قازاقستانداعى وزبەك ەڭبەك ميگرانتتارىنىڭ ايتۋىنشا، ولار ەلدە وتكەن اپتادا بولعان وقيعالارعا قاتىسپاعان. قازىر جاعداي ءبىرشاما تىنىش، ەڭبەك ميگرانتتارى جۇمىسقا شىعا باستادى، دەيدى ولار.

نامانگان تۋماسى داۆران الماتى قالاسىندا تۇرادى. ول وسىنداعى ءبىر تىگىن تسەحىندا جۇمىس ىستەيدى. 11 قاڭتاردا داۆران جۇمىسقا قايتا ورالدى.

– الماتىدا تۇرامىن. بۇگىن قالا تىنىش. اۆتوبۋستار ءجۇرىپ جاتىر. ءبىزدىڭ اۋداندا ەشتەڭە بولعان جوق. تىگىن تسەحىندا ىستەيمىن. ءبىز پوليتسيا، پروكۋراتۋرا، كوشى-قون قىزمەتى جانە تەمىر جول قىزمەتكەرلەرىنە ارنايى كيىم تىگەمىز. قۇجاتتارىم دۇرىس. ازىرگە مەنى ەشكىم مازالاعان جوق، - دەيدى داۆران.

وزبەكستان سىرتقى ىستەر مينيسترلىگىنىڭ رەسمي وكىلى يۋسۋف كابۋلجانوۆتىڭ حابارلاۋىنشا، مينيسترلىك قازاقستانداعى جاعدايدى ءجىتى باقىلاپ وتىر.

قازاقستانداعى "دۋستليك" وزبەك قوعامىنىڭ توراعاسى يكرام حاشيمجانوۆتىڭ ايتۋىنشا، شىمكەنت قالاسىنداعى جاعداي تۇراقتالدى. ۇيىم مالىمەتىنشە، قازاقستاندا 800 مىڭنان استام ەتنيكالىق وزبەك تۇرادى.

Abai.kz