الماتى قالاسى پوليتسيا دەپارتامەنتىنىڭ باسشىسى قانات تايمەردەنوۆ تاراتقان مالىمەتكە سۇيەنسەك، قاڭتارداعى قايعىلى وقيعا كەزىندە بارلىعى 149 ازامات، ونىڭ ىشىندە 11 قاۋىپسىزدىك قىزمەتكەرى قازا تاپقان.

6 قاڭتاردان بۇگىنگە دەيىن ارنايى ورگانداردىڭ قىزمەتكەرلەرى مەن اسكەري قىزمەتشىلەر بىرلەسىپ، قالانى تازارتۋ بويىنشا انتيتەررورلىق وپەراتسيا جۇرگىزىپ جاتىر. قالاداعى جاعداي تۇراقتى.

دەگەنمەن تالاي كوڭىلگە قاياۋ ءتۇستى، تالاي وتباسى زار يلەپ جىلاپ قالدى.

جوعارىدا ايتىلعان قايتىس بولعانداردىڭ ىشىندە قانشاسى بانديت ەكەنى ايتىلمادى. دەمەك ەلىمىزگە ىلاڭ سالعان تەرروريستەردىڭ قولىنان تالاي قاراپايىم تۇرعىنداردىڭ وپات بولعانى ايدان انىق. ال ءبىزدىڭ اسكەر مەن پوليتسيا ەشقاشان بەيبىت تۇرعىنىنا قارۋ كەزەمەيتىنى انىق.

بۇلىكشىلەردىڭ وعىنا ىلىككەندەردىڭ بىرەۋى نان الۋعا، ەندى ءبىرى اۋىرىپ جاتقان سابيىنە نەمەسە اتا-اناسىنا ءدارى ىزدەپ شىققاندار. ەلدەگى جاعدايعا باعا بەرەتىندەي جاستا ەمەس، كوشەگە ءجاي سەرۋەنگە شىققان جاسوسپىرىمدەر قانشاما! ءتىپتى، سول كوزى قارايىپ كەتكەن، مەيىرىم، قايىرىمدىلىق دەگەن سەزىمدەردەن ادا بانديتتەردىڭ قاندى قولىنا تاپ بولىپ، قانسىراپ جاتقاندارعا كومەككە ۇمتىلعان قانشاما بەيبىت تۇرعىندار دا قاڭعىعان وقتىڭ قۇربانى بولدى ەكەن؟!. وققا ۇشقان بەيكۇنا بالالار دا از ەمەس. ءىشىڭ اشيدى. جۇرەگىڭ قانجىلايدى.

ادامزات نەلىكتەن وسىنشالىقتى قاتىگەز بولىپ كەتكەن؟! ادامنىڭ باسىن كەسىپ الۋ دەگەن ءتىپتى سۇمدىق قوي! قانشاما وتباسىنا قايعى اكەلگەن تەرروريستەردىڭ بۇل باسسىزدىعى ەشقاشان كەشىرىلمەۋى كەرەك.

الماتى قالاسىنىڭ پروكۋرورى بەرىك جۇيرىكتاەۆتىڭ سوزىنشە، 5 قاڭتاردان باستاپ قالادا تەك بانديتتەر مەن تەرروريستەر شابۋىل جاساعان. ولاردىڭ وسى بۇلىككە اسقان ۇيىمشىلدىقپەن، قاتىگەزدىكپەن دايىندالعانىن اتاپ ءوتتى.

«العاشقى كۇننەن باستاپ مەن جانە پروكۋراتۋرانىڭ بارلىق قىزمەتكەرلەرى وقيعالاردىڭ تۋرا ورتاسىندا بولدىق. ءبىز بانديتتەردىڭ ۇيىمداسقان اگرەسسياسىن كوردىك. ولار ارنايى تەحنيكانى، ءورت ءسوندىرۋ ماشينالارىن، اۆتوبۋستاردى باسىپ الىپ، قۇقىق قورعاۋ كۇشتەرىن تاراتتى. بارلىق جەردە بەينەباقىلاۋ كامەرالارى جويىلدى. قىلمىس جاساۋ ءۇشىن برۋسچاتكا مەن قولدا بار باسقا دا قارۋلاردى پايدالاندى»، – دەدى پروكۋرور.

ول سونداي-اق، قىلمىسكەرلەردىڭ اڭشىلىق دۇكەندەرىن ماقساتتى تۇردە ادەيى باسىپ الىپ، پوليتسياعا شابۋىل جاساعانىن ايتىپ وتىر. «ولارعا قارۋ قۇقىق قورعاۋ ورگاندارىنا شابۋىل جاساۋ، بەيبىت تۇرعىنداردى قورقىتۋ جانە تەرروريستىك شابۋىلداردى جالعاستىرۋ ءۇشىن قاجەت بولعان. عيماراتتار قيرادى، ءورت جانە مەديتسينالىق كومەك جۇمىسى بۇعاتتالدى. سول كەزدە قۇقىق قورعاۋ ورگاندارى بۇل بۇل اشىنعان ميتينگىشىلەر دەپ سانادى. سوندىقتان، جاسالعان بارلىق قىلمىستارعا قاراماستان، كۇش قۇرىلىمدارى قارۋ قولدانبادى. كوشەلەرگە شىققان بەيبىت تۇرعىنداردى ولار قالقان رەتىندە پايدالاندى»، – دەدى پروكۋرور.

راس، الاڭعا، كوشەگە شىققان حالىقتىڭ باسىم كوپشىلىگىنىڭ ماقساتى ەلدە ورىن العان ماسەلەنى بەيبىت شەشۋ ەدى. بىراق ولاردىڭ اراسىنا پروۆاكاتورلار، بانديتتەر، تەرروريستەر كىرىپ كەتىپ، بەيبىت ومىرىمىزگە ىلاڭ سالدى.

بىلەسىز بە، ءتىپتى الەمدەگى پروتەستانتتاردىڭ ءوزى بەيبىت تۇرعىندارعا قارسى شاپپاعان، ولارعا قارسى قارۋ كەزەنبەگەن. ادام ومىرىنە اراشاشى بولاتىن جەدەل جاردەم كولىكتەرىن دە ورتەمەگەن. ال كەشەگى بۇلىكشىلەر وتانداستارىمىزدى ءولتىردى، اتتى، ورتەدى.

وسىنداي اۋىر سالماقپەن ەندى قالاي ءومىر سۇرەمىز؟!..

Abai.kz