قازاقتىڭ كورنەكتى اقىنى، اۋدارماشى، قر مەملەكەتتىك سىيلىعىنىڭ لاۋرەاتى، «پاراسات» وردەنىنىڭ يەگەرى عالىم جايلىباي جانە جازۋشى، دراماتۋرگ، ادەبيەتتانۋشى-عالىم، الاشتانۋشى الىبەك بايبول گۇرجىستانداعى «پوەزيا ‒ الەم جۇرەگى» اتتى حالىقارالىق ادەبي فەستيۆالدا شوتا رۋستاۆەلي اتىنداعى التىن مەدالمەن ماراپاتتالدى.

سۋرەتتەر: اۆتوردىڭ جەكە ارحيۆىنەن الىندى.

سىيلىق عالىم جايلىبايعا گرۋزيا جازۋشىلار وداعىنىڭ ءتورايىمى، شوتا رۋستاۆەلي اتىنداعى گرۋزيا مەملەكەتتىك سىيلىعىنىڭ يەگەرى، اقىن، «گرۋزين جىرىنىڭ امازونكاسى» اتانعان ماكۆالا گوناشۆيليدىڭ اۋدارماسىمەن جارىق كورگەن جىر جيناعى جانە ەكى ەل اراسىنداعى ادەبي-مادەني بايلانىس ورناتقانى ءۇشىن، ال الىبەك بايبولعا قر مادەنيەت جانە اقپارات مينيسترلىگى جانە قازاقستان جازۋشىلار وداعىنىڭ «تمد ەلدەرىنىڭ ارحيۆتەرىندەگى قازاقستاندىق جازۋشىلاردىڭ زەرتتەۋ جۇمىستارى» دەلىنگەن ورتاق جوباسى اياسىنداعى «تيفليستەگى قالامگەرلەر تاعدىرى» (قازاقستان مەن گرۋزيانىڭ ادەبي-مادەني بايلانىستارى حاقىنداعى مينياتيۋرالىق-حرونيكالىق ەسسەلەر، 1930-1938 ج.) اتتى كىتابى ءۇشىن تابىستالدى.

سۋرەتتەر: اۆتوردىڭ جەكە ارحيۆىنەن الىندى.

6 مامىر كۇنى عالىم جايلىباي جىر كىتابىنىڭ تانىستىرىلىمى ءارى شىعارماشىلىق كەشى تبيليسيدەگى دوستىق ۇيىندە وتە جوعارى دەڭگەيدە ءوتتى. 5-10 مامىر ارالىعىنداعى حالىقارالىق ادەبي فورۋمعا يتاليا، يزرايل، گۇرجىستان، ارمەنيا، تۇركيا، قازاقستان، لاتۆيا، گەرمانيا، ت.ب. جيىرماعا تارتا ەلدىڭ بەلگىلى اقىن-جازۋشىلارى، ادەبيەتشىلەرى قاتىستى. دەلەگاتتار تبيليسيدەن بولەك، متسحەتا، كاحەتي، كۆارەلي، تسيناندالي، تەلاۆي، رۋستاۆي سەكىلدى قالالاردى جانە تاريحي جەرلەردى تاماشالادى. سونىمەن قاتار، ارمەنيانىڭ ۇلتتىق اقىنى وۆانەس تۋمانياننىڭ جانە بيىل تۋعانىنا 240 جىل تولىپ وتىرعان گۇرجىنىڭ ۇلى اقىن-رومانتيگى، ورىس يمپەراتورلىق ارمياسىنىڭ گەنەرال-لەيتەنانتى، مەملەكەت جانە قوعام قايراتكەرى الەكساندر چاۆچاۆادزەنىڭ مۇراجاي-ءۇيىن، ماناۆي قامالىن، كارتلي-كاحەتيا ايماعىن، گۇرجىستاننىڭ ۇلى پاشاسى يراكلي II رەزيدەنتسياسىن ارالاعان-دى. شارتاراپتان اقىن-جازۋشى جيىلعان اتالعان شارا ادەبي التىن كوپىر مىندەتىن اتقارعانى انىق. بۇل ايتۋلى فەستيۆالدى گرۋزيا جازۋشىلار وداعىنىڭ ءتورايىمى، شوتا رۋستاۆەلي اتىنداعى گرۋزيا مەملەكەتتىك سىيلىعىنىڭ لاۋرەاتى، اقىن ماكۆالا گوناشۆيلي جانە بىلىكتى ادەبيەتشى، فەستيۆال كوورديناتورى، ادەبي مەنەدجەر مانانا گورگيشۆيلي ۇيىمداستىرعان.

الىبەك بايبول

Abai.kz