 قاڭتاردا «قازمۇنايگاز» اق الەۋمەتتىك جاۋاپكەرشىلىگى اياسىندا ماڭعىستاۋ وبلىسىندا گازدىڭ ليترىنە 50 تەڭگەدەن باعا بەلگىلەۋ تۋرالى شەشىم قابىلدانعانى بەلگىلى بولدى.

5 قاڭتاردا قازاقستان پرەزيدەنتى قاسىم-جومارت توقاەۆ ۇكىمەت مۇشەلەرىمەن، پرەزيدەنت اكىمشىلىگىنىڭ قىزمەتكەرلەرىمەن جانە باسقا دا مۇددەلى ورگانداردىڭ وكىلدەرىمەن ەلدىڭ الەۋمەتتىك-ەكونوميكالىق جاعدايى تۋرالى جۇمىس كەڭەسىن وتكىزەدى

Abai.kz.